खोज

विजुली भन्नासाथ पानीबाट मात्रै निकालिन्छ भन्ने बुझाई छ । तर हावाबाट पनि विजुली भन्दा पत्यार नलाग्न सक्दछ । तर निस्दी गाउँपालिकाले भने हावाबाट बिजुली निकाल्ने प्रक्रिया शुरु गरेको छ । एक वर्ष अगाडी परिक्षणकाक्रममा हावाबाट निकालिएको विजुलीको सफल भएपछि स्थानिय सरकारले बिजुली निकाल्न थालेको हो ।
गाउँपालिका र वैकल्पिक उर्जा प्रवद्र्धन केन्द्रको लगानीमा २५ किलोबाट क्षमताको विद्युत निकालेर गाउँ वस्ती उज्यालो बनाउने अभियानमा स्थानिय सरकार लागेको छ । एक वर्ष अगाडी परिक्षणका क्रममा १ हजार दुई सयबाट क्षमताको विद्युत हावाबाट निकालेर मित्याल बजार उज्यालो बनाउने उद्देश्यले संयुक्त लगानीमा कामको थालनी गरिएको वडा अध्यक्ष न्यौ बहादुर सुनारीले बताए ।
निस्दी गाउँपालिकाको मित्याल बजारमा पर्ने रुक्से भञ्ज्याङ्ग डाँडामा पोलमा जोडिन पंखा घुमाएर निकालिने विद्युतको कार्य यतिखेर तिव्र गतिमा अगाडी बढेको छ । यहाँबाट निकालेको विद्युत मित्यालको रुक्से भञ्ज्याङ्ग, झ्याल्टुङ, मौलाथरका झण्डै २ शय घरमा उज्यालो बनाउने अभियान चलेको उपभोक्ता समितिका अध्यक्ष भुपेन्द्र सुनारीले बताए ।
स्थानिय उपभोक्ताहरु हावाबाट निकालिएको विजुली प्रयोग गर्न पाउने हुदा निकै उत्साहित भएको अध्यक्ष सुनारीले बताए । यतिखेर पंखा राख्ने ठाउँमा काम तिव्र गतिमा भइरहेको र त्यसपछि घरघरमा विद्युत वायरिङ को काम सकिएपछि विद्युत जडान हुनेछ । निर्माण कामको जिम्मा विराटनगर स्थित कृष्ण ग्रिल एण्ड इन्जिनियरिङ प्रालीले लिएको छ । एक वर्ष अगाडी हावाबाट निकालेको विजुली सफल देखिएपछि थप विजुली निकाल्न स्थानिय सरकार लागेको गाउँपालिकाका अध्यक्ष मुक्त बहादुर सारुले बताए । उनका अनुसार गत साल निकालिएको बिजुलीबाट वडा कार्यालय, प्रहरी चौकी, बजार क्षेत्रमा प्रयोगमा ल्याइएको छ ।
वायु तथा सौर्य उर्जाका लागी गाउँपालिकाको ४२ लाख १३ हजार वैकल्पिक उर्जा प्रवद्र्धन केन्द्र को १ करोड ६७ लाख रुपैयाँ गरी २ करोड ९ लाख १३ हजार रुपैयामा गाउँ उज्यालो बनाउने कार्यमा लागेको उनले बताए । गाउँमा यस अगाडी स्थानिय खोलाबाट निकालिएको लघु विद्युतको प्रयोग भएपनि त्यसले पूर्णता पाएको थिएन । विद्युतीकरण पछि गाउँ उज्यालो मात्र नभइ बालवालिकाको पठनपाठनमा समेत सुधार आउने अभिभावकहरुको आशा छ ।
….

एक वर्ष अगाडी हावाबाट निकालेको विजुली सफल देखिएपछि थप विजुली निकाल्न स्थानिय सरकार लागेको हो । वैकल्पिक उर्जा प्रवद्र्धन केन्द्र र गाउँपालिकोको संयुक्त लगानीमा काम शुरु गरेका छौं ।
मुक्त बहादुर सारु
अध्यक्ष
निस्दी गाउँपालिका, पाल्पा