खोज

खजुरा गाउँपालिकाले अब ब्यक्तिगत घटना दर्ता तथा सामाजिक सुरक्षा प्रणालीलाई अनलाईन मार्फत संचालन गर्ने भएको छ । खजुरा गााउँपालिकाका–८ वटै वडामा अनलाईन मार्फत घट्ना दर्ता बिलिङ्ग गर्न प्रकृया अगाडी बढाइएको छ । सबै वडामा अनलाईन सेवा संचालनका लागि इन्टरनेट जडान, कर्मचारीलाई तालिम लगायतको प्रकृया अगाडि बढाइएको छ ।
अनलाईन ब्यक्तिगत घटना दर्ता तथा सामाजिक सुरक्षा प्रणाली ब्यबस्थापन सम्बन्धी तालिम खजुरामा शुक्रवारदेखि शुरु भएको छ । ५ दिने तालिममा गाउँपालिका आइटी अफिसर सुरेश साहु, कार्यालय सहायक राजेन्द्र कुमार वर्मा र सन्तोषी बिष्टले सहभागी सचिव खरिदारलाई ब्यहारिक तथा सैद्धान्तिक ज्ञान सिकाईरहेका छन् । हाल वडा नं. १ देखि ४ सम्म इन्टरनेट समेत जडान भैसकेको छ । तालिम उद्घाटनमा बोल्दै गाउँपालिका प्रमुख किस्मत कुमार कक्षपतिले २१ औं शताब्दीमा समय सुहाउँदो अनलाईन मार्फत कामकाज हुने बताए ।
उनले अनलाईन सेवाले सेवाग्राहीको काम अझ प्रभावकारी ढंगले हुने बिश्वास ब्यक्त गरे । गाउँपालिका उपप्रमुख एकमाया बिकले अनलाईन सेवाले हिजोका दिनमा जस्तो नाम छुट्ने, दोहोरिने समस्या हट्नुका साथै काममा पारदर्शिता र प्रभावकारी हुने बताइन् । कार्यक्रममा खजुरा गाउँपालिका निमित्त प्रमुख अधिकृत दिलबहादुर पौडेलले अनलाईन सेवाले सुरक्षा र समयको बचत हुने बताए । उनले संचारको युगमा सरकारको नीति अनुरूप नै गाउँपालिकाले अनलाईन अभिलेखिकरण सेवा संचालन गर्न लागेको बताए ।