खोज

पाल्पा, १३ माघ ।

पाल्पाको तिनाउ गाउँपालिका –३ मा रहेको तिलोत्तमा माध्यमिक विद्यालय प्राविधिक धार अटोमोबाइल तर्फ लुम्बिनी प्रदेश प्रथम हुन सफल भएको छ ।

लुम्बिनी प्रदेशमा रहेका (प्राविधिक धार) अटोमोबाइल अध्यापन गराउने ४ वटा विद्यालय मध्ये तिनाउ – ३ झुम्सामा रहेको तिलोत्तमा माध्यमिक विद्यालयले ९३.७५ प्रतिशत अंक प्राप्त गरी लुम्बिनी प्रदेश प्रथम हुन सफल भएको ब्यवस्थापन समितिका अध्यक्ष टंक बश्यालले बताए ।

प्राविधिक शिक्षा १८ महिने अटोमोबाइल इन्जिनियरिङ विषयको शैक्षिकसत्र २०७७÷७८ को वार्षिक परिक्षामा १६ जना विद्यार्थी मध्ये १५ जना विद्यार्थी उत्तीर्ण भइ लुम्बिनी प्रदेशमै प्रथम स्थान प्राप्त गर्न सफल भएको अध्यक्ष बश्यालले जानकारी दिए ।

अहिले नतिजा सार्वजनिक भएको दोस्रो शैक्षिक सत्रको हो । तिलोत्तमा माध्यामिक बिद्यालय अटोमोबाइल सम्बन्धि पढाई हुने जिल्लाकै एक मात्र विद्यालय हो। सिटिइभिटीबाट मान्यता प्राप्त आङ्गिक सामुदायिक विद्यालय तिलोत्तमा माविमा १८ महिने प्री डिप्लोमा इन अटोमोवाइल इन्जिनियररिङ्ग सम्बन्धि विगत ३ बर्ष देखि कक्षा संचालन भइरहेको छ।हाल १९ जना विद्यार्थीले अध्ययन गरिरहेका छन् ।

पढाई पश्चात पूर्णरुपमा रोजगारको ग्यारेन्टी सहित कक्षा संचालन भइरहेको र अटोमोवाइल इन्जिनियरिङ्ग विषयसङ्ग सम्बन्धि मेकानिकल ल्याब, अटोमोवाइल ल्याब , वर्कशप, आइसिटी ल्याब, मल्टिमिडिया जडित कक्षाकोठा, आफ्नै कार तथा बाइक सिक्ने स्पट्को सुविधा लगायतका विशेषता रहेको छ ।

विद्यालयले सम्पूर्ण विद्यार्थीहरुलाई पूर्ण रुपमा निःशुल्क प्रशिक्षण दिदै आइरहेको र आर्थिक अवस्था कमजोर भएका र जेहेन्दार विद्यार्थीलाई छात्रवृत्तिको व्यवस्था समेत रहेको विद्यालयका प्रधानाध्यापक झविन्द्र ज्ञवालीले बताए ।