© २०२३
चन्द्रौटा(कपिलवस्तु), १३ माघ ।
कपिलवस्तुको शिवराज नगरपालिकाको वडा नम्बर ४ खरेन्द्रपुरमा अवस्थित समयथान बहुमुखी क्याम्पसमा सरस्वती मन्दिरमा मुर्तिको उदघाटन गरिएको छ । यसैबीच क्याम्पसमा बिबिएस चौथो वर्ष उत्तीर्ण विद्यार्थीलाई सम्मान समेत गरिएको छ । क्याम्पसले वसन्त पञ्चमी अर्थात सरस्वती पूजाको अवसरमा मुर्तिको उदघाटन तथा बिबिएस उत्तीर्ण विद्यार्थीलाई सम्मान गरेको क्याम्पस प्रमुख नामदेव खनालले जानकारी दिए ।
लुम्बिनी प्रदेश सभा सदस्य अर्जुन कुमार केसीले सरस्वती मन्दिरमा भव्य रुपमा मूर्तिको पूजापाठ गरी उदघाटन गरेका हुन् । सांसद केसीले बिबिएस उत्तीर्ण विद्यार्थीलाई थप शैक्षिक प्रगतिको शुभकामना दिँदै बिहीबार विद्यार्थीलाई सम्मान गरेका थिए ।
सरस्वती माताको मूर्ति क्याम्पसमा कार्यरत लेखापाल थनिश्वोर भुसालको बुवा केशव राज भुसालले आफ्नो भुसाल परिवारको तर्फबाट सौजन्य प्रदान गरेका थिए । क्याम्पसमा मूर्ति प्रदान गर्नुभएकोमा क्याम्पस परिवारले भुसाल परिवारलाई धन्यवाद व्यक्त गरेको थियो ।
क्याम्पस अध्यक्ष डिल्ली राज भुसाल, शिवराज नगरपालिका प्रमुख अजय थापा, वडा अध्यक्ष टेकलाल सापकोटा, नगर कार्यपालिका सदस्य बुद्धिकला भण्डारी, उद्योग वाणिज्य संघ चन्द्रौटाका अध्यक्ष इश्वरी पाण्डेय, व्यापार संघ कपिलवस्तुका अध्यक्ष महादेव पोख्रेल, क्याम्पसका पुर्व उपाध्यक्ष तथा सल्लाहकार समितिका संयोजक प्रेम बहादुर रायमाझी लगायतले कार्याक्रमलाई सम्बोधन गरेका थिए ।