खोज

बुटवल, १८ पुस । घोराही उपमहानगरपालिकाको १२ औँ नगरसभा तथा अधिबेशनले केही योजना र ऐनहरु संशोधन गरेको छ । सोमवार बसेको सभाले चालु आर्थिक बर्ष २०७९÷८० का केही योजना तथा कार्यक्रम संशोधन गरेको हो । वडा तहबाट परिवर्तन गर्नुपर्ने भनि आएका योजना तथा कार्यक्रमहरु संशोधन भएका छन् । कार्यक्रम सञ्चालन हुन नसक्ने भएको र योजना परिवर्तन गर्नुपर्ने भएका त्यस्ता योजनाहरु संशोधन भएका हुन् ।
नगरसभाले घर नक्सा पास तथा अभिलेखिकरण कार्य खुला गर्ने निर्णयलाई पास गरेको छ । घरनक्सालाई व्यवस्थित गर्ने र भुकम्प प्रतिरोधी भवन बनाउन प्रेरित गर्ने गरि अभिलेखिकरण गर्ने भएको हो । घर नक्सा पास गर्दा जरिवाना करमा छुटगर्ने निर्णय भएको छ । भवन निर्माण संहिता अुनसार सबै घरहरुलाई अभिलेख गरि सुरक्षित गराउने उपमहानगरले जनाएको छ । विधि पुगेका, प्राविधिकरुपले योग्य भएका, नक्सा पासमा छुटेका घरहरुलाई प्रकृया पुराएर नक्सा पास गरिने नगर प्रमुख नरुलाल चौधरीले जानकारी दिए । यो प्रकृयामा दुई देखि ३ महिना सम्म आबेदन खुल्ला गरेर सबै घरहरुको अभिलेख राखिने भएको छ ।
नगरको शिक्षा ऐन २०७५ लाई समेत संशोधन गरिएको छ । जस अनुसार शिक्षा युवा तथा खेलकुद महाशाखाको सट्टा सामाजिक विकास महाशाखा राख्ने, संघ र प्रदेशबाट छनौट भएका बाहेक नगर कार्यपालिकाबाट नमूना विद्यालय छनौट गर्ने, नगर भित्र हरेक बर्ष शिक्षक कर्मचारी र बाल विकास सहयोगी कार्यकर्ताहरुको नगर शिक्षा समितिले दरबन्दी मिलान गर्ने भएको छ । यसैगरी, समयमा कर नतिरेका व्यवसायीलाई करमा छुट दिएर करको दायरामा ल्याउने निर्णय पनि पारित भएको छ ।
यस अघि प्रत्येक चालु आर्थिक बर्षको असार मसान्त सम्म कर नबुझाई बक्यौता कायम हुन आएका बक्यौता कायम हुन आएको आर्थिक बर्षबाट थप १० प्रतिशतका दरले विलम्ब जरिवाना जोडि बक्यौता असुल हुदै आएकोमा आगामी २०८० साल बैशाख मसान्त भित्र तोकिएको कर तिर जरिवाना पूर्णरुपमा छुट गरिने सभाले निर्णय पारित गरेको छ ।
कोरोना महामारी, उच्च व्याजदर तथा आर्थिक मन्दिका कारण व्यवसायमा पर्न गएको मारलाई मध्यनजर गरी सहुलियतपूर्ण रुपमा सम्पूर्ण व्यवसायीलाई करको दायरामा ल्याउन उक्त संशोधन गरिएको नगर प्रमुख चौधरीले जानकारी दिए ।