खोज

जंगलमा देखिने बाँदरको ठुलो समुह यतिवेला शहरमा समेत देखिन थालेको छ । बादरले शहरमा आतंक फैलाई रहेको छ । बाटो हिँड्ने बटुवादेखि फुटपाथमा व्यापार गर्ने व्यापारीसम्म सबैलाई यतिबेला बाँदरले सताइरहेको छ ।
दैनिक जसो हुलका हुल बाँदरले बुटवलको पुरानो बटौली बजार हुँदै गोलपार्क, हाटबजार, कान्तिपथ, अमरपथ, संगमपथ, राममन्दिर लाइन, जेसिस चोक, नेपालगञ्ज रोड लगाएतका ठाउँमा देखिने गरेका छन् । घरमा पकाई राखेको खानादेखि लिएर व्यापार गर्न राखिएका फलफूल, तरकारी, चाउचाउ, विस्कुट, फु्रटी जस्ता खाद्यान्न बाँदरले खोस्ने गर्दा आफुहरु निकै आतंकित भएको व्यापारी हरि पाण्डे बताउछन् । प्रायः जसो विहान मर्निङ्गवाक हिड्ने बटुवामात्रै होइन, दिउसो र साँझ बजार गर्न हिड्ने मानिसहरु पनि बाँदर आतंकबाट त्रसित छन् ।
बाँदर घरमा पसेर कतिपयलाई टोक्ने र चिर्थोने समेत गरेको छ । बुटवलको कान्तिपथमा रहेको रुपन्देही उद्योग संघका कर्मचारी ज्ञानबहादुर वलीलाई घरमै बसेको समयमा बाँदरले टोकेको थियो । उनले लुम्बिनी अञ्चल अस्पतालमा ५ वटा सुई लगाए भने ५ हजार भन्दा बढी रकम खर्च भयो । वली भन्छन् आजकल त गुलेली किनेर घरमा राखेको छु आउदा धपाउनका लागि तर टेरदैनन् बाँदरले उल्टो हामीलाई नै धपाउछ ।
त्यस्तै पुरानो बटौली बजार बस्ने जमुना भट्टराइलाई पनि घरमा काम गरिरहेको समयमा घर भित्र बाँदरले पसि टोकेको थियो । उनले ३ वटा सुई लगाई सकिन भने अव २ वटा सुई लगाउन बाकी छ । उनको ५ हजार खर्च भैसकेको छ भने अरु कति लाग्ने हो यकिंन छैन भट्टराई बताउछिन् ।
घरमा पसि सुकाई राखेका कपडा चयात्ने, सामान खाने र विथोल्ने, पानीको टंकीको विक्रोखोली फोहोर गर्ने, स्कुल जाने बालबालिकाहरुलाई चिथोर्ने, झोला तान्ने गर्दा बालबालिकाहरु विद्यालय जान डराईरहेको अवस्था छ । नजिकैका विद्यालयहरु कान्ति मावि, बुटवल मावि, ज्ञानोदय मावि लगाएतका विद्यालयमा पसि आंतक फैलाएर विद्यार्थीहरुमा मानसिक असर समेत परेको शिक्षहरु बताउछन् ।
यता कान्ति माविका प्राचार्य गोविन्द ज्ञवाली भन्छन्–विद्यालयमा बाँदरले आतंक फैलाएर हैरान पारेपछि २÷३ वटा गुलेली किनेर चौकीदारहरुलाई दिईएको बताउछन् । विद्यालयको कक्षा कोठामा पस्ने, दिशा पिसाव गर्ने र बालबालिकाहरुको खाजा समेत खाईदिने गरेर हैरान पारेपछि यो कदम उठाएको ज्ञवाली बताउछन् ।
गर्मी महिना त्यै माथी पानीको अभाव हुने बुटवलमा घरघरका पानी टंकीको ढक्कन खोली पानी फोहोर गर्दा बुटवलबासी हैरान छन् ।