खोज

अहिले दाङका घोराही तथा तुलसीपुर उपमहानगरपालिका र लमही नगरपालीकाले प्रविधिको प्रयोग गर्न सुरु गरेका छन् । पहिले कागजी रूपले काम गर्ने गरेका उनीहरूले अहिले प्रविधिमैत्री काम सुरु गरेका हुन् ।
जनतालाई सरल, सहज र छिटोछरितो तरिकाले सेवा दिने भन्दै जिल्लाका स्थानीय तहहरूले वडास्तरबाटै अनलाइनबाट एकीकृत सम्पति कर संकलन देखि अन्य सेवाहरू पनि सुरु गरेको जनाएका छन् । प्रविधिमैत्री बन्न लागेका उनीहरूले सामाजिक सुरक्षा भत्ता, जग्गा तथा अन्य राजश्व संकलन र पञ्जिकरणलाई अनलाइन पद्दतिबाट गर्न थालेका हुन् । स्थानीय तहहरूले कर्मचारीहरूलाई तालिम दिई सबै वडाहरूलाई प्रविधिमैत्री सेवा दिन शुरु गरेको बताएका छन् । स्थानीय सरकारका कामहरू कागजरहित बनाउनका लागि धेरैजसो वडामा अनलाईन सेवा सुरु गरेको घोराही उप महानगरपालीकाले जनाएको छ । अझै केही वडाहरूमा इन्टरनेटदेखि बिद्युतीय उपकरण जडानको काम भइरहेको घोराही उप महानगरपालिकाका मेयर नरुलाल चौधरीले जानकारी दिए ।
घोराही उप महानगरपालिकाले यो वर्षदेखि वडा न १९ बाहेक सवै वडामा नेट इन्टनेट बिस्तार गरिसक्ने जनाएको छ । तर वडा न १९ भने पहाडी एरीया भएको र विद्युत बिस्तार समेत नभएकोले यो वर्ष इन्टरनेट बिस्तार हुन नसक्ने जनाएको छ । अन्य वडावाट उपमहानगरले अनलाइमार्फत एकिकृत सम्पतीकर शुरु गरेको छ ।
“हामीले यो वर्ष १९ नं.वडा बाहेक अन्य सवै वडावाट अनलाईन पद्दतीवाट काम गर्ने वातावरण बनाएका छांै” मेयर चौधरीले भने ।
यस्तै वडा कार्यालयबाट अनलाइन सिस्टमबाट जेष्ठ नागरिक, एकल महिला, दलित, अपाङ्ग तथा पोषण भत्ताको नाम दर्ता, लगत कट्टा, परिचय पत्र निकाल्ने कार्य पनि भइरहेको छ । त्यस्तै अब केही महिनाभित्रै अनलाइन घटना दर्ताको काम पनि सवै वडामा बिस्तार गर्ने उप महानगरपालिकाको योजना रहेको छ । सिंहदरबारको अधिकार घरघरमा भन्ने नारा दिएका जनप्रतिनिधिहरूलाई लगाएर साविक गाविसबाट हुने काम नगरमा केन्द्रित गरेकोमा निकै आलोचना खेप्नु परेको थियो । अहिले आफ्नै ठाउँबाट सेवा पाउँदा भने साँच्चिकै परिवर्तनको महसुस भएको स्थानीयहरूले बताएका छन् । उता तुलसीपुर उप महानगरपालीकालाई स्मार्ट सिटी बनाउने तयारीमा जुटेका मेयर घनश्याम पाण्डेले पनि सेवालाई प्रविधिमैत्री बनाउन सुरु गरेका छन् । उप महानगरपालीकाका सबै वडाहरूमा अनलाइनबाट कर संकलन र घटना दर्ता गर्न सुरु गरेको मेयर पाण्डेले जानकारी दिए । कार्यालयदेखि वडा तहसम्म प्रविधिमैत्री सेवा दिन प्रयास गरेपनि एक दुई वटा वडाहरूमा भने ईन्टरनेटको समस्या देखिएको उनले बताए । तर ती वडाहरूमा पनि नेट जोड्नको लागि काम भैरहेको उनको भनाई छ । “स्मार्ट नगर बनाउनका लागि पहिलो प्रयासको रूपमा ईलेक्ट्रोनिक पद्दतीबाट काम गर्ने कार्यालय बनाउन लागेका छांै” मेयर पाण्डेले भने । कागजी प्रकृयाबाट गरिने काम भन्दा ईन्टरनेटको माध्यमबाट कम्प्युटरमा गरीने काम धेरै छिटो हुने उनको भनाई छ । स्मार्ट सीटिका लागि पहिला सुचकहरूको पहिचान र त्यसपछि पूर्वाधार तयार गर्नुपर्ने भएकोले उप महानगरपालीकाले अहिलेकाममा स्मार्ट सिटिकै अवधारणमा काम गरीरहेको उनको भनाइ छ । प्रविधिमैत्री सेवाले गर्दा सबै नागरिक र कर्मचारीलाई पनि सहजता भएको तुलसीपुर ७ का सन्तोष केसीले बताए । “अहिले सबैलाई सेवा प्रवाहमा सहजता भएको छ, यसले गर्दा कागजको बचत पनि भएको छ” केसीले भने । त्यस्तै उता लमही नगरपालिकाले सबै वडाबाटै कर संकलन र घटना दर्ताको काम सुरु गरेको जनाएको छ । नगरपालिकाका प्रमुख कुलबहादुर केसीले सबै वडालाई प्रविधिमैत्री बनाएको भन्दै वडाबाटै प्रविधिमैत्री सेवा सुरु गरेको बताएका छन् ।
à