खोज

कम्प्युटर एशोसियसन नेपाल महासंघ (क्यान) रुपन्देहीको १७ औं साधारणसभा बुटवलमा सम्पन्न भएको छ । कार्यक्रममा बोल्दै क्यान महासंघ नेपालका केन्द्रीय कार्यवाहक अध्यक्ष नवराज कुँवरले डिजिटल नेपाल बनाउनको लागि सबैको हातेमालो जरुरी भएको बताएका छन् ।
कार्यक्रममा बोल्दै कुँवरले स्मार्ट गाउँपालिका, स्मार्ट सहरको कुरा जति गरे पनि स्थानीय तह, सरकारबाट काम अगाडि नबढेको भन्दै यसको लागि महासंघले हातेमालो गरेर अगाडी बढ्ने बताए । कार्यक्रममा बोल्दै उनले भने–‘डिजिटल नेपाल बनाउनको लागि क्यान महासंघ हातेमालो गर्न तयार छ, यसमा स्थानीय तहका व्याक्तिहरु स्मार्ट मात्रै भएर भएन सोंचाई पनि स्मार्ट हुनुप¥यो ।’
आईसीटिको विकासबाट मात्रै देश विकास संभव भएको भन्दै कुँवरले स्मार्ट सिटी बनाउनको लागि प्राप्त बजेटको व्यवस्था गर्न केन्द्र, प्रदेश र स्थानीय सरकारलाई आग्रह गरे ।
कार्यक्रममा बोल्दै क्यान महासंघका पूर्व केन्द्रीय अध्यक्ष विप्लव मान सिंहले स्मार्ट नगर, डिजिटल नगर, स्मार्ट गाउँपालिका भने पनि सबै एउटै भएको भन्दै सूचनामैत्री गाउँपालिका, सूचनाको पहुँच सहज रुपमा पुगेको सहर, गाउँ नै अहिलेको स्मार्ट पालिका भएको बताए । ई–गर्भनेसशको अवधारणा अगाडि बढाउनुपर्ने भन्दै उनले पेपरबाट पेपर लेस हँुदै डिजिटल बन्नुको विकल्प नभएको बताए । उनले भने–‘पेपर बाट पेपर लेस हँुदै डिजिटल बन्नुको विकल्प अबको २१ औं शताब्दीमा छैन ।’ डिजिटल नेपाल निर्माण परिकल्पना मात्रै नभएर संभव भएको भन्दै उनले देशमा उपलब्ध स्रोत र साधनको उच्चतम प्रयोग आवश्यक रहेको बताएका थिए ।
यस्तै कार्यक्रममा तिलोत्तमा नगरपालिकाका प्रमुख कार्यकारी अधिकृत कृष्ण प्रसाद सापकोटाले पछिल्लो समयमा स्थानीय तहहरु बिस्तारै सूचनामैत्री बन्दै गएको बताउँदै यसको लागि सरकारले अहिले सबै पालिकाहरुमा सूचना अधिकृतको व्यवस्थापन गरेको बताए । उनले सूचनामैत्री शासन निर्माणमा एउटा मात्रै पालिका लागेर नहुने भन्दै यसको लागि सबै ७ सय ५३ वटा तह नै सूचनामैत्री हुनुपर्ने बताएका थिए ।
कार्यक्रममा क्यान प्रदेश ५ का अध्यक्ष धु्रब शर्मा, रुपन्देही पूर्व अध्यक्ष प्रकाश राना, पाल्पा अध्यक्ष महेश शर्मा, क्यान महासंघ रुपन्देहीका अध्यक्ष नारायण प्रसाद श्रेष्ठ, उपाध्यक्ष रामुदेव गौतम, सचिव विरु बहादुर क्षेत्री, सह–सचिव सुरेशचन्द्र भट्टराई लगायतले मन्तव्य राखेका थिए । सोही कार्यक्रममा गोगो रोबर्ट निर्माण गर्ने बुटवलका लव पन्थी र कुश पन्थीलाई नगद सहित सम्मान गरिएको थियो । à