खोज

बुटवल,२९ असार । शिवनगर सामुदायिक बन क्षेत्रमा निर्माण भई सञ्चालनमा आएको नन्दनी गौशाला बुटवल उपमहानगरपालिकाको वर्तमान नेतृत्वको पूर्वाग्रहपूर्ण सोच र स्वार्थका कारणले बन्द हुन थालेको नेकपा एमाले बुटवलले तर्क गरेको छ ।

बुटवलमा देखा परेको छाडा चौपायाको समस्यालाई समाधान गर्ने उद्देश्यका साथ २०७७ सालमा बुटवल उपमहानगरपालिका र शिवनगर सामुदायिक बन उपभोक्ता समितिको सहकार्यमा शिवनगर सामुदायिक बनमा धार्मिक पर्यटन सहितको गौशाला निर्माण गर्ने सम्झौता सम्पन्न भएको थियो । सम्झौता बमोजिम करिब ८ विगाहा क्षेत्रफलमा उपमहानगरपालिकाले गौशालाका लागि आवश्यक पर्ने पूर्वाधार लगायतका आधारभुत संरचनाहरु निर्माण गरेको छ ।

गौशालाको दिर्घकालिन सञ्चालनका लागि बुटवल उपमहानगरपालिकाले कार्यविधि निर्माण गरेको र कार्यविधि अनुसार गौशालाका लागि आवश्यक पर्ने पूर्वाधार, गौ आहार दाना, पराल लगायत र स्वास्थ्य उपचारको प्रबन्ध बुटवल उपमहानगरपालिकाले गर्ने तथा शिवनगर सामुदायिक बनको नेतृत्वमा स्थानीयहरु सम्मिलित गौशाला सञ्चालन तथा व्यवस्थापन समिति निर्माण गरी त्यस मार्फत गौशालाको रेखदेख र सञ्चालन गर्ने व्यहोरा कार्यविधिमा उल्लेख गरिएको थियो ।

यसमा बुटवल उपमहानगरपालिका प्रमुख संरक्षक, शिवनगर सामुदायिक बन संरक्षक रहने व्यवस्था समेत थियो । तर अहिले उपमहानगरको नेतृत्व व्यक्तिगत स्वार्थ अनुकुल करिब ८ विगाहा क्षेत्रफलमा रहेको गौशाला कुनै अमूक व्यक्ति र संस्थालाई सञ्चालनका लागि दिन आतुर देखिएको नेकपा एमाले बुटवल नगर किमटी अध्यक्ष किशन ज्ञवलीले दावी गरे । २०७८ साल कार्तिक लक्ष्मीपुजाको दिन गौं संरक्षण केन्द्रको औपचारिक शुभारम्भ गरिएको थियो ।

‘२०७९ को स्थानीय निर्वाचन पश्चात बुटवल उपमहानगरपालिकामा नयाँ नेतृत्व आएपछि गौशाला प्रति हेर्ने दृष्टिकोण सकारात्मक भएन, नगरसभाबाट गौ संरक्षण केन्द्र सञ्चालनका लागि विनियोजन गरिएको रु २५ लाख समेत नगरपालिकाको नेतृत्वले गौशालालाई उपलब्ध गराइएन, बन उपभोक्त समिति र स्थानीयहरुको भावना विपरित कार्यविधि परिवर्तन गरेर आफ्नो स्वार्थ अनुकुल कुनै अमुक संस्थालाई गौशाला सञ्चालन गर्न दिने योजना बनायो र हुदाँ हुदाँ अहिले गौशाला बन्द हुने स्थिती आएको छ यसप्रति हाम्रो आपत्ति छ’–अध्यक्ष ज्ञवालीले भने–‘बुटवलमा आधारभूत संरचना सहितको गौशाला छ तर बुटवलका सडकभरी छाडा चौपायाहरु छरिएका छन् । बुटवल उपमहानगरपालिकाको वर्तमान नेतृत्व आफ्नो दायित्व बिर्सेर कानमा कपास हालेर बसिरहेको छ । छाडा चौपायाको कारणले दिनहु दुर्घटना निम्तिरहेको छ ।’

राज्यको सम्पति कुनै अमुक व्यक्ति वा संस्थालाई दिने प्रपन्च एमालेलाई स्विकार्य नहुने भन्दै शिवनगर सामुदायिक बन, स्थानीय र आम बुटवलबासीको भावना अनुसार गौ संरक्षण केन्द्र सञ्चालनमा ल्याई बुटवलका सडकमा रहेका छाडा चौपायाको तत्काल व्यवस्थापन गर्न ज्ञवालीले माग गरेका छन् ।

बुटवल उपमहानगरपालिकाका प्रवक्ता शिव रानाले भने गौशाला कुनै व्यक्तिलाई दिने कुरा नभएको तर थप व्यवस्थित गर्न कार्यविधि संशोधन गरिएको बताए ।