खोज

लमही , १२ असार ।

मंगलबार देउखुरीको राप्ती नदीमा लुम्बिनी प्रदेश स्तरीय जल उत्पन्न प्रकोप उद्दार अभ्यासको प्रदर्शनी गरिएको छ । तालिम प्राप्त नेपाली सेना, सशस्त्र प्रहरी बल नेपाल र नेपाल प्रहरी तीनै सुरक्षा निकायले विपद् र विपद्पश्चात् तत्काल उद्दार गर्न राप्ती नदीमा संयुक्त अभ्यास प्रदर्शनी गरिएको हो ।

कार्यक्रम अन्तर्गत नेपाली सेना, नेपाल प्रहरी र सशस्त्र प्रहरीको संयुक्त टोलीले राप्ती नदीमा द्रुत उद्दार, र्याफ्टिङ उद्दार, बाढी प्रभावित समुदायको उद्दार, गोताखोरद्वारा पानीमा डुबेका मृतकको उद्दार लगायतका आपतकालीन अवस्थामा गर्नुपर्ने कार्यहरू प्रदर्शन गरिएको थियो ।

लुम्बिनी प्रदेशका मुख्यमन्त्री डिल्लीबहादुर चौधरीले तीनै सुरक्षा निकायले संयुक्त रुपमा देखाएको प्रदर्शनी अभ्यासको प्रसंसा गरे । सीमित स्रोत साधान बाबजुद पनि सुरक्षाकर्मीहरुले विपद्का बेला आफ्नो ज्यानको समेत परवाह नगरी काम गरेको बताए ।

उनले भने,–‘लुम्बिनी प्रदेशमा वर्षातको बेलामा बाढी र डुबानले ठूलो क्षति गर्ने गर्दछ । क्षति न्यूनिकरण गर्न हामीले दक्ष जनशक्तिको तयारी गर्नुपर्ने आवश्यकता रहेको छ । उद्दारकहरुलाई चाहिने आवश्यक सामाग्रीको लागि आफुले यस वर्षको बजेटमा व्यवस्था गर्न लगाएको छु ।’

लुम्बिनी प्रदेश सरकारको संयोजकत्वमा प्रदेशस्थित सम्पूर्ण सरोकारवाला निकायहरुको सहभागितामा आयोजित विपद् व्यवस्थापन सम्बन्धी एकीकृत अभ्यास हातेमालो कार्यक्रममलाई सम्बोधन गर्दै मुख्यमन्त्री चौधरीले लुम्बिनी प्रदेशमा वर्षातको बेला बाढी र डुबानको समस्याहरु आउने हुनाले विपद् भन्दा पहिले पूर्व तयारीको काम आवश्यक रहेको बताए ।

यस्तै कार्यक्रममा विपद व्यवस्थापन निर्देशनालयका निर्देशक रविन्द्र खत्रीले कुनै पनि समयमा आम समुदायलाई जोखिमबाट उद्दार गर्ने गरी तयारीमा रहेको बताए ।

कार्यक्रममा तीनै तहका सुरक्षाकर्मीहरु र लमही नगरपालिकाले विपद्का बेला उद्दार कार्यमा प्रयोग गरिने सामग्रहीहरु प्रदर्शनी समेत गरेका थिए ।