खोज

रोल्पा, १० असार ।

अतिरिक्त हुलाक खारेज गर्ने निर्णयका विरुद्ध रोल्पाका अतिरिक्त हुलाकका कर्मचारी आन्दोलित भएका छन् । असार ५ गतेदेखि आन्दोलनमा उत्रिएका उनीहरुले असार १० गते पहिलो चरणको आन्दोलन सम्पन्न गरेका छन् ।

असार १४ गते देखि दोश्रो चरणको आन्दोलनमा जाने तयारीका साथ उनीहरु विभागमै पुगेर आन्दोलन गर्ने निश्कर्षमा पुगेका हुन् । “जिल्लामा भएको आन्दोलनप्रति सरकारको सदासयता देखिएन अव विभागमै पुगेर आन्दोलन गर्छौ”– नेपाल अतिरिक्त हुलाक कर्मचारी एशोएिशसन जिल्ला समिति रोल्पाका संयोजक देववहादुर सन्यासीले भने । “जीवनका उर्जाशिल समय अतिरिक्त हुलाकको सेवा गरेर विताएका कर्मचारीका लागि अव कुनै विकल्प नहुँदा कसरी जीवन यापन गर्ने ?” सन्यासीले प्रश्न गरे ।

अतिरिक्त हुलाक खारेज गर्ने निर्णय फिर्ता गर्न, अतिरिक्त हुलाकमा लामो समयदेखि कार्यरत कर्मचारीको रोजगार नखोस्न, हुलाकको संरचना खारेज हैन यसको पुनःसंरचना गर्न र अवकासपछि पाउने सुविधाको ग्यारेन्टी गर्न माग गरेका छन् ।

अतिरिक्त हुलाकमा काम गर्ने देशभर ११ हजार र रोल्पामा मात्रै १४९ कर्मचारी भएको वताइएको छ । हुलाक प्रमुख, पत्र वितरक र डाँक वाहक गरी तीन पदमा कार्यरत अतिरिक्त हुलाकका कर्मचारीहरु न्यून तवलमा काम गर्दै आएका थिए । हुलाक प्रमुखले मासिक ८ हजार ३१० तलव सुविधा लिदै आएकोमा पत्र वितरक र डाक वाहकले मासिक ७ हजार २७५ रुपैयाँ तलव लिदै आएका थिए । दैनिक २ घण्टा काम गर्ने भनिए पनि भौगोलिक दुर्गमताका कारण त्यो भन्दा दोव्वर समय काम गर्न वाध्य हुदै आएको उनीहरुको भनाई छ । रोल्पाका अतिरिक्त हुलाकमा काम गर्ने पुरुषको तुलनामा महिलाको संख्या वढी छ ।