खोज

रोल्पा, ४ असार ।

नेपाल शिक्षक महासंघ रोल्पाको अध्यक्षमा युवराज सुवेदी निर्वाचित भएका छन् । महासंघको आईतवार सम्पन्न दोश्रो जिल्ला अधिवेशनले सुवेदीलाई अध्यक्षमा निर्विरोध निर्वाचित गरेको हो ।
२२ सदस्यीय कार्यसमितिको सह अध्यक्षमा बेगमवहादुर कँवर, महिला उपाध्यक्षमा जमानथरी रोकामगर, उपाध्यक्षमा सूर्यप्रकाश डाँगी निर्विरोध निर्वाचित भएका छन् । कार्यसमितिको सचिवमा नरवहादुर सेन, सहसचिवमा बामदेव अधिकारी, महिला सहसचिवमा शोभा खड्का र अर्थ सहसचिवमा कुलवहादुर वली निर्विरोध निर्वाचित भएको निर्वाचन समितिका संयोजक दामोदरप्रसाद सुवेदीले जानकारी दिए ।

कार्यसमितिको सदस्यहरुमा चक्रवहादुर वुढामगर, प्रेमप्रकाश घर्तीमगर, निमवहादुर घर्तीमगर, सुनिता थापा र झक्कुप्रसाद केसी निर्वाचित भएका छन् । कार्यसमितिको अन्य सदस्यहरुमा शर्मिला आचार्य, रेशमवहादुर वुढाथोकी, डम्मवरवहादुर पुन, सुरेन्द्रप्रसाद न्यौपाने, विष्णुवहादुर वली, शिववहादुर घर्तीमगर, निराजन पौडेल, दुर्गाप्रसाद रोका र यशोदा विष्ट रहेको निर्वाचन समितिले जानकारी दिएको छ ।
जिल्लामा घटक संगठनको रुपमा एकीकृत अखिल नेपाल शिक्षक संगठन, नेपाल शिक्षक संघ, नेपाल राष्ट्रिय शिक्षक संगठन, अखिल नेपाल शिक्षक संगठन र अखिल नेपाल शिक्षक संघ तथा विद्यालय कर्मचारी परिषद कृयाशील रहेका छन् ।

जिल्ला अधिवेशनका उद्घाटन सत्रमा वोल्ने वक्ताहरुले शिक्षक महासंघले जिल्लाको शैक्षिक मुद्दा समाधानमा अगुवाई गर्नु पर्ने धारणा राखेका थिए । अधिकारको मात्रै सौदावाजी गर्ने नभई कर्तव्य समेत पुरा गर्नु पर्ने उनीहरुको सुझाव थियो । कार्यक्रममा नेपाल शिक्षक महासंघ लुम्विनी प्रदेशका सह अध्यक्ष छविलाल पाण्डेले महासंघ शिक्षाकर्मीहरुको साझा संगठन भएको वताउदै महासंघ अधिकारका साथै कर्तव्य निर्वाह गर्ने संस्था भएको वताए । उनले शैक्षिक सुधारमा समेत नेपाल शिक्षक महासंघमा आवद्ध व्यक्तिहरुका विद्यालय नमूना वन्नु पर्ने वताए । जिम्मेवारीवाट पन्छिने शिक्षकले विद्यालय सुधार गर्न नसक्ने सह अध्यक्ष पाण्डेले वताए ।

कार्यक्रममा जिल्ला समन्वय समिति रोल्पाका उप प्रमुख कर्मलाल परियारले जिल्लाको शैक्षिक विकासमा सवै स्थानीय तहले विशेष योजना ल्याउनु पर्ने वताए । “जिल्लाको शिक्षा विकासमा एक पटक सवैले वल गरौ”– उपप्रमुख परियारले भने । शिक्षा विकास तथा समन्वय ईकाइ रोल्पाका प्रमुख दुर्गावहादुर खड्काले जिल्लाको शैक्षिक अवस्थाको फेहरिस्त प्रस्तुत गरेका थिए । जिल्लाको शैक्षिक क्षेत्रको समन्वय गर्ने कार्यालय शिक्षा विकास तथा समन्वय ईकाइ २ जना कर्मचारीको भरमा चलेको उनले वताए ।
कार्यक्रममा नेपाल पत्रकार महासंघ रोल्पाका पूर्व अध्यक्षहरु काशीराम डाँगी, खेम वुढा र महेश न्यौपानेले समेत शुभकामना मन्तव्य राखेका थिए ।