खोज

दाङ, १२ चैत ।

घोराही उपमहानगरपालिकाको नगर शिक्षाले नगरस्तरीय शिक्षक दरबन्दी मिलान गर्दा आफूमाथि अन्याय भयो भनी दाङका केही शिक्षक संघ, संगठन बिरोधमा उत्रिएका छन् । नेपाल शिक्षक महासंघ घोराही नगर समितिले घोराही उपमहानगरपालिका अन्तर्गतका सामुदायिक विद्यालयमा कार्यरत शिक्षकहरुको दरबन्दी मिलानमा असन्तुष्टि जनाएको छ ।

विद्यार्थी संख्याको आधारमा दरबन्दी मिलान गर्ने सम्बन्धी विभिन्न समयमा शिक्षक महासंघ तथा पेशागत शिक्षक संघ÷संगठनको औपचारिक÷अनौपचारिक बैठक÷छलफलमा भएका सहमति विपरित दरबन्दी मिलान गर्ने बहानामा शिक्षा ऐन÷नियम विपरीत मनोमानी तथा राजनीतिक पूर्वाग्रही ढङ्गले आस्थाका आधारमा शिक्षकहरुको अपायक सरुवा, नियम विपरित र नेपाल शिक्षक महासंघसँगको सहमति विपरित गरिएका सरुवा निर्णयहरु अविलम्ब सच्याउन माग गरेको छ ।

नगर सहअध्यक्ष हुमबहादुर रानाको अध्यक्षतामा आईतबार पत्रकार सम्मेलन गरी घोराही नगर शिक्षामा चैत ८ गते बसेको बैठकको निर्णय शिक्षकहरुको भावना र सम्मान विपरीत रहेको हुँदा तत्काल सच्याउन माग गरिएको छ ।

सहअध्यक्ष रानाले शिक्षकहरुको सहमति विपरित दरबन्दी मिलान गर्ने बहानामा शिक्षा ऐन÷नियम विपरीत मनोमानी तथा राजनीतिक पूर्वाग्रही ढङ्गले आस्थाका आधारमा शिक्षकहरुको अपायक सरुवा, नियम विपरित र नेपाल शिक्षक महासंघसँगको सहमति विपरित गरिएका सरुवा निर्णयहरु अविलम्ब बदर गरी नियम सङ्गत र शिक्षक महासंघको सहमति अनुसार कार्य गर्न घोराही उपमहानगरपालिका, घोराही नगर शिक्षा समिति लगायत सामाजिक विकास महाशाखा घोराहीलाई ध्यानाकर्षण गराएका छन् ।

‘विद्यार्थी कम भएको ठाउँमा दरबन्दी काट्ने र नजिकैको विद्यालयमा दरबन्दी थप गरी मिलान गर्ने बुझेका थियोँ तर व्यवहारमा अर्कै हुन पुगेको छ’ उनले भने । ‘समस्याका बारेमा हामीले लिखित मौखिक जानकारी गराउँदा पनि सुनुवाई नभएपछि अबको बाटो र आन्दोलनका बारेमा सोँच्नु पर्ने भएको छ ।’

उनले आफूहरुको माग र आवाज सबै ठीक नै भएको भन्न सक्ने अवस्था नरहेको र यसका बारेमा गम्भीरतापूर्वक सोँची दिन अपिल गरे । ‘शिक्षकले उठाएको माग, नगर शिक्षाले चालेको कदमलाई मिहिन रुपमा केलाएर देखा परेको समस्याका बारेमा सबैले साथ दिनुहोला, हामीले उठाएका सबै कुरा ठीक छन् भन्ने पक्षमा हामी पनि छैनौ, उनले भने ‘समस्या हामीमा पनि हुन सक्छ, आगामी दिनमा शैक्षिक उन्नयनका लागि सबैको समान अस्तित्वको भावनात्मक विकास होस् भन्ने हाम्रो चाहना हो ।’

दरबन्दी मिलान भनिए पनि व्यापक सरुवा गरिएको, नमूना विद्यालयका नाममा नगरपालिकाले विद्यालय व्यवस्थापन समितिमा हस्तक्षेप गरेको उनको भनाई छ । उनका अनुसार दरबन्दी मिलानका क्रममा १०१ जना शिक्षकलाई चलाउने काम भएको छ । १८–२० वटा दरबन्दी काटेर २१ वटामा थप गर्नुपर्नेमा अनावश्यक ठाउँमा पनि चलाउने काम भएको उनको आरोप छ । यसले महिला शिक्षक बढी प्रभावित भएका, दरबन्दी काटिएको ठाउँमा पनि नयाँ शिक्षक सरुवा गरिएको, नजिकका तथा पायक विद्यालयमा रिक्त रहेको दरबन्दी खाली राखेर पूर्वाग्रही रुपमा टाढा पठाईएको बताए । समस्याका बारेमा विषय उठान भएकाले सम्वादको माध्यमबाट समस्या समाधानमा ध्यान दिन उनको आग्रह छ । अन्यथा, शिक्षक महासंघको नेतृत्वमा चरणवद्ध आन्दोलनका कार्यक्रमहरु घोषणा गरी सञ्चालन गर्न बाध्य हुने चेतावनी दिएका छन् ।

नेपाल शिक्षक महासंघ घोराही नगर समितिको विरोध कार्यक्रममा नेपाल राष्ट्रिय शिक्षक संगठन घोराही, एकीकृत अखिल नेपाल शिक्षक संगठन घोराही, अखिल नेपाल शिक्षक संगठन घोराही, अखिल नेपाल शिक्षक संघ घोराही, प्रगतिशिल नेपाल राष्ट्रिय शिक्षक संगठन घोराही र अखिल नेपाल शिक्षक संगठन क्रान्तिकारी घोराहीको आवद्धता रहेको जनाएका छन् ।