खोज

कपिलवस्तु, १० माघ
कपिलवस्तुमा हुलाकी सडक अन्र्तगतको राजपुर देखी दत्तपुर सम्म सडकखण्डको सडक निर्माणमा भएको ढिलाईले यहाँका नागरिक सास्ती खेप्न बाध्य छन । एकै समयमा ठेक्का लिएका सो मार्गको अन्य सडकखण्डको काम अन्य निर्माण व्यवसायीले पुरा गर्न थाले पनि सो ठेक्कामा हाल सम्म ३५ प्रतिशत मात्रै काम पुरा भएको देखिएको छ । राजपुर देखी दत्तपुर सम्मको १७ किलोमिटर सडक निर्माणको ठेक्का हुलाकी राजमार्ग आयोजना निर्देशनालय सँग सम्झौता गरि लामा गोल्डेन गुड शिवशक्ति जेभीले लिएको हो । २०७६ कार्तिक २९ गते सम्झौता गर्दा सो सडक निर्माण सम्पन्न गर्नु पर्ने म्याद २०७९ कार्तिक २९ गते सम्म तोकिएको थियो । तर, कोभिड संक्रमण सहित अन्य समस्या देखाउदै तोकिएको अबधीमा निर्माण पुरा नभएको भ्याट सहित ६८ करोड ६२ लाख ९१ हजार ६ सय २४ रुपैयाको लागत सम्झौताको सो ठेक्काको म्याद एक बर्ष थप भएको छ । पछिल्लो थपिएको म्याद अनुसार सो निर्माण व्यवसायी पक्षले २०८० कार्तिक २९ गते सम्म सडक निर्माण पुरा गर्नु पर्नेछ ।
तिन वटा निर्माण व्यवसायी कम्पनीहरु लामा कन्ट्रक्सन कम्पनी, शिवशक्ति र गोल्डेन गुड शेर्पा कन्ट्रक्सनले सो निर्माणको ठेक्का ज्वाईन्ट भेन्चरमा लिएका छन । लामा कन्ट्रक्सनमा काँग्रेस केन्द्रिय सदस्य तथा निर्माण व्यवसायी महासंघका पुर्व केन्द्रिय अध्यक्ष जिप छिरिङ्ग लामाको आबद्धता रहेको खुल्न आएको छ, त्यसै गरि जेभीको सम्पर्क व्यक्रिमा चितवनका सुरेन्द्र पाठक छन । तर नेपालकै ठुला मध्यका निर्माण व्यवसायी कम्पनीले ज्वाईन्ट भेन्चरमा लिएको यहाँको काम अति सुस्त गतिमा अगाडी बढेको छ ।

थपिएको म्यादमा समेत निर्माण कार्य दु्रत रुपमा अगाडी बढ्न नसके पछि नागरिकले सास्ती खेप्नु पर्दै आएको छ । कृष्णनगरमा व्यवसाय गर्दै आएका तौलिहवाका व्यवसायी मतिन खानले एकै सकय ठेक्का शुरु भएका अन्य खण्डमा सडक निर्माण पुरा भए पनि यो सडकखण्डमा अडक निर्माणमा ढिलाईले यात्रामा कठिनाई भोग्नु परेको बताए । “सडक निर्माणमा ठेकेदारले अति लापरवाही गरेका छन । यो बाटो हिड्दा गाडीको पनि ज्यान जान्छ, मान्छेको पनि ज्यान जान्छ ।” उनले भने ।

निर्माण कार्यमा भएको ढिलाई र लापरवाहीलाई नियमन गर्न सरकारी संयन्त्रले चासो नदेखाएको उनले आरोप लगाए । ठाँउ ठाँउमा बनाउन थालेको कलभर्ट अधुरो सगै सडकमै निर्माण सामाग्री छोडिदा र कतिपयस्थानमा सबवेसको काम समेत पुरा नहुदाँ सो मार्गमा हिड्ने नागरिकले धुलो र दुर्घटना सहितको बिभिन्न सास्ती खेप्दै आएको अर्का स्थानिय असलम मुसलमानले बताए । “ठाँउ ठाँउमा कल्भर्ट अलपत्र पारेका छन, निर्माण सामाग्री बिच सडकमा छ । ठेकेदारले समयमै काम नगरेर हामीलाई सास्ती नै दिएका छन ।

हाम्रो आवाज माथी सम्म पुग्दैन, आवाज नपुगी माथीकाले सुन्दैनन ।” उनले गुनासो गरे । दिउसो हिडन होस र मध्य रातमा काम परेर यात्रा गर्नु परे दुर्घटना र सास्ती खुप्दै पर्ने अवस्था रहेको उनले बताए ।

१७ किलोमिटर सडकमा माटो फिलिङ्ग, सव वेस, वेस, अस्फाल्ट, ४० कल्भर्ट र ६ किलोमिटरमा दुवै तर्फ ६ किलोमिटरमा नाली निर्माण गर्नु पर्ने ठेक्का सम्झौतामा छ । तर, हाल सम्म सो सडकखण्डमा २ किलोमिटर वेसको काम र डेढ किलोमिटर अस्फाल्ट डिभिएमको काम मात्रै पुरा भएको छ । ठेक्कामा ८ वटा कल्भर्ट निर्माण, ६ किलोमिटरमा माटो फिलिङ्ग, ६/६ किलोमिटरमा सव वेस र वेसको काम, साढे १५ किलोमिटर अस्फाल्टको काम र दुवै तर्फ ३/३ किलोमिटर नाली निर्माणको काम बाकी रहेको निर्माण व्यवासायी कम्पनीका ईन्जिनियर साकिर आलमले जानकारी दिए ।

हाल सम्म ८० प्रतिशत निर्माण पुरा हुनु पर्ने स्विकार गर्दै कम्पनीबाट पैसाको फ्लो समयमै नहुदाँ काममा ढिलाई भएको बताए । “हामीले लापरवाही गरेका होईनौं तर काम कम भएको अनुभुती गरेका छौं ।” उनले भने । सुरहि नदी पश्चिमको क्षेत्रमा केहि सकय स्थानियको अवरोध, समयमै बिद्युत पोल नह्टदा समस्या परेको र जमुनी देखी बहादुरगंज सम्म खानेपानीको पाईप नहटाईदाँ काम गर्न समस्या परेको निर्माण व्यवसायी पक्षको दावी छ ।

शुरुमा तोकिएको अबधीमा कोभिडको संक्रमणका कारण निर्माण पुरा हुन नसकेको र हाल सम्म निर्माण कार्यमा ३५ प्रतिशत भौतिक प्रगती भएको हुलाकी राजमार्ग योजना कार्यालय कपिलवस्तुका प्रमुख ईन्जिनियर बिष्णु पाण्डेले बताए ।

कोभीड संक्रमण पछि निर्माण व्यवसायीलाई निर्माण द्रुत गतिमा अगाडी बढाउन पटक पटक ताकेता गरिएको जनाउदै सम्बन्धित निर्माण व्यवसायीले थपिएको समयमा निर्माण पुरा गर्ने प्रतिबद्धताका साथ टाईमलाईन पेश गरेको उनले प्रष्ट्याए । “हामीले सम्बन्धित निर्माण व्यवसायीलाई पटक पटक लिखित र मौखिक रुपमा ताकेता गरेका छौ । निर्माण व्यवसायले थपिएको समयमा काम सम्पन्न गर्ने प्रतिबद्धता सहित काम गर्ने टाईमलाईन पेश गरेर बिश्वास दिलाएका छन ।” उनले भने । कम्पनीले निर्माणमा ढिलाई र कार्यालयको ताकेताका बिच निर्माणमा हुदै आएको ढिलाईले सो सडक खण्डमा यात्रा गर्ने नागरिकले भने बिभिन्न सास्ती खेप्दै आएका छन ।