खोज

जितपुर, १४ मंसिर ।
कपिलवस्तुको धार्मिक तथा ऐतिहासिक स्थल मधुवनधाममा जीवन, बुद्ध दर्शन र बौद्ध धर्मका विविध आयाममा केन्द्रित अन्तरक्रिया कार्यक्रम सम्पन्न भएको छ। सारीपुत्र फाउन्डेसनको आयोजनामा आयोजित यो कार्यक्रममा नेपाल र थाइल्याण्डका भिक्षु, भिक्षुणी, विद्वान्, धर्मप्रेमी तथा स्थानीयसहित सयौँ सहभागी भए।
थाइल्याण्डकी ९८ वर्षीय प्रख्यात विदुषी र बौद्ध शिक्षिका प्रोफेसर अचान सुजिन बोरीहर्नवानाकेलले प्रमुख वक्ताको रूपमा कार्यक्रममा सहभागिता जनाइन्। उनले “बुद्धलाई कसरी बुझ्ने?” र बुद्धको शिक्षालाई दैनिक जीवनमा लागू गर्ने विषयमा आफ्ना विचार प्रस्तुत गरिन्। सहभागीहरूले बुद्धत्व, जीवन दर्शन, र धर्मसम्बन्धी आफ्ना जिज्ञासाहरू राखे, जसको उत्तर उनले थाई भाषामा दिइन्। उनका विचारलाई नेपालीमा अनुवाद गरी बौद्ध विहारका प्रमुख सुमंगलो भन्तेले सहभागीहरूलाई स्पष्ट पारे।
विशेष स्वास्थ्य शिविर
अन्तरक्रिया कार्यक्रममा निःशुल्क स्वास्थ्य सेवा पनि समावेश गरिएको थियो। देवदह मेडिकल कलेजको प्राविधिक सहयोगमा आयोजित शिविरमा मुटु, छाला, नाक–कान–घाँटी, स्त्रीरोग, र प्रसूति सम्बन्धी विशेषज्ञहरूले जाँच गरे। सहभागीहरूलाई आवश्यक परामर्श तथा निःशुल्क औषधि वितरण गरिएको थियो। शिविरमा वडा नं. ८ का स्थानीयहरूको उल्लेखनीय सहभागिता रह्यो।
धार्मिक र पर्यटन प्रवर्द्धन
कार्यक्रमका विशिष्ट अतिथि लुम्बिनी प्रदेश सभा सदस्य विष्णु पन्थीले मधुवनधामको धार्मिक महत्त्व र पर्यटन विकासमा जोड दिनुपर्ने बताए। ९८ वर्षीय प्रोफेसर सुजिनको ज्ञान र जीवन अनुभवबाट प्रेरणा लिन पाउँदा खुसी लागेको उनले बताए। उनले स्थानीय तथा प्रदेश सरकारलाई मधुवनधामजस्ता पवित्र स्थलहरूको विकासका लागि विशेष ध्यान दिन आग्रह गरे।
मधुवनधामको महत्त्व
मधुवनधाम बौद्ध धर्मका लागि महत्त्वपूर्ण स्थल मानिन्छ। गौतम बुद्धले यहीँ शाक्य र कोलिय कुमार, भिक्षुहरू, र देवताहरूलाई महासमय सूत्र प्रदान गरेको विश्वास गरिन्छ। यसले धार्मिक, ऐतिहासिक र पर्यटकीय दृष्टिकोणले मधुवनधामलाई विश्वभरका बौद्धमार्गीहरूको प्रमुख गन्तव्य बनाएको छ।
यस्तै थाइल्याण्डबाट नेपाल आएको यो टोलीले यसअघि काठमाण्डौंको कोटेश्वरमा पनि यस्तै कार्यक्रम सम्पन्न गरिसकेको छ। मधुवनधामको कार्यक्रमपछि टोलीले लुम्बिनीमा अर्को कार्यक्रम गर्ने योजना रहेको सुमंगलो भन्तेले जानकारी दिए।