खोज

नवलपरासी पश्चिम्, १७ चैत ।

भूमि समस्या समाधान आयोगका केन्द्रीय अध्यक्ष हरिप्रसाद रिजालले आगामी तीन वर्षभित्रमै भूमिहिन सबैलाई पुर्जा वितरण गर्ने गरी कार्ययोजना बनाएर आयोग लागि परेको बताएका छन् । उल्लेखित समयमै भूमिहीन सुकुम्बासीको समस्या समाधान गर्ने गरी कामलाई तीव्रता दिएको अध्यक्ष रिजालले बताए ।

भूमि आयोग पश्चिम नवलपरासीले आइतबार परासीमा आयोजना गरेको अभिमुखीकरण कार्यक्रमलाई सम्बोधन गर्दै अध्यक्ष रिजालले आयोगले आगामी २०८४ असोज मसान्त भित्र नेपालमा रहेका सबै भूमिहीन दलित, सुकुम्बासी तथा अव्यवस्थित बसोबासीलाई जग्गाधनी पूर्जा वितरण गरिसक्ने गरी कार्ययोजना बनाएर अघि बढेको बताएका हुन् ।

संंविधानमा गरिएको व्यवस्था अनुसार नै सबै भूमिहीन र सुकुम्बासीलाई जग्गाको मालिक बनाउने उनले बताए । अध्यक्ष रिजालले सक्रियताका साथ प्रभावकारी रुपमा आयोगको कामलाई अघि बढाउन आयोगको जिल्ला समितिलाई निर्देशन पनि दिए ।

उनले स्थानीय तह र जिल्ला आयोगले सक्रियतापूर्वक काम गरेको खण्डमा मात्र आयोगको काम प्रभावकारी हुने र तोकिएको समय भित्रै भूमिहीनलाई जग्गाको मालिक बनाउन सकिने उल्लेख गरे ।

कार्यक्रममा आयोगका केन्द्रीय विज्ञ सदस्य डा..जगत बस्नेतले आयोगको कार्यविधि तथा कार्ययोजनाहरुको बारेमा स्थानीय जनप्रतिनिधि, राजनीतिक दल तथा कर्मचारीहरुलाई अभिमुखीकरण गरेका थिए ।

आयोगका जिल्ला अध्यक्ष लालबहादु गुरुङले निश्पक्ष र ईमान्दारिताका साथ नतिजा देखिने गरि आयोगले काम अघि बढाउने बताए ।