खोज

बुटवल, १८ चैत ।
नेपाल पत्रकार महासंघ रूपन्देहीले मिडियाकप फुटसल प्रतियोगिता आयोजना गरेको छ । महासंघले आफ्नो स्थापना दिवसको अवसरमा मिडियाकप फुटसल आयोजना गरेको हो । बुटवल देविनगरस्थित ग्रीनफिल्ड फुटसलमा आयोजित प्रतियोगिताको तिलोत्तमा नगरपालिकाका प्रमुख रामकृष्ण खाणले उद्घाटन गरेका हुन । प्रतियोगिता उद्घाटन गर्दै नगरप्रमुख खाणले पत्रकार महासंघले सामाजिक संघसंस्थाहरूलाई एकैस्थानमा जुटाउने जमर्को गरेको बताए । नेपालमा लोकतान्त्रिक गणतन्त्र स्थापनामा महत्वपूर्ण भूमिका निभाएको पत्रकार महासंघको भूमिका अहिलेको अवस्थामा झनै बढेको बताए । नगरप्रमुख खाणले गत शुक्रवार राजावादीहरूले काठमाडौंमा गरेको गतिविधि आन्दोलन मात्र नभई अराजकता र आतंकको नमुना भएको बताए ।

नगरप्रमुख खाणले पत्रकारहरू समाजको ऐना भएको उल्लेख गर्दै निस्पक्ष रूपमा सत्यतथ्य समाचार सम्प्रेषण गर्न आग्रह गरे । रूपन्देहीका व्यवसायीक संघसंस्था र मिडिया हाउसहरूका बीचमा अलग अलग आयोजना गरिएको प्रतियोगिता सोमबार सम्म चल्ने छ । सधै समाजका लागि कलम चलाउने श्रमजिवीहरू खेलकूदको माध्यमबाट जोडिनु सकारत्मक भएको उल्लेख गरे । बुटवल–११ देविनगरस्थित ग्रिनफिल्ड फुटसल एरिनामा जारी प्रतियोगिता अन्तरगत आइतबार समूहचरणसहित पहिलो सेमिफाइनल खेल सम्पन्न भएको छ । पहिलो सेमफाइनल आयोजक महासंघ रूपन्देहीलाई पराजित गर्दै ईन्जिनियर्स एसोसिएसन रूपन्देही फाइनल प्रवेश गरेको छ । उसले महासंघलाई ५–० गोल अन्तरले पराजित गर्दै फाइनल प्रवेश गरेको हो । यसैबीच अन्तिम सेमिफाइनल खेल सोमबार हुने प्रतियोगिताका संयोजक सुमन रश्मी श्रेष्ठले जानकारी दिए । सोमबार फाइनल प्रवेशका लागि शैक्षिक परामर्श संघ (इक्यान) रूपन्देही र शंकरनगर खानेपानी तथा सरसफाई उपभोक्ता समिति बीच हुने संयोजक श्रेष्ठले जानकारी दिए । कर्पोरेट कप अन्तरगत २२ वटा समुहको सहभागिता रहेको थियो ।

जारी प्रतियोगितामा सोमबार मिडिया कप फुटसल प्रतियोगिता सुरु हुने छ । उक्त प्रतियोगितामा रूपन्देहीका ९ वटा सञ्चारगृहको सहभागिता रहेको छ । आपसी सद्भाव तथा भातृत्व बिकासका लागि प्रतियोगिता आयोजना गरिएको पत्रकार महासंघ रूपन्देही अध्यक्ष दिनेश पाण्डेले जानकारी दिए । महासंघले आयोजना गरेको कर्पोरेट कप फुटसलमा विजेताले नगद २५ हजारसहित कप, मेडल र प्रमाणपत्र प्राप्त गर्नेछ भने उपविजेताले नगद राशी १५ हजारसहित कप, मेडल र प्रमाणपत्र प्राप्त गर्नेछ । यसैगरी मिडिया कपतर्फ विजेताले १७ हजार ७७७ र उप विजेताले ७ हजार ७७७ रूपैयाँ नगद राशीसहित कप मेडल र प्रमाणपत्र प्राप्त गर्ने छ ।

दुबै इभेन्टमा विधागततर्फ सर्वोत्कृष्ट खेलाडी, उत्कृष्ट गोल रक्षक तथा सर्वाधिक गोलकर्तालाई नगद राशीले सम्मान गरिने महासंघका सचिव सीपी खनालले जानकारी दिए । प्रतियोगितालाई जित र हारको रूपमा भन्दा पनि आपसी सद्भाव र सम्बन्ध बिस्तारएको रूपमा लिइएको उनले बताए । सोमबार अन्तिम सेमिफाइनल र फाईनल खेल हुने छ भने रूपन्देहीका मिडिया हाउसहरूको बीचमा प्रतिस्पर्धा पनि सोमबार नै हुने कार्यक्रम संयोजक श्रेष्ठले जानकारी दिए ।