खोज

प्यूठान ।

चितिखोलाको सरायँ मेलाको अवसरमा आयोजना भएको मारुनी नाच प्रतियोगितामा बेलडाँडा मारुनी नाच प्रथम भएको छ । मंगलवार प्यूठान नगरपालिका–२ स्थित चितिखोला मेला व्यवस्थापन समितिको आयोजनामा मारुनी नाच प्रतियोगिता भएको हो ।

प्रतियोगिताबाट मल्लरानी गाउँपालिका– ५ को बेलडाँडा मारुनी नाच समुह प्रथम भएको छ । द्धितीयमा मल्लरानी गाउँपालिका– ५ कुमिकोटको कुमिकोट मारुनी समुह र तृतीयमा प्यूठान नगरपालिका–६ फुर्केथुम मारुनी समुह भएको मारुनी नाचका मुल्याङ्कन संयोजक पुस्कार शर्माले जानकारी दिए । प्रथम, द्धितीय र तृतीयलाई क्रमशः रु ५, ३ र २ हजार पुरस्कार र यातायात वापत रु २ हजार प्राप्त गरेका छन् । लुम्बिनी प्रदेश सरकारका पूर्वमन्त्री तुल्सीराम शर्माले पुरस्कार हस्तान्तरण गरेका हुन् ।

शर्माले प्रतियोगिताबाट मौलिक संस्कृति मारुनीको संरक्षणमा सहयोग पुग्ने विश्वास व्यक्त गरे । उनले आगामी दिनमा समेत यस्ता कला संस्कृति संरक्षणमा थप क्रियाकलाप बनाउनु पर्नेमा जोड दिए ।

मारुनी नाँच प्यूठानका सबै स्थानीय तहमा नाचिन्छ । तर पछिल्लो समयमा युवा पुस्तामा पुस्तान्तरण नहुँदा संकटमा पर्दै गएको छ । जिल्लाका सबै स्थानीय तहहरुले मारुनी जस्ता मौलिक कला र संस्कृतिको संरक्षणमा चासो दिनु पर्ने जानकार लिला पुन बताउछन् । उनका अनुसार मगर समुदायको परम्परागत लोक नृत्य हो । यद्यपि यस नृत्यमा यस जिल्लाका अन्य समुदायको पनि सहभागिता रहने गरेको छ । महिलाको वस्त्र आभूषणले सिंगारिएको पुरुष नर्तकलाई मारुनी भनिन्छ ।

मादल बजाउने मदलेहरू तथा पुरुष भेषमा सजिएको पुरुष नृत्य पात्र पुरुसुङ्गेका साथमा रामायण, महाभारत तथा पुराणका गाधाहरुमा आधारित गीतहरूमा यो नृत्य प्रस्तुत गरिन्छ । तिहारको अवसरमा विधिपूर्वक आरम्भ गरिएको यो नृत्य तिहार लक्ष्मी पुजाका दिन शूरु गरेर माघ महिनाभित्रमा विधिपूर्वक समापन गरिने प्यूठान नगरपालिका–६ फुर्केथुम मारुनी नाचका गुरुमुखे ठगे पुनगमरले जानकारी दिए ।