खोज

नवलपुर, ६ भदौ। नारायणघाट बुटवल सडक आयोजनाले बजेट खर्च गर्न नसक्दा नवलपुर जिल्लाको समग्र पुजिगत खर्च समेत कम देखिएको छ । गत आवमा जिल्लामा विकास निर्माणका लागी आएको बजेटको ठूलो हिस्सा नारायणघाट बुटवल सडक आयोजनाको पुर्वीका लागि थियो । यो आयोजनाको पुर्वी खण्डका लागि गत आवमा विनियोजन भएको बजेट ३ अर्ब ७७ करोड २१ लाख ४९ हजार मध्ये १ अर्ब ६० करोड ४९ लाख ९४ हजार ७ सय ९० रुपियाँ अर्थात ४२.५४ मात्रै पुजीगत बजेट खर्च गरेको कोष तथा लेखा नियन्त्रकको कार्यालय नवलपुरले जनाएको छ ।

आयोजनाले बजेटको ठूलो हिस्सा खर्च गर्न नसक्दा गत आवमा समग्र नवलपुरको पुजी गत खर्च मात्रै ४४.१८ प्रतिशत पुगेको हो । गत आवमा नवलपुरका लागि ३ अर्ब ९१ करोड ७० लाख २७ हजार ९ सय ९ विनियोजित भएकोमा १ अर्ब ७३ करोड ८ लाख १३ हजार ५ सय २४ रुपियाँ खर्च भएको कोलेनिका नवलपुरले जनाएको छ ।

नारायणघाट बुटवल सडक आयोजनाको पुर्वी खण्ड बाहेकका अन्य योजनाका लागि प्राप्त बजेट १४ करोड ४८ लाख ७८ हजार ९सय ९ मध्ये १२ करोड ५८ लाख १८ हजार ७ सय ३४ रुपिया खर्च भएको कोलेनिका नवलपुरले उपलब्ध गराएको तथ्यांकमा उल्लेख छ । ४२ महिनामा सम्पन्न गर्ने गरि २०७५ को चैतमा सुरु भएको आयोजनाको भौतिक प्रगति ५३ प्रतिशतको हाराहारीमा छ । ६ वर्षको अवधिमा ५२ प्रतिशत मात्रै काम सम्पन्न भएको नारायणघाट बुटवल सडक आयोजनाले बजेट खर्च समेत गर्न नसकेको हो । यो आयोजनाले गत आ.व ०८०/८१ मा ४६.९८ प्रतिशत (पुर्वी तथा पश्चिम खण्ड दुवै) मात्रै बजेट खर्च अर्थात वित्तीय प्रगति गरेको हो ।

आयोजनाको दुवै खण्डका लागि लागि गत आवमा ७ अर्ब ४४ करोड ९२ लाख विनियोजन भएकामा ४६.९८ प्रतिशत मात्र खर्च भएको छ । अर्थात् ३ अर्ब ४९ करोड ९२ लाख रुपैयाँ खर्च भएको हो । २०७५ चैत ८ मा निर्माण थालिएको यो आयोजनाको अहिलेसम्म ५३ प्रतिशत मात्र प्रगति छ । १ सय १३ किमि सडक विस्तारको ठेक्का चाइना स्टेट कन्स्ट्रक्सन इन्जिनियरिङ कर्पोरेसनले लिएको हो ।