खोज

बुटवल, १ बैशाख ।
बुटवलमा सम्पन्न आठौ भुपुसैनिक कप नकआउट फुटबल प्रतियोगिताको उपाधि सिम्रिक युवा क्लबले चुमेको छ । भुपु सैनिक सालघारी समाजको संरक्षकत्व र भूपु सैनिक जबई स्पोर्टिङ्ग क्लबको आयोजनामा सोमबार भएको फाईनलमा आयोजक भुपुसैनिक स्पोर्टिङ क्लबलाई ३–१ गोल अन्तरले पराजित गर्दै सिम्रिकले उपाधि चुमेको हो । उपाधिसंगै सिम्रिक नगद २ लमख २२ हजार २२२ रुपैया, कप, मेडल, प्रमाणपत्रबाट पुरस्कृत भयो ।

उपविजेता भुपुसैनिक भने नगद १ लाख ११ हजार १११ रुपैया, कप, मेडल, प्रममणपत्रमा चित्त बुझायो । प्रतियोगितामा सिम्रिकका अरुण चौधरी सर्वोत्कृष्ट खेलाडी घोषित भए । सिम्रिककै सरिन जिसी उत्कृष्ट गोलकिपर, सिम्रिकका सुरज चौधरी सर्वाधिक गोलकर्ता, भुपुका मनोज श्रेष्ठ उत्कृष्ट रक्षक, भुपुका क्षितिजराज जेटि उत्कृष्ट मिडफिल्ड घोषित हुँदै नगद, कप र प्रमाणपत्र सहित पुरस्कृत भए ।

भुपुसैनिक जबई खेल मैदानमा भएको रोमान्चक फाईनल खेलको २० औ मिनेटमा पेनाल्टीमार्फत सुरज चौधरीले खाता खोले । भुपुको विशाल शाहीले सुरज चौधरीलाई डिबक्सभित्र लडाएपछि पाएको पेनाल्टीलाई चौधरीले नै गोलमा परिणत गरे । खेलको ५२ औ मिनेटमा सुरज चौधरीलाई लडाएपछि पाएको फ्रिकिकमा नीर बहादुर थापाले गोल गरे । खेलको ५५ औ मिनेटमा सुरज चौधरीलाई किपरले लडाएपछि पाएको पेनाल्टीलाई क्याप्टेन अर्जुन चौधरीले गोलमा परिणत गरे । अर्जुनको प्रहार भुपुका गोलकिपर निशान रानाको हातबाट फर्किएको बललाई उनले नै जाली चुमाए । आयोजकका सन्जय खत्रीले अन्तिम समयमा सान्त्वना गोल गरे ।

एक समारोहका बिच बुटवल उपमहानगरपालिकाका उपप्रमुख सावित्रादेवी अर्यालले प्रतियोगिताको उद्घाटन गर्दै नगर खेलको हबका रुपमा विकास भएको बताईन । यहा दैनिकजसो खेल गतिविधि हुदा यस क्षेत्रमा पर्यटन र आर्थिक चलायमान गराउन सफल रहेको उनले बताईन ।

कार्यक्रममा अखिल नेपाल फुटबल संघका केन्द्रीय उपाध्यक्ष दीर्घ बहादुर केसी, बुटवल नगरपालिका वडा नं १५ का वडाअध्यक्ष तथा नगर प्रवक्ता शिव राना, नगर खेलकुद विकास समिति बुटवलका संयोजक बोनिन पिया, रुपन्देही जिल्ला फुटबल संघका अध्यक्ष लोक पुन, लुम्बिनी प्रदेश भलिबल संघका अध्यक्ष योग गुरुङ, क्लबका अध्यक्ष गोपिराम पुनले विजेता, उपविजेता टिम तथा उत्कृष्ट खेलाडीहरुलाई पुरस्कार वितरण गरे ।

कार्यक्रममा लुम्बिनी प्रदेश भलिबल संघका अध्यक्ष योग गुरुङले खेल पुर्वाधार विकासमा भएको ढिलाई बारे प्रकाश पार्दै १५ करोड रुपैया रकम फ्रिज भएको उनले दुखेसो गरे ।
बन कानुनको कठिनाईको कारण मैदानको स्तरवृद्घिको काम रोकिएको उनले दाबी गर्दै अब भने यो समस्या समाधान भएको बताए । ‘छिट्टै मैदान निर्माणको काम शुरु हुन्छ ।’– उनले बताए ।

कार्यक्रममा भुपुसैनिक सालघारी समाजका अध्यक्ष डिल बहादुर थापाले समुदायबाट खेल विकासमा अग्रसरताबारे प्रकाश पारे । भुपुहरुको अगुवाईमा स्थानियहरु खेलाडी उत्पादन गरेको स्मरण गर्दै पछिल्लो समय यो रोकिएको उनले बताए ।

कार्यक्रममा वडा नं १३ का जनप्रतिनिधि लाल बहादुर गुरुङले फुटबल विकासको रुपमा खेलाईने यस्ता खेलकुद प्रतियोगितालाई सबैको सहयोग जरुरी रहेको बताए । ईतिहास बोकेको प्रतियोगितालाई स्थानिय सरकारबाट ३ लाख रुपैया बजेट बिनियोजन गरिएको उनले बताए ।

कार्यक्रममा क्लबका अध्यक्ष गोपिराम पुनले संस्थाको स्वर्ण वर्ष यात्रा, खेल विकासबारे प्रकाश पार्दै खेल क्षेत्रमा योगदान गरेका पूर्व प्रशिक्षक, खेलाडीहरुको सम्मानलाई निरन्तरता दिने बताए ।

यसैबिच रमाईलो भाले समाउने दौडमा मनोहर श्रेष्ठले विजयी भए । श्रेष्ठले लोकल कुखुरा समाउन सफल भए । भने नया वर्षको अवसरमा सास्कृतिक कार्यक्रम समेत भएको छ । प्रतियोगितामा नवलपरासीका दुई र रुपन्देही ६ गरि आठ टिमले भाग लिएका थिए ।