खोज

पाल्पा, ५ भदौ ।

रामपुर नगरको किसानबारी नजिककी विमला राना सडकको धुलोको कारण आफुलाई दीर्घरोगी बनाएको बताउँछिन् । फराकिलो मोटरबाटो चौबिस घण्टा साना ठुला सवारीका साधन गुड्ने सडकमा सुख्खा मौसममा धुलो, वर्षातमा हिलाम्य हुने सडकका कारण धेरैले यातना नै भोगेको उनी बताउँछिन् ।

“बिहान बच्चालाई सफा कपडा लगाएर विद्यालय पठायो, घर फर्कदा विद्यालय पोशाक वर्षातमा हिलाम्य र हिउँदमा धुलाम्ये भएर बच्चा आउँदा कपडा धुन हैरानी भएको थियो”– कल्पना भन्छिन् । विगतको तुलनामा पछिल्लो समयमा सडकमा न त धुलोको समस्या छ, न त हिलोको । “अहिले धुलो र हिलोको समस्या नै छैन”–उनी भन्छिन् ।

सदरमुकाम तानसेन पछिको मुख्य व्यापारिक केन्द्र ठानिने रामपुर नगरपालिकामा जन प्रतिनिधि निर्वाचित हुनुभन्दा अगाडि १ सय ५० मिटर मात्र सडक कालोपत्रे भएको थियो । स्थानीय निर्वाचनबाट निर्वाचित जनप्रतिनिधि तथा नगर प्रमुखले नगरको सडकको स्तरोन्नतिसंगै कालोपत्रे गर्ने कार्यलाई मुख्य प्राथमिकतामा राखेका कारण हिलो र धुलोको सामना गर्न नपरेको स्थानीयहरु बताउँछन् ।

स्थानीय सरकारका प्रमुख तथा नगर प्रमुख रमण बहादुर थापा भन्छन्, “सफा कपडा लगाएर विद्यालय हिंडेका बालबच्चा विद्यालय पुग्न नपाउँदै कहिले हिलाम्य, कहिले धुलाम्य भएको देख्दा मनै बिग्रियो । आफु निर्वाचित हुनासाथ सडकको स्तरोन्नती संगै कालोपत्रे गर्न लागेको हो ।”

सडक कालोपत्रे नहँुदा ज्यादै समस्या थियो । रातो माटोको कारण पैदल हिंड्नै कठिन थियो । अत्यन्तै समस्या भएको अगुवा कृषक कृष्ण कुमार अर्याल बताउँछन् ।

“सडकमा त सकसै थियो । वर्षातमा पैदल हिडन् समेत कठिन थियो । नदीबाट गिट्टी समेत ल्याएर राखियो भएन । स्थानीय निर्वाचन पछिको समयमा नगर प्रमुखले सडकलाई मुख्य प्राथमिकतामा राख्दा धेरैले आलोचना नै गरे । आलोचना गर्नेहरुका लागि यतिखेर पछुतो भएको छ”–उनी भन्छन् ।

राम्रा सडक बनाउने विषयमा सर्वसाधारणलाई भन्दा जनप्रतिनिधिलाई नै बुझाउन कठिन भयो । विकासका लागि भूगोलले जतिपनि सहयोग गरेको छ । अर्कोतर्फ कालीगण्डकी करीडोरले रामपुरलाई जोड्यो । तानसेन जोड्ने पुरानो सडक प्रदेश, संघीय सरकारले मर्मत गर्ने भएका कारणले पनि भित्री सडक कालोपत्रे गर्न सकियो । सरकारले पर्यटन गन्तव्य घोषणा गरेको पर्यटकीय क्षेत्र तालपोखरा आउने पर्यटकलाई यतिखेर निकै सहजभएको छ । कालो पत्रे सडकका कारण सबैलाई सहज भएको नगर प्रमुख थापा बताउँछन् ।

स्थानीय निकायमा जनप्रतिनिधि आउनु भन्दा अगाडि यहाँका जमिन रोपनीका हिसावले बिक्री हुन्थ्यो । जब सडक कालोपत्रे भयो तब आनाका हिसावले बिक्री हुन लाग्यो । यो सकारात्मक पक्ष हो । यहाँ जनसंख्या र जनघनत्व बढी छ । यहाँ बसोबास गर्नेहरु धेरै जिल्लाका छन् । यहाँ सडक कालोपत्रे भएसंगै जमिनको मूल्य आकासिएको स्थानीय नेत्र भट्टराई बताउँछन् ।

स्थानीय सरकारका मुख्य प्राविधिक कृष्ण थापा भन्छन्, “नगर भित्रको झण्डै २५ किलो मिटर सडक कालो पत्रे भएको छ । नयाँ ट्रयाक खोलिएको १ सय ५७ किलो मिटरमा ग्राभेल गरिएको छ । स्थानीय सरकारले ९० मिटरदेखि तीन किलोमिटर सम्म कालोपत्रे गरेको छ । नगर सरकारले कालोपत्रेका लागि २४ करोड रुपैयाँ खर्चियो । सडक कालोपत्रे गर्ने क्रम निरन्तर रुपमा अगाडि बढ्ने छ । नगरभित्र संघीय सरकारले १ सय ५० मिटर मात्र कालो पत्रे गरेको थियो । अबको तिन वर्षमा ९० प्रतिशत भन्दा बढी कालोपत्रे गरिनेछ ।” सडकका कारण विकासको फड्को मारेको प्राविधिक थापा बताउँछन् ।

सरकारले स्थानीय तहलाई उपलब्ध गराउने रकम बढाए २ वर्षमा धेरै सडकको स्तर उन्नती हुने थियो । प्रयाप्त बजेट नहँुदाका कारणले पनि समस्या भएको प्राविधिकहरु बताउँछन् ।