खोज

नवलपुर, २० चैत ।

घरमै सुत्केरी हुने पुरानो पराम्परालाई छाड्दै पुर्वी नवलपरासीको ग्रामीण भेगका महिलाहरु सुत्केरी हुन अब स्वास्थ्य संस्थामा जान थालेका छन् ।

गाउँ घरमा समेत स्वास्थ्य चेतना बढ्दै गएकाले ग्रामीण भेगका महिलाहरु हिजोआज सुत्केरी हुन स्वास्थ्य संस्था जान थालेका हुन् ।

जिल्लाको उत्तरी पहाडी भेगका महिलाहरु घरमै सुत्केरी हुने गरेकोमा अहिले ९२ प्रतिशत महिलाहरु सुत्केरी हुन स्थास्थ्य संस्थामा जाने गरेको जिल्ला जनस्वास्थ्य कार्यालय पुर्बी नवलपरासीले जनाएको छ ।

घरमा सुत्केरी हुँदा हुने जोखिम र स्वास्थ्य संस्थामा जाँदा हुने फाईदाको बारेमा महिलाहरुलाई बढी जानकारी हुन थालेपछि स्वास्थ्य संस्था जाने गरेको बुलिङटार स्वास्थ्य शाखाका प्रमुख अशोक कुमार श्रेष्ठले बताए ।

तराई भेगका अधिकांश स्वास्थ्य संस्थामा स्वास्थ्यकर्मीको पहुँच रहे पनि जिल्लाको पहाडी दुई गाउँपालिका बुलिङटार बौँदीकालीमा रहेका स्वास्थ्य संस्थामा अझै पनि स्वास्थ्यकर्मीको अभाव हुँदा स्थानीयले धेरै समस्या झेल्नु परेको बौदीकालीका ओम सारुले बताए ।

धेरै सयमदेखि पहाडका अधिकांश स्वास्थ्य चौकीहरु कार्यालय सहयोगीको भरमा चल्दै आएका छन् । बिरामीहरुले गाउँमै स्वास्थ्य सेवा पाउन नसकेपछि स्थानीयहरु कावासोती, गैडाकोट, चितवन लगायतका स्थानमा उपचार गराउन आउन बाध्य छन् ।

अहिले ठाउँ ठाउँमा बर्थिङ सेन्टर खुले पनि भरपर्दो बन्न थालेपछि पालिकाले गाउँकै स्वास्थ्य सँस्थामा सुत्केरी गराउन प्रोत्साहन गर्ने गरेको बुलिङटार ४ का वडाध्यक्ष मिनबहादुर आले मगरले बताए । बिगत दुई बर्ष यताको तथ्याँकमा पालिकाका बर्थिङ सेन्टरमा सुत्केरी गराउन जानेको सँख्या ६० प्रतिशतले बढेको पालिकाका स्वास्थ्य शाखाले जनाएको छ ।