खोज

नवलपुर, भदौ २३ गते । पुर्वि नवलपरासीको मध्यविन्दु नगरपालिकामा रहेको गोडार खोलामा मोटरवेल पुल निर्माण भएको छ । उक्त पुल निर्माण गर्नुपर्ने अन्तिम म्यादको तेह्र महिना अघिनै सम्पन्न भएको हो । सम्झौता भएको भन्दा समयअवधि अघि नै पुल निर्माण कार्य सम्मन्न हुदा स्थानिय खुसि भएका छन ।

पूर्वाधार विकास कार्यालय नवलपरासी पूर्वले मध्यविन्दु नगरपालिका –१५, टिकुलीटार स्थित गोडार खोलामा पुल निर्माणका लागि विस २०८० असोजमा देवचुली निर्माण सेवासँग सम्झौता गरेको थियो । ४५ मिटर लम्बाइको पुल विस २०८२ असोज १८ गते भित्र सम्पन्न गर्नुपर्ने रहेको थियो । रु। ५ करोड ८७ लाख ६४ हजार लागत रहेको पुल निर्माण कम्पनीले यही भदौ तीन गते काम सम्पन्न गरेको पूर्वाधार विकास कार्यालय नवलपुरका प्रमुख सन्तोष अर्यालले बताए । निर्माण कम्पनीले सम्झौता अवधि भन्दा तेह्र महिना पहिला काम सम्पन्न गरेको उहाँले बताउनुभयो । ठूलो पुल अन्तरगत पर्ने उक्त योजना छिटो गतिमा सम्पन्न भएको उनले बताए। निर्माणको काम सुस्त गतिमा हुनेगरेको भन्ने गुनासो रहने गरेकोमा यो पुल छिटो सम्पन्न हुनु सकारात्मक विषय भएको उनले बताए । ‘कतिपय योजना समयमा नसकिँदा समस्या हुने गरेको देखिन्छ, तर गरे सम्भव हुँदो रहेछ भन्ने सकारात्मक उदाहरण गोडार खोलाको पुल बनेको छ’ कार्यालय प्रमुख अर्यालले भन्नुभयो । यस्ता कार्यले अन्य सुस्त योजनालाई समेत समयमा सम्पन्न गर्न उर्जा थप्ने बताएका छन ।
पुल निर्माणको अन्तिम म्याद भन्दा अघिनै सम्पन्न हुँदा यस क्षेत्रका बासिन्दालाई सुविधा पुगेको मध्यविन्दु नगरपालिका –१५, का वडा अध्यक्ष यम बहादुर केसीले बताए । पुलले वडा नम्बर १५ सहित ६, ८, १०, ११, १२ का स्थानीयलाई आवतजावत गर्न सहज भएको उनले बताए । निर्माणको अन्तिम समय अवधि भन्दा पहिला सम्पन्न हुँदा झनै चाडै यहाँका बासिन्दालाई सुविधा थपेको उनले बताए । पुल नहुँदा बर्खाको समयमा जोखिम मोलेर हिँड्नुपर्ने र अन्य समयमा समेत खोला वारपार गर्न समस्या हुने गरेकोमा उक्त बाध्यता हटेको अध्यक्ष केसीको भनाइ छ।
यसै बिच पूर्वाधार विकास कार्यालय नवलपरासी पूर्वले एक वर्षको अवधिमा नवलपुरमा ३७ किलोमिटर सडक कालोपत्र गरेको छ । जिल्लामा आर्थिक वर्ष २०८०/०८१ मा पूर्वाधार कार्यालयले आफू मातहतमा रहेका विभिन्न सडक योजनामा अन्तरगत ३७ किलोमिटर सडक कालोपत्र गरिएको उहाँले बताउनुभयो । पूर्वाधार विकास कार्यालयले गत आर्थिक वर्षमा ३९ किलोमिटर नाला निर्माण गरेको छ । यस्तै ठूला तीनवटा मोटरवेल पुल निर्माण सम्पन्न गरेको कार्यालय प्रमुख अर्यालले बताए ।
पूर्वाधार कार्यालयले १२ वटा कलभर्ट/कजवे निर्माण गरेको छ। यस्तै तीनवटा झोलुङ्गे पुल निर्माण गरेको कार्यालय प्रमुख अर्यालले बताउनुभयो । गत वर्ष पूर्वाधार विकास कार्यालयले सडक निर्माण, मोटरवेल पुल, झोलुङ्गे पुल, कलभर्ट निर्माण सहितका बहुवर्षीय योजना सहित करिब एक सय १५ वटा योजना सम्पन्न गरेको उनले बताएका छन।