खोज

रुकुम पश्चिम स्थित चौरजहारी बिमानस्थल अझैसम्म सुचारु हुन सकेको छैन । नेपाल वायु सेवा निगमसँग पर्याप्त मात्रामा जहाज र पाइलट नभएको भन्दै गतवर्षको जेठ महिनादेखि यस विमानस्थलको हवाइसेवा बन्द गरिएको हो ।  लामो समयदेखि हवाई सेवा नियमित नहुँदा रुकुम लगायत छिमेकी जिल्ला जाजरकोट, सल्यान र डोल्पाका यात्रुहरू मर्कामा परेका छन् । अनिश्चित समयका लागि बन्द भएको हवाई सेवाका कारण जटिल प्रकृतिका बिरामी, गर्भवती महिला, बालबालिका तथा बृद्धबृद्धाहरू बढि मारमा परेका छन् । १४ महिना बितिसक्दा समेत यहाँको हवाई सेवा सुचारु नहुँदा स्थानीयबासीहरू चिन्तित हुँदै उक्त सेवालाई तत्काल सुचारु गर्न सम्बन्धित निकायलाई अनुरोध समेत गर्दै आएका छन् । नेपाल वायु सेवा निगम चौरजहारीका स्टेशन प्रमुख सुरेन्द्रबहादुर नेपालीले जहाज र जनशक्ति कम भएकाले चौरजहारी विमानस्थलमा हवाईसेवा बन्द भएको जानकारी दिए । तत्काल चौरजहारीमा हवाई सेवा सञ्चालन हुने कुनै जानकारी नभएको उनले बताए । देशका देश नमुना शहरको रूपमा विकसित बन्दै गरेको चौरजहारीमा लामो समयदेखि हवाई सेवा बन्द हुनुले स्थानीय जनप्रतिनिधिलाई समेत अन्योलमा पारेको छ । नगरपालिकाको मातहतमा हवाई सेवा नपर्ने भएकाले बन्द हवाई सेवालाई सुचारु गर्न जिल्लाका निर्वाचित सांसद, मन्त्री तथा अन्य नेतालाई आग्रह गरिएको नगरपालिकाका प्रमुख विशाल शर्माले बताए । नियमित हवाई उडानका लागि गुनासो अनुसारको काम र पहल भने कसैबाट हुन नसकेको उनले दुःखेसो गरे । वि.सं. २०२८ सालदेखि सञ्चालनमा आएको चौरजहारी विमानस्थलको २०७० सालमा धावनमार्ग स्तरोन्नति सहित कालोपत्रे गरिएको थियो । हवाई सेवा ठप्प हुँदा विमास्थलमा खटिएका सुरक्षाकर्मी र कर्मचारी कामविहीन हुनुका साथै विमानस्थल सुनसान बनेको छ । हवाईसेवा अवरुद्ध हुनअघि यहाँबाट हप्तामा एकदिन नेपालगञ्ज र एकदिन काठमाडौंका लागि उडान भर्दै आएको थियो ।