खोज

कपिलवस्तुमा कार्यरत संघसंस्थाले एक वर्षको अवधिमा २सय ७९ किशोरीलाई बेचिनबाट जोगाएका छन् । मानव बेचबिखन तथा ओसारपसार विरुद्ध कार्यरत शान्ति पुनस्र्थापना गृह र केआई नेपालले आर्थिक वर्ष २०७४।०७५ मा ती किशोरीहरुलाई उद्धार गरेका हुन् । गतवर्ष कपिलवस्तुमा कार्यरत संस्थाहरुले सीमा नाका तथा भारतबाट २३५ किशोरीहरुको उद्धार गरेका थिए । तर यसवर्ष थप ४४ गरी २७९ युवतीहरुलाई उद्धार गरेको तथ्यांक सार्वजनिक गरेका छन् ।गतवर्ष १२९ युवतीको उद्धार गरेको शान्ति पुनस्र्थापना गृहले यसवर्ष १५२ युवतीको उद्धार गरेको छ । भने केआई नेपालले गतवर्ष १०६ युवतीको उद्धार गरेकोमा यसवर्ष १२७ युवतीलाई आफन्तको जिम्मा लगाउन सफल भएको छ । गतवर्षको तथ्यांक हेर्दा मानव बेचविखन तथा ओसारपसारको घटना अझ बढ्दै गएको देखिन्छ । तर मानव बेचविखन विरुद्ध कार्यरत संघसंस्थाहरुले बेचबिखन तथा ओसार पसारका घटना रोक्न हरप्रयास गरेको दाबी गरेका छन् । सोझासाझा किशोरीहरुलाई बैदेशिक रोजगारीको प्रलोभन देखाई विचौलियाले भारततर्फ लैजाने क्रममा भारत तथा सीमाक्षेत्रबाट ती नेपाली किशोरीहरुलाई उद्धार गरी घर फर्काउन सफल भएको उनीहरुले जनाएका छन् । जिल्लाको कृष्णनगर सीमा क्षेत्रमा झण्डै एक दशकदेखि ती संघसंस्थाहरुले मानव बेचविखन, ओसारपसार तथा लैङ्गिक हिंसा विरुद्ध २४सै घण्टा सीमा निगरानी गर्दै आएका छन् ।अभिभावकको सल्लाहविना बैदेशिक रोजगारी वा विवाहको नाटक देखाई गैर कानुनी रुपमा किशोरीहरुलाई विचौलियाले भारत तथा तेस्रो मुलुक छिराउने गरेको संघसंस्थाहरुको प्रतिबेदनमा उल्लेख छ । शान्ति पुनस्र्थापना गृहको वार्षिक प्रतिबेदन अनुसार ३ हजार २ सय ५६ किशोरीलाई परामर्श दिएको छ । बेचबिखनमा परेकामध्ये ५ युवतीले बेचबिखन तथा ओसारपसार विरुद्ध प्रहरीमा मुद्धा दायर गरेका छन् । उद्धार गरिएकामध्ये ८२ जनालाई संस्थामार्फत परिवारको जिम्मा लगाएको संयोजक भूमिराज भट्टराईले जानकारी दिएका छन् । यस्तै ६८ जना किशोरीहरुलाई प्रहरीको जिम्मा लगाई सोधपुछपछि आफन्तलाई बुझाएको र दुई जनालाई पुनस्र्थापना केन्द्रमा राखी विभिन्न सीपमूलक कार्यमा लगाइएको संयोजक भट्टराईले जनाए ।मानव बेचबिखन मुक्त समाज निर्माणको परिकल्पना बोकी विगत एक दशकदेखि केआई नेपालले कृष्णनगरमा रही सीमा निगरानी गर्दै आएको छ । आर्थिक वर्ष २०७४।०७५ मा कृष्णनगर सीमानाका हँुदै भारततर्फ जाने २हजार बढी महिला तथा बालिकाहरुलाई सूचना सम्प्रेषण तथा परामर्श प्रदान गरेको जिल्ला संयोजक केशर विश्वकर्माले जानकारी दिए । केआई नेपालले उद्धार गरिएका १२७ चेलीहरुमध्ये १४ जनालाई सुरक्षित आवास गृह चितवन पठाइएको विश्वकर्माले बताए । आवास गृहमा चेलीहरुलाई जीवनप्रति सकारात्मक आशाहरु जगाई जीवन जीउन सक्षम र सबल बनाउन आयमूलक र नेतृत्वविकास कार्यक्रममा सहभागी गराएको विश्वकर्माको भनाई छ । नेपाल प्रहरीको सहयोगमा बिभिन्न समयमा बिचौलियाहरु नियन्त्रणमा लिई कानुनी दायरामा समेत ल्याएको उनले बताए ।जिल्लाको कृष्णनगर क्षेत्रमा कार्यरत संघसंस्थाहरु सीमा नाका, लिङ्कगेट र यात्रुगेटमा बिहानदेखि बेलुकासम्म सीमा निगरानीमा सक्रिय छन् । मानव बेचविखनका घटनामा न्यूनीकरण ल्याउन इलाका प्रहरी कार्यालय कृष्णनगर, अस्थायी प्रहरी चौकी लिंकगेट र सशस्त्र प्रहरीको पूर्ण सहयोग रहेको दुवै संस्थाका प्रमुखहरुले बताएका छन् ।à