खोज

काठमाडौं,३ साउन । नेपाली काँग्रेसका प्रदेश सभापतिहरूले प्रदेश समिति खारेज गर्न माग गरेका छन्। जिम्मेवारीविहीन बनाइएको भन्दै उनीहरूले प्रदेश समिति खारेज गर्न माग गरेका हुन्।​

बुधवार पार्टीको केन्द्रीय कार्यसमिति बैठकमा बोल्दै प्रदेश सभापतिहरूले यस्तो माग गरेका हुन्।​

बुधवार कार्यसमिति बैठकमा बोल्दै मधेश प्रदेश सभापति कृष्ण यादवले पार्टीको क्रियाशील सदस्यता अनलाइन प्रणालीबाट दिन नहुने धारणा राखेका छन्।

अनलाइन प्रणालीबाट दिँदा घुसपैठ हुनसक्ने भन्दै उनले यो विषयमा पुन:विचार गर्न माग गरे। त्यसैगरी उनले प्रदेश समितिलाई जिम्मेवारीविहीन बनाइएको भन्दै प्रदेशलाई उपेक्षा नगर्न आग्रह गरे।

प्रदेशलाई बाइपास गरेर कुनै जिम्मेवारी नदिने भए सातवटा प्रदेशमा संरचना किन बनाइयो यस्तो जिम्मेवारीहीन समितिलाई खारेज गर्दा हुन्छ भन्दै यादवले आक्रोश पोखरे ।

लुम्बिनी प्रदेश सभापति अमरबहादुर पुनले पनि काँग्रेसको संगठनात्मक कार्ययोजनामा प्रदेश समितिलाई जोड्ने काम नभएको भन्दै असन्तुष्टि व्यक्त गरे। उनले केन्द्रीय नेताहरूले प्रदेशलाई कमजोर बनाउन लागेको बताए।

बागमती प्रदेश सभापति इन्द्रबहादुर बानियाँले सरकार र पार्टीका बीचमा समन्वय हुन नसकेको बताए। उनले सरकार र पार्टीका बीचमा आपसी सहकार्य हुनुपर्नेमा जोड दिए। उनले नेपालको निर्वाचन प्रणालीदेखि नेपाली काँग्रेसले बोकिरहेको एजेण्डाको सम्बन्धमा पनि सोच्नुपर्ने आवश्यकता रहेको बताए।

उनले नेपाली काँग्रेसको कार्ययोजना र सांगठनिक तालिकामा प्रदेश समितिलाई नजोडिएको भन्दै असन्तुष्टि व्यक्त गरे।