खोज

चन्द्रौटा(कपिलवस्तु),  जेठ ।- कपिलवस्तुको विजयनगर गाउँपालिकाको एक विद्यालयका विद्यार्थी जोखिमपूर्ण यात्रा गर्नबाध्य भएका छन् । वडा नम्बर–१ अवस्थित आधारभूत विद्यालय थरौलीका विद्यार्थी जोखिम मोलेर विद्यालय आवतजावत गरेका छन् ।
हिउँदको समयमा जेनतन विद्यालय जाने विद्यार्थीहरु बर्खाको समयमा भने विदालय जानबाट बञ्चीत हुदै आएका छन् । कतिपय विद्यार्थीहरुले ज्यान नै जोखिममा राखेर खोला तरी विद्यालय जाने गरेको भएपनि अधिकांस सानो उमेरका बालवालिकाहरुभने बार्खामा विद्यालय नै जादैनन ।
चिरई खोलामा पुल नभएकैकारण बालबालिका विद्यालय जाँदा बर्खाको उर्लिदो विद्यार्थी जोखिम मोलेर खोला तर्छन् । वड नम्बर–५, ६ दालपुर, नौरंगया, छुट्पाटि, खजानिया, उज्ज्वलपुरका बालबालिका छुट्पाटी–थरौलीघाट जोड्ने पुल नहुँदा जोखिम यात्रा गर्ने गरेको स्थानीय बताउँछन् । कक्षा ६ मा अध्ययनरत अर्का विद्यार्थी बन्दना पालले चिरई नदीकै कारण कैयौं पटक कक्षामा उपस्थित हुन नसकेको उनी बताउँछिन् । “नदी तर्दा कहिले काहिँ त पाठ्यपुस्तक नै लगायत बग्ने, भिज्ने गरेको छ’ ः उनले भनिन् ।
पटकपटक पुल माग गर्दा समेत सम्बन्धित निकायको ध्यान नदिँदा वर्षातको समयमा खोला तर्न जोखिम मोल्नु परेको बाध्यता रहेको शिक्षिका जसमती यादवले बताइन् । उनले भनिन् ः “पुल नहुदाँ विद्यार्थीहरूको पठनपाठन नै प्रभावित हुने गरेको छ ।“ यादवले थपिन ः “ पुल नहुदाँ विद्यार्थीहरुले जोखिम मोलेर खोला पार गर्छन, कहिले काहीँ पढाइ सुरु भैसकेपछि मात्रै विद्यालयमा उपस्थित हुन्छन्, जसले गर्दा उनीहरुलाई अध्ययनमा समस्या हुने गर्दछ ।“
खोलामा पुल नहुँदा स्थानीयलाई आवतजावत गर्न समस्या हुना थालेको छ । अधिकांश विद्यार्थी खोला तरेर विद्यालय पुग्ने गर्छन् । वर्षौदेखि पुल नहुँदा स्थानीयले ज्यानकै बाजी लगाएर खोला तर्नुपर्ने बाध्यता रहेको छ । हिँउदको समयमा जोखिम कम हुने भएपनि बर्षातको भेलमा खोला तर्न निकै सकस हुने गरेको स्थानीय कृष्ण पौडेल बताउँछन् ।
खोलाकै कारण बालबालिकालाई विद्यालय पठाउन समेत समस्या हुने गरेको अभिभावक अनिल थारुले बताए । विद्यार्थीहरु मात्रै होइन्, यहाँका स्थानियहरुले पनि घाँस दाउरा, मेलापात चिरई नदि तरेर गर्नुपर्ने बाध्यता छ’ उनले भने । बर्षातको समयमा आधा बढी विद्यार्थी विद्यालयमा अनुपस्थित हुने गरेको उनको भनाइ छ ।
विद्यालयका प्रधानाध्यापक तुल बहादुर सारुले भौगोलिक रुपले खोलाको किनारमा रहेको बताउँदै यस क्षेत्र दुर्गममा रहेको दावी गरे । उनका अनुसार विद्यालयमा करिब ५ सय विद्यार्थी अध्ययन गर्न आउने गरेको छन् । जसमध्ये २ सय ६५ विद्यार्थी पारीबाट वारी विद्यालय आउने गरेको छन् ।उक्त खोलामा पुलकालागि पटकपटक सम्बन्धित निकायमा ढोका ढकढक्याउन पुगेको स्थानीय बताउँछन् । तर यसतर्फ स्थानीय, प्रदेश तथा केन्द्र सरकारको खासै ध्यान नगएको गुनासोसमेत गरेका छन् । यता गाउँपालिका अध्यक्ष गोपाल बहादुर थापाले पुल निर्माण खर्चिलो भएको हुनाले प्रदेश र केन्द्र सरकारसँग पहल गरेको जानकारी दिए ।