खोज

बुटवल,५ बैसाख ।   बुटवल र भैरहवामा ह्वात्तै गर्मी बढेको छ । मंगलबार भैरहवा र नेपालगन्जमा नेपालमै सबैभन्दा धेरै ४४ डिग्री सेल्सियस तापक्रम मापन भएको छ । दिउसो २ बजेर १८ मिनेटको तापक्रम मापन अनुसार भैरहवामा नेपालमै सबैभन्दा धेरै ४४ डिग्री र  बुटवलमा ४० डिग्री सेल्सियस तापक्रम छ ।  विश्वव्यापीरुपमा विश्वसनीय मानिने एक्कुवेदर डटकमका अनुसार बढ्दो तापक्रमका कारण बुटवलको हावाको गुणस्तर एकदमै खराब (नाजुक) देखिएको छ ।

यस्तै भैरहवा र नेपालगन्जको हावाको गुणस्तर अस्वस्थकर देखिएको छ ।
धनगढी र बीरगन्जको तापक्रम समान ४३, जनकपुरको ४२ र काठमाडौंको ३१ डिग्री सेल्सियस रहेको छ । आज दिउसो तानसेनको तापक्रम ३८ र मुस्ताङको डिग्री सेल्सियस रहेको एक्कुवेदर डटकमले देखाएको छ ।
काठमाडौंको हावाको गुणस्तर पनि नाजुक (खराब) छ ।

तातो हावाले वायु प्रदुषण हुने र यसले बालबालिका, बृद्धबृद्धा र विरामीको श्वास प्रस्वासमा असर पुर्‍याउने चिकित्सकहरु बताउंछन् ।
यस्तो गर्मीमा अत्यावश्यक काम वाहेक घर बाहिर ननिस्कन, निस्कुनु परे छाता ओढेर हिंड्न र प्रशस्त पानी पिउनुपर्ने सुझाव फिजिसियन डाक्टर नन्दु पाठकको छ ।

बढ्दो गर्मीसंगै झाडा पखाला,लगायतका मौसमी रोगहरुको संक्रमण बढ्ने भएकाले स्वास्थ्यमा विशेष सतर्कता अपनाउनुपर्ने डा. पाठकको सुझाव छ ।
प्रदेश वन तथा वातावरण मन्त्रालयका वातावरण निरीक्षक निर्मल चौधरीले अघिल्लो वर्षको तुलनामा यस वर्ष छिटै गर्मी (तापक्रम) बढेको  बताए ।

मानवीय व्यवहार र गतिविधि,उद्योग,कल कारखानाले तापक्रम बृद्धि र वातावरणमा असर गर्ने बताउंछन् । फोहोर मैलाको उचिव व्यवस्थापन नहुंदा पनि हावा प्रदुषित हुने उनले बताए । जंगलमा आगलागीका घटनाले पनि वायु प्रदुषण र तापक्रम बढ्नमा भूमिका खेलेको चौधरीले बताए ।
तीनै तहका सरकारले मौसम र वातावरणीय सचेतनामा उचित ध्यान दिई नागरिकलाई सुरक्षित बनाउन ध्यान दिनुपर्ने चौधरीको सुझाव छ ।