खोज

चुनावको समयमा विभिन्न दलहरुवाट उमेद्वार बनेका सबैजसो उमेद्वारहरुको प्राय एउटै नारा बनेको थियो ‘एक घर एक धारा’ । यही नारालाई अघि सारेर स्थानीयहरुको मत कसरी आफुतिर तान्ने भनेर दलका उमेद्वारहरुलाई चुनावी अभियानमा निकै कसरत गर्नु परेको थियो । गत वर्ष सम्पन्न तीन वटै तहका चुनावका उमेद्वारहरुको प्रमुख नारा पनि यही नै थियो
उनीहरुको यो नारावाट धेरै नागरिकहरु आशावादी बन्दै उक्त नारावाट प्रभावित पनि भए । सधै खाईपिइ आएको धारामा पानी खस्ने नखस्ने शंका र आशंकाकाबिच यो नारा पुरा गर्न जनप्रतिनिधीका लागि यतिवेला निकै चुनौतीको बिषय भएको छ । तर केहि स्थानीय तहमा यो नारा पुरा हुँदै जान थालेपछि नागरिकका मनमा आजभोली थप आशा पलाउन थालेको छ ।
नागरिकले लामो समय स्थानीय सरकार र जनप्रतिनिधिको अनुभुति गर्न पाएनन् । जसका कारण गाउँको विकास सोचे अनुसार अगाडी बढ्न सकेन् । अहिले स्थानीय तहहरु योजनाका साथ योजना र बजेट अगाडी बढाईरहेका छन् । चुनावको समयमा जनतासँग गरेका वाचाहरुलाई सम्झदै जनप्रतिनिधिहरु उक्त वाचा पुरागर्न शुरु गरेका छन् ।
मालिका गाउँपालिकाले घमिरको वार्ड नम्बर ७ अन्र्तगत कुमाल गाउँबाट यो अभियान शुरु गरेको थियो । अहिले भर्खरै कुमाल गाउँ खानेपानी योजना माार्फत ४५ घरधुरीमा धारा निर्माण गरी खानेपानी पु¥याएका वडाध्यक्ष बेद प्रसाद पन्थीले बताए । सोहि गाउँपालिकाको वडा नं ४ अर्खबाङ्गको घडेरीमा घडेरी खानेपानी आयोजना सुरु भई हाल ४९ वटा धारा बनिसकेका छन् ।
आर्थिक बर्ष ०७५÷७६ मा खानेपानीको क्षेत्रमा मात्रै गाउँपालीकाले ७० लाखभन्दा बढी रकम विनियोजन गरेको गाउँपालिकाका प्रवक्ता एवं वडा नम्बर ६ का अध्यक्ष शोभाखर गिरीले जानकारी दिएका छन् । घरमै पानी आएपछि सोहि स्थानकी माया कुमाल आफैमा यतिवेला दंङ्ग छन् । ‘खोलामा गएर पानी ल्याउँथे, धारामा पानी थाप्दा पिटापिट समेत हुन्थ्यो,’ उनले भनिन्,‘घरमै धारो खस्ला भनेर सोचेकी पनि थिईन ।’
त्यस्तै धुर्कोट गाउँपालिका वडा नम्बर ४ जैसिथोकमा जैसिथोक लिफ्टिङ्ग खानेपानी आयोजना मार्फत ९३ घरमा एक घर एक धारा जडान गरिएको छ । भने वडा नं ६ धुर्कोट रजस्थल चौरका २३ घरमा एक घर एक धारा र कमेरे पानीमा २७ घरधुरिमा खानेपानी पुगेको छ, भने एक सय ३३ घरधुरीलाई पुग्ने गरी अर्को योजना छिट्टै संचालनमा आउने पोखरेलले जानकारी दिएका छन् ।
आर्थिक बर्ष ०७५÷७६ मा गाउँपालिकाले यो अभियानकै पूर्णताका लागि एक करोड ५० लाख विनियोजन गरेको गाउँपालिकाका प्रमुख प्रसासकीय अधिकृत लोकहरी थापाले बताए ।
मुसिकोट नगरपालिका वडा नम्बर ६ स्वाँरामा गोर्खा वेल फेयरको सहयोगमा ४२ घरमा धारा पहिलेदेखि नै संचालनमा छन् । वडा नम्बर ९ उर्लेनीमा पहिलेदेखि नै पश्चिम नेपाल ग्रामिण खानेपानी तथा सरसफाई परियोजनाको सहयोगमा ३५ घरधुरीमा सेवाले घरघरमै खानेपानी पिउँदै आएको नगरपालिकाका प्रमुख प्रसासकीय अधिकृत घनश्याम न्यौपानेले बताएका छन् ।
नगरपालिकाले वार्ड नम्बर २ देउरालीको सौरपाटामा एक सय ८१ घरधुरीलाई पुग्ने गरी खानेपानी योजना संचालनमा ल्याएको छ । आउँदो असोजमा निर्माण सकिने छरधारा बाङ्गे खिफ्टिङ खानेपानी योजना निर्माण भैरहेको छ । जसबाट एक सय ८४ घरधुरि लाभाम्बित हुने मुसिकोट नगरपालिका प्रमुख सोमनाथ सापकोटाले बताए ।
त्यस्तै वडा नम्बर ६ भुवाचिदिमा बेल्टारी भुवाचिदि खानेपानी योजना, ठूलापधेरा दासिकोट खानेपानी योजना र खस्थोक खानेपानी योजना निर्माणको काम पनि भैरहेको सापकोटाले जानकारी दिनु भयो । उक्त योजना सम्पन्न हुँदा तीन सय ४३ घर परिवारमा खानेपानी पुग्ने लक्ष्य नगरपालिकाको छ
आर्थिक बर्ष ०७५÷०७६ मा खानेपानीका लागि नगरपालिकाले तीन करोड रकम बिनियोजन गरेको छ । जिल्लाका रेसुंगा नगरपालिका इस्मा, मदाने लगायतका गाउँपालिकाले पनि एक घर एक धारा अभियान अन्र्तगत ५० लाखदेखि तीन करोड रुपैंयासम्म बजेट बिनियोजन गरेर काम गरिरहेको बताईएको छ ।

Photo: File sourse Google