खोज

 प्रदेश नं ५ को एक मात्र प्रतिस्पर्धी अमित बराल नेपाल आईडलको उत्कृष्ट ६ मा पर्न सफल भएका छन् । रूपन्देही सैनामैना ४ मुर्गियाका २४ वर्षीय बराल नेपाल आईडलको टप ६ मा आफ्नो मेहनत र संगीतप्रेमी श्रोतादर्शकको माया र साथका कारण उत्कृष्ट ६ पर्न सफल भएका हुन् । उनले नेपाल आइडलको सुरुवात देखि नै सबैको मन जितेका छन् । आइडलमा एक चोटी ‘पफर्मेस अफ द डे’ बनिसकेका बरालले क्लासिकल र पप शैलीका गीत बढी मन पराउने गर्दछन् ।
गायन प्रतिभाको खोजीका लागि बहुप्रतीक्षित मानिएको ‘नेपाल आइडल’मा अमितले पैसा होइन पासो छ, परदेशमा बोलाउँदै छन् आफन्तले स्वदेशमा भन्ने ‘पन्छी’ गित मार्फत उत्कृष्ट प्रस्तुति प्रस्तुत गर्दै निर्णयक सहित देश विदेशमा रहने सम्पुर्ण नेपालीहरूलाई गीत मार्फत रुवाएका थिए । यसैगरी उनले तिम्रो हर प्रश्नको जवाफ मेरो चिट्ठी हरूमा खोज्नु, यदि चित्त तिमिलाइ बुज्दैन भने मेरो सामुन्ने आएर सोध्नु, तानसेन घमाईलो बाबुको जुँगो लगायतका गीतहरूमा उत्कृष्ट प्रस्तुति दिएका छन् ।
उत्कृष्ट ६ मा पुगेका अमित सामाजिक संजालमा पनि उत्तिकै चर्चित छन् । उनको जिउडाल, अनुशासन, मिलनसार र लज्जालु स्वभावले धेरै युवा युवतीहरू उनको शुभचिन्तक बनेका छन् । बरालको सामाजिक संजालमा फ्यान फलोवर्स पनि राम्रै छ । अहिले कलेज, स्कुल, कार्यालय, सार्वजनिक यातायात, चिया पसलदेखि हरेक जमघटमा अमितको चर्चा हुन थालेको छ । प्रत्येक बिहीबार बेलुका ८ः३० बजे एपी वान टेलिभिजनमा प्रसारण हुने नेपाल आइडलको टप ६ मा पुगेका अमितलाई जिताउन यतिबेला भोटको आवश्यक परेको छ । अमितका बुवा जिवन बरालले पुख्र्याैली थलो पाल्पा, नवलपरासी र रूपन्देहीमा भोटका लागि पहल गरिएको बताए । साथै उनले प्रदेश नं ५ को एक मात्र प्रतिस्पर्धी अमित भएकाले प्रदेश नं ५ सँगै देश तथा विदेशमा रहने सम्पूर्णलाई भोटका लागि अपिल गरेका छन् ।
अमितलाई नेपाल आइडल सिजन २ बनाउन म्यासेजमा ०१ टाइप गरी ३१००९ मा पठाउनु पर्नेछ । देश र बिदेशबाट रेष्पेक्ट एण्ड राईज एप बाट पनि भोट गर्न सकिने छ ।
२०५१ साल असोज २ गते नवलपरासीको बर्दघाटमा जन्मिएका अमित बराल सैनामैनाबासी हुन् । बरालको परिवार पुख्र्याैली थलो पाल्पादेखि २०४० सालमा नवलपरासी बसाई सरेको थियो । २४ वर्षीय अमितका बुवा जीबन बराल विगत १७ वर्षदेखि रोजगारीको शिलशिलामा कतारमा काम गर्दै आएका छन् भने आमा सीता बराल गृहिणी हुन् । बुवा अहिले विदाको समयमा घरमै छन् । अमित माईलो छोरा हुन् भने एउटा बहिनी र भाइ छन् ।
२०६५ सालमा आफ्ना दाजु सुमित बरालको असमायिक निधन भयो । निधन पश्चात मात्र अमितले दाजुले गीत संगित प्रति देखाएको लगावको सिको गर्दै स्व.दाजुको सपना पुरा गर्न तल्लिन हुन थाले । उनी नवलपरासी आईडलको टप ५ मा पर्न समेत सफल भए । यो सँगै उनले बर्दघाटमा रहँदा नै सांगीतिक करिअर सुरु गरे । लुम्बिनी कला केन्द्र बुटवलमा २ वर्षसम्म संगीत सिकेका थिए । उच्च माध्यमिक विद्यालयको पढाइ सकिएसँगै काठमाडांैमा पनि उनले केही समय संगित शिक्षा लिएका थिए ।