खोज

 रूपन्देहीका ओमसतिया गाउँपालिका वडा नम्बर ५ मा रहेको ओमसतिया श्रीरामजानकी मन्दिरमा लाग्ने मेलाको व्यवस्थापनमा गाउँपालिकाले चासो देखाएको छ ।
यस अघि बिभिन्न ब्यक्तिहरू मिलि मेला ब्यवस्थापन गर्दै आए पनि अहिले गाउँपालिकाले उक्त मेला आफै ब्यवस्थापन गर्ने भएको छ । प्रत्येक कार्तिक शुक्ल पूर्णिमाको दिन यस स्थानमा मेला लाग्ने गरेको छ । प्राचीन र नामुद यस मेलामा रूपन्देही मात्र हैन छिमेकी जिल्ला नवलपरासी, कपिलवस्तु र भारतबाट समेत श्रद्धालुहरू यहाँ मेला भर्न आउने गरेका छन् । नजिकैको रोहिणी खोलामा स्नान गरि सतिया माई संग मागेको मनोकामना पूर्ण हुने विश्वासका साथ मेलामा लाखौ दर्शनार्थीहरूको घुइँचो लाग्ने गरेको हो ।यस पटकको मेला गाउँपालिकाले आफ्नै ब्यवस्थापनमा गर्ने भए पछि मेला थप ब्यवस्थित र पारदर्शी हुने ब्यवस्थापन समितिले पत्रकार सम्मेलनको आयोजना गरि बताएका छन । समितिको आयोजनामा यही मंसिर ७ गते कार्तिक शुक्ल पूर्णिमाको दिन मेला, मंसिर ८ र ९ गते कुस्ती दंगल र मंसिर १ गते देखि ७ गते सम्म सांस्कृतिक कार्यक्रम हुने भएको हो । प्राचिनकाल देखि धार्मिक तथा ऐतिहासिक महत्व बोकेको ओमसतियामाई श्री रामजानकी मन्दिरको अदभुत शक्तिको रूपमा चिनिने र आफ्नै पहिचान रहेको हुँदा सदिऔं देखि कार्तिक शुक्ल पूर्णिमाको दिन हुने मेलामा देशविदेशबाट श्रद्धालु भक्तजनहरूको घुँइचो लाग्ने गरेको मन्दिर व्यवस्थापन समितिका अध्यक्ष तथा ओमसतिया गाउँपालिकाका अध्यक्ष हिरा केवट (राहुल) ले बताए । ओमसतियामाई मन्दिरलाई धार्मिक पर्यटकीय स्थलको रूपमा स्थापित गर्न गाउँपालिकाले गुरुयोजना बनाउने क्रममा रहेको उनले बताए । त्यस्तै मन्दिर आसपास रहेका क्षेत्रमा कृषि बजार व्यवस्थापनको परिकल्पना समेत गाउँपालिकाले गरेको केवटले जानकारी दिए । साढे ३ सय वर्ष पुरानो ओमसतियामाई मन्दिर राष्ट्रिय सम्पदामा सुचीकृत हुन नसक्नु दुःखद हो, त्यसका लागि गाउँपालिकाले पहल गर्दैछ, उनले भने ।देशविदेशबाट पहलमानहरूको सहभागिता रहने कुस्ती प्रतियोगितामा प्रथम पुरस्कार रु. ७० हजार, द्धितीय ३५ हजार, तृतीय २० हजार, २ जोडीकोे १५ हजार, ५ जोडीको १० हजार, १० जोडीको ५ हजार, १० जोडीको २ हजार र १ हजार राखिएको ओमसतिया गाउँपालिकाका प्रवक्ता एवं वडा नम्बर ६ का वडाअध्यक्ष शिव कुमार धवलले बताए ।à