खोज

पार्टि एकताको सन्देश प्रदान गर्न नेपाल कम्युनिष्ट पार्टी (नेकपा) रूपन्देहीको आयोजामा ६० हजार कार्यकर्ता उतार्ने तयारी गरिएको छ । आगामी शनिवार बुटवलमा हुने सन्देश सभा तथा शुभकामना कार्यक्रमको तयारी तिब्र पारिएको छ ।
पार्टी अध्यक्षद्वय प्रधानमन्त्री केपी शर्मा ओली र पुर्व प्रधानमन्त्री पुष्प कमल दाहाल तथा महासचिव एवं रूपन्देही क्षेत्र नम्वर २ का प्रतिनिधि सभा सदस्य बिष्णु पौडेलले बिजया दशमी, दीपावली, छठ तथा नेपाल सम्वतका अवसरमा आयोजना हुने सभा तथा शुभकामना कार्यक्रमलाई कार्तिक १७ गते बुटवलमण्डपमा सम्बोधन गर्ने छन् ।
नेकपा रूपन्देहीले बुधवार बिहान बुटवलमा आयोजना गरेको पत्रकार सम्मेलनमा पार्टी कार्यदलका सदस्य तथा बुटवल उपमहानगरपालिकाका प्रमुख शिवराज सुवेदीले कार्यक्रममा अध्यक्षद्वय र महासचिवले मुलकको समसामयिक राजनीति र पार्टी नेतृत्वले गरीरहेका काम र मुलुकलाई अघि बढाउने सम्वन्धमा अघि सारिएका योजनाका सम्वन्धमा जानकारी दिने बताए ।
नेकपाले रूपन्देहीका १६ वटै स्थानीय तहमा समिति गठन गरी प्रचार प्रसार र कार्यकर्ता परिचालन गरेको छ । सबै स्थानीय तहले कम्तीमा ५ हजारदेखि २० हजारसम्म कार्यकर्ता उतार्ने तयारी गरेको नेकपा रूपन्देही कार्य दलको सदस्य निर्मल जिसीले जानकारी दिए । रूपन्देही जिल्लाका स्थानीय तहबाट ६० हजार र आसपासका जिल्लाहरूबाट करिव ४० हजार गरी करिब १ लाखको सहभागिता रहने अनुमान गरिएको छ ।
नेकपाका नेता तथा प्रदेशका उद्योग पर्यटन, वन तथा वातावरण मन्त्री लिला गिरीले सभालाई ऐतिहासिक बनाउन सबैलाई सहयोगका लागि आग्रह गरे । नेकपाका केन्द्रिय सदस्य तथा प्रदेश सभाका सदस्य दधिराम न्यौपानेले पार्टी अध्यक्षद्वय नै कार्यक्रममा सहभागी हुने भएकाले कुनै भ्रममा नपर्न अनुरोध गरेका थिए ।