खोज

बुटवल । प्रदेश नं ५ का आन्तरीक मामिला तथा कानून मन्त्री कुल प्रसाद केसीले रुपन्देही रुद्रपूरकी वालिका समिक्षा ठकुरीको रहस्यमय मृत्युको घटनालाई प्रदेश सरकारले महत्वका साथ अनुसन्धान गरिरहेको बताएका छन् ।
मंगलबार बसेको प्रदेश नं ५ को प्रदेश सभा बैठकमा सांसदहरुले उठाएका प्रश्नहरुको जवाफ दिदै मन्त्री केसीले समिक्षा मृत्युको घटनाको अनुसन्धान गर्न स्थानीय प्रहरी कार्यालय भन्दा एक तह माथिको निकायले छानबीन गरिरहेको जानकारी गराए ।
सोमबार बसेको प्रदेश सभा बैठकको शुन्य समयमा बोल्दै महिला सांसदहरुले १६ वर्षिया किशोरी समीक्षा ठकुरीको रहस्यमय मृत्यु घटनाको बारेमा सत्य तथ्य पत्ता लगाएर दोषिलाई कार्वाही गर्न माग गरेका थिए ।
समीक्षा ठकुरीको रहस्यमय मृत्यु महिला हिंसाको चरम उत्कर्षको उदाहरण भएको भन्दै सांसदहरुले महिला हिंसा घटनाका मुद्धा सहज रुपमा दर्ता समेत नहुने गरेको भन्दै त्यस्ता मुद्धा सहज रुपमा दर्ता गर्ने व्यवस्था मिलाउन समेत प्रदेश सरकारको ध्यानाकर्षण गराएका थिए ।
मंगलबारको बैठकमा सांसदहरुले कार्य व्यवस्था परामर्श समितिले निर्णय गरे बमोजिम सदन सञ्चालन गर्न माग गरेका छन् ।
प्रदेश सांसद रमा अर्याल र तारा जिसी ले कार्य व्यवस्था समितिले एउटा निर्णय गर्ने तर संसदमा अर्कै विषयमा छलफल हुने गरेको भन्दै कार्य व्यवस्था परामर्श समितिले तय गरे बमोजिम सदन सञ्चालन गर्नुपर्नेमा जोड दिए ।
त्यसैगरी मंगलबारको बैठकमा विशेष समय लिएर बोल्दै नवलपरासीका सांसद बैजनाथ कलवारले गौतम बुद्धको मावली स्थल रुपन्देहीको देवदह नभएर नवलपरासीको रामग्राम स्थित पण्डीतपुर भएको दाबी गरे ।
गौतम बुद्धको मावली स्थल इसा पुर्व ५०० बर्ष अगाडी कोलीय राजाद्धारा निर्मीत रामग्राम स्तुप रहेको स्थान भएको विभिन्न सोध र अनुसन्धानले देखाएको दाबी गर्दै सांसद कलवारले विभिन्न समयमा भएका उत्खनन् र अनुसन्धान प्रतिवेदन समेत प्रदेश सभालाई हस्तान्तरण गरे ।
प्रदेश सभाको मंगलबारको बैठकमा यस अघिको बैठमा सांसदहरुले उठाएका प्रश्नहरुको भौतिक पुर्वाधार तथा विकास मन्त्री बैजनाथ चौधरी,उद्योग पर्यटन वन तथा वातावरण मन्त्री लिला गिरीले जवाफ दिएका थिए ।प्रदेश सभामा प्रदेशका मुख्य न्यायधिवक्ताको काम, कर्तव्य र अधिकार तथा अन्य सेवा र सर्तहरुको बारेमा व्यवस्थागर्न बनेको विधेयक र प्रदेश लोक सेवा आयोगको काम कर्तव्य र अधिकार सम्बन्धी विधेयकमाथी शैद्धान्तिक छलफल भएको थियो । बैठकमा सांसदहरु चेतनारायण अर्याल,तुलाराम घर्ती मगर,सहषराम यादव छलफलमा सहभागि भएका थिए ।