खोज

नेपालीहरूको मुख्य पर्व दसैं आउनै लाग्दा बजारमा दैनिक उपभोग्य वस्तु खाद्यान्नको मूल्य एकाएक बढ्न लागेको छ । अहिले बजारमा आटा, मैदा, चिनी र तेलको मूल्य बढी रहेको छ । १५ दिनमा दैनिक उपभोग्य बस्तुको मूल्य प्रतिकेजीमा ५ देखि १५ रूपैयाँसम्म बढेको छ । केहीदिनदेखि उद्योगले मुल्य बढाउँदै डिलर र बिक्रेताहरूलाई खाद्य सामग्री पठाइरहेका छन् । बुटवल उद्योग वाणिज्य संघका पूर्व सदस्य तथा पुराना खाद्यान्न व्यवसायी लोकनाथ पाण्डेका अनुसार केही दिनअघि ५ किलोको १ सय ७५ रूपैयाँ पर्ने घडि आटा अहिले २ सय रूपैयाँमा पुगेको छ । १ सय ६५ रूपैयाँको घराना आटा १ सय ९५ रूपैयाँ पुगेको छ । प्रति क्युण्टल ३ हजार ८ सय ५० रूपैयाँ पर्ने आटा अहिले ४ हजार ५ सय रूपैयाँमा पुगेको छ । त्यस्तै प्रति १० पोका १ हजार ३ सय ५० मा पाइने स्थानीय तोरीको तेल १ हजार ६ सय, धारा तोरीको तेल १ हजार ९ सयबाट २ हजार १ सय र १ हजार १ सयमा पाइने भटमासको स्थानीय तेल १ हजार २ सय तथा १ हजार २ सयमा पाइने स्वस्तिकको १ हजार ३ सय ५० रूपैयाँ पुगेको छ । त्यस्तै प्रति क्वीन्टल ६ हजार ३ सयमा पाइने चिनी अहिले ६ हजार ७ सय रूपैयाँ पुगेको छ ।
बुटवल भैरहवा जस्ता बजार क्षेत्रमा भन्दा पनि पहाडी र दुर्गम क्षेत्रमा अहिले बढेको मुल्यले बढी असर पार्ने पाण्डेले बताए । खाद्य बस्तुको संगै गाडी तथा ढुवानी भाडा बढेको छ यो सबै जोडेर व्यवसायीले नयाँ मूल्य तोक्दा मुख्य पर्वमा उपभोक्ता मारमा पर्ने पाण्डेले बताए ।
प्रायः सबै व्यवसायीले सरकारले इन्धनको मूल्य र सवारी तथा ढुवानीको भाडा बढाएकाले मूल्य बढेर आएको ग्राहकहरूलाई बताउने गरेका छन् । बुटवलका सबै खाद्यान्न व्यवसायीले मूल्य बढाएका छन् ।
उद्योगीहरूले भने नेपालमा इन्धन र यातायातको भाडा बढेर नभई भारतमा गहँु र तोरीको मूल्य बढेकाले नेपालमा खाद्यान्नको मूल्य बढेको बताएका छन् । नेपालको गहँु र तोरीले नपुग्ने भएकाले भारतबाट ल्याउँदा दुवैको मूल्य बढेकाले मुल्य बढाउन बाध्य भएको उद्योगीहरूले बताएका छन् । बुटवल फलोर मिलका अध्यक्ष राजेन्द्र वझाले नेपालको गहुँले आधा पनि नपुग्ने र भारतबाट ल्याउँदा भारतमा मूल्य बढेकाले नेपाली उद्योगहरूले आफना उत्पादनको मूल्य बढाउन बाध्य भएको बताए । उनका अनुसार गत महिनासम्म प्रति क्युण्टल २ हजार ७ सय रूपैयाँमा आउने गहु ँअहिले बढेर करिब ३ हजार ५ सय पुगेको छ । सरकारले स्वदेशी उत्पादनलाई प्रवद्र्धन गर्न भन्दै चिनीको आयातमा कोटा तोकेपछि चिनिको मुल्य पनि बढेको छ । थोकमूल्य बढेपछी व्यवसायीहरूले पनि मुल्य बढाएका छन ।
मूल्य बृद्धिसँगै बजारमा अखाद्य बस्तुको बिक्री बितरण पनि बढन थालेको छ । मूल्य बढ्दा बजारमा म्याद सकिएका र गुणस्तरहिन बस्तुको बिक्री पनि सस्तो मूल्यका नाममा बिक्री हुने गर्दछ । दशैंमा अखाद्य बिक्रि हुन नदिन संयुक्त बजार अनुगमन समिति रूपन्देहीले बजार अनुगमनलाई तिब्र बनाउने भएको छ । रूपन्देहीका सहायक प्रमुख जिल्ला अधिकारी तथा संयुक्त बजार अनुगमन समितिका संयोजक नारायण पाण्डेले बजार अनुगमनलाई दशैमा प्रभावकारी बनाउने बताए । उनले मूल्य बृद्धिका सम्वन्धमा पनि प्रशासनले अनुसन्धान गर्ने बताए । पाण्डेले भने अत्यावश्यक वस्तुमा २० प्रतिशतभन्दा बढी नाफा खान नपाइने कानुनी व्यवस्था भएकोले त्यसको पनि कडाई गर्ने छौ ।à