खोज

स्वाधिन अर्थतन्त्रको लागि औद्योगिकरण तथा व्यापार विविधिकरण भन्ने मुल नाराका साथ असोज १९ गतेदेखि बुटवलमा संचालन हुन लागेको तेश्रो राष्ट्रिय औद्योगिक प्रदर्शनी तथा व्यापार मेलाको स्टल बुकिङ कार्य अन्तिम चरणमा पुगेको छ । परनिर्भर अर्थतन्त्रलाई आत्मनिर्भर अर्थतन्त्रमा रूपान्तरण गरी कुटिर साना तथा घरेलु उद्योगलाई प्रोत्साहन गर्ने उद्देश्यले मेला आयोजना गरिएको आयोजकले जनाएका छन् ।
विभिन्न पेभिलियन गरी ४ सय भन्दा वढि स्टल रहने उक्त प्रदर्शनीमा करिव ३ सय ५० स्टल दर्ता भई सकेको स्टल दर्ता व्यवस्थापन उपसमितिका संयोजक गोविन्द प्रसाद गैरेले जानकारी दिए । पूर्व मेची देखी पश्चिमका विकट पहाडी जिल्लाहरूको बाट समेत स्टल दर्ता गराउन उद्योगी व्यवसायीहरू बुटवल मण्डपमा आएका छन् ।

तराई देखि हिमाल सम्मका उत्पादनहरूको एकै ठाउँमा प्रदर्शन गरी तिनको प्रवद्र्धन गराउने गरी स्टल दर्ता गरिएको संयोजक गैरेले जानकारी दिए । स्टलमा विविधिकरण गर्ने प्रयास गरेका छौ । उनले भने– एउटै थलोमा तानमा बुनिने पाल्पाली ढाका, कारागारका कैदीवन्दीले तयार गरेका हस्तकलाका सामाग्री, उच्च पहाडी जिल्लामा उत्पादीत अल्लो, इन्जिनियरिङ तर्फ नमुना हाईड्रो पावर देख्न पाइने छ ।’
उनका अनुसार प्रदर्शनीमा घरेलु तथा साना उद्योगका उत्पादनहरूलाई प्रोत्साहन गरिएको छ । दैनिक उपभोग्य वस्तुको लागि खाद्य पेभिलियन, दशैं बजारको लागि दशैं स्पेशल पेभिलियन, अटो पेभिलियन, कृषि पेभिलियन, गार्मेट पेभिलियन, सूचना प्रविधि पेभिलियन राखिने छ ।
स्टल निर्माण कार्य पनि तिव्रगतिमा अघि वढेको छ । ८० प्रतिशत स्टल निर्माण कार्य सम्पन्न भएको उद्योग व्यापार संघ बुटवलका अध्यक्ष एवं मुल आयोजक समितिका संयोजक प्रविण पाठकले जानकारी दिए । उनका अनुसार ४ दिन भित्र स्टल निर्माणको काम पुर्ण रूपमा सम्पन्न हुने छ । मेला स्थलमा इन्टरनेट टेलिफोन, फ्याक्स, पार्किङ, प्राथमिक उपचार पिउनेपानी, सुरक्षाको लागि सिसिटिभी सहितको शुरक्षा व्यवस्था मिलाईएको आयोजकले जनाएका छन् ।
प्रदर्शनीलाई कसरी आकर्षक र फरकपनि दिन सकिन्छ भनेर आयोजक योजना बनारहेका छन । संघका पुर्व अध्यक्ष एवं मेलाका संरक्षक खिमनारायण पराजुलीले प्रदर्शनीलाई विगतको भन्दा बढि आकर्षक तथा दर्शक उपभोक्तालाई सहज र सर्वसुलभ गराउने गरी काम भईरहेको बताए । प्रदर्शनी आउने दर्शकले ९ तले धरहरा हेर्न र चढेर त्यसै फर्कन पाउने छैनन  लोपोन्मुख चर्खे (रोटे) पिङ र लिङगे पिङको मज्जा लिन समेत पाउने छन् । प्रदर्शनीमा लोपोन्मुख रोटे पिङ राखिने भएको हो । यो पिङ पहाडी जिल्लामा खेलिने भएपनि अहिले लोप हुने अवस्थामा छ ।
त्यसैगरी दर्शकले लिङ्गे पिङको मजा पनि लिन पाउनेछन । मेला भित्र प्रवेश गर्दा दशैं तिहार आएको झल्को दिने गरी संरचनाहरू तयार गरिएको मेला प्रचार प्रसार संयोजक नेत्र रुचालले जानकारी दिए । तयारीको क्रममा गणतन्त्र स्तम्भ रंग रोगन गरि सजाईएको छ । संविधान दिवसको अवसरमा गणतन्त्र स्तम्भमा दिप प्रज्ज्वलन समेत गरिएको थियो ।
प्रवेशद्धार निर्माण र मन्च निर्माणको कार्य प्रारम्भ भएको र प्रदर्शनीको मुख्य आकर्षकको रूपमा रहने धरहरा निर्माण कार्य ५० प्रतिशत पुरा भएको संघका महासचिव तथा सचिवालय व्यवस्थापन समिति उप समितिका संयोजक केशव श्रीसले जानकारी दिए । उनका अनुसार सचिवालयका कामकारबाही तिव्र गतिमा अघि वढेको छ । पत्राचार तथा विभिन्न सरकारी तथा गैर सरकारी संघ संस्थाहरूसंग भेटघाट तथा अन्तक्र्रियालाई तिव्रता दिईएको छ । जिल्ला समन्वय समिति रूपन्देही र बुटवल उपमहानगरपालिका प्रवद्र्धकको रूपमा रहेको उक्त प्रदर्शनी असोज २८ गते सम्म संचालन हुनेछ ।
PHOTO: प्रदर्शनीको मुख्य आकर्षक धरहरा निर्माण गरिँदै । तस्विरः बुटवल टुडे