खोज

बाँके, ६ फागुन ।

लुम्बिनी प्रदेशमा नविकरण हुन जसकेका ट्राभल एजेन्सीहरु, होटल तथा रिसोर्टनलाई न्युनतम शुल्क लिई नविकरण गर्ने व्यवस्था मिलाउन माग गरिएको छ ।

नेपाल एशोसिएशन अफ टुर एण्ड ट्राभल्स एजेन्टस् (नाट्टा) बाँके च्याप्टरले उक्त माग राख्दै लुम्बिनी प्रदेशका उद्योग, पर्यटन तथा यातायात ब्यवस्था मन्त्री जानकी प्रसाद यादवलाई ज्ञापन पत्र बुझाएको छ ।

द्वन्द्वकालदेखि ट्राभल एजेन्सीहरु, होटल तथा रिसोर्टहरु नविकरण हुन नसकेकाले न्यूनतम शुल्क लिई नविकरण गर्नुपर्ने, बैंक ग्यारेन्टी ब्यवस्था खारेज गर्नुपर्ने, झन्झटिलो दर्ता तथा नविकरण प्रक्रिया सहज बनाउनुपर्ने, पर्यटनलाई अन्य उद्योग सरह मान्यता दिई बिद्युत महसुल तथा अन्य शुल्क मिनाह गर्नुपर्ने, प्रदेश पर्यटन मन्त्रालयले बजेट विनियोजन गर्दा विभिन्न पर्यटन ब्यवसायीका एशोसिएशनहरुसँग परामर्श गरी बजेट तर्जुमा गर्नुपर्ने, नाका अध्यागमन भन्सार पर्यटकमैत्री बनाउनुपर्ने, नेपालगन्ज–दिल्ली हवाई उडानका सम्बन्धमा पहल गर्नुपर्ने लगायत विभिन्न १२ बुँदे माग राखिएको छ ।

उक्त ज्ञापन पत्रमा नाट्टा बाँके च्याप्टर अध्यक्ष श्रीराम सिग्देल, हान बाँकेका अध्यक्ष दिवाकर खनाल, होटल ब्यवसायी संघ लुम्बिनी प्रदेशका अध्यक्ष भाष्कर काफ्ले र पर्यटन प्रवद्र्धन मञ्च बाँकेका अध्यक्ष कृष्णप्रसाद श्रेष्ठले हस्ताक्षर गरेका छन् । ज्ञापन पत्रमा बाँके क्षेत्र नम्बर २ का सांसद डा. धवलसम्शेर राणालाई बोधार्थ दिइएको छ ।