खोज

काठमान्डौ, २८ मंसिर ।

नेकपा एमालेको ११औँ महाधिवेशनको बन्दसत्र सुरु हुनुअघि आइतबार बिहान काठमाडौँको भृकुटीमण्डपमा पार्टी केन्द्रीय समिति बैठक बसेको छ । बैठकमा पार्टी अध्यक्ष केपी शर्मा ओलीले वरिष्ठ उपाध्यक्ष ईश्वर पोखरेलप्रति लक्षित गर्दै असन्तुष्टि व्यक्त गरेका छन् ।

आत्मआलोचना र प्रतिवेदनका नाममा आफूविरुद्ध प्रहार गर्ने प्रयास भएको भन्दै ओलीले कटाक्ष गरेका हुन् । उनले पार्टीभित्रैबाट अरूका एजेन्डा बोकेर आफूविरुद्ध आक्रमण गर्ने प्रयास भइरहेको टिप्पणी गरे ।

‘आत्मआलोचनाका नाममा अरूका एजेन्डा बोकेर हिँड्ने प्रवृत्ति देखिएको छ,’ बैठकमा ओलीले भनेको भन्दै एक केन्द्रीय सदस्यले जानकारी दिए । तत्कालीन प्रधानमन्त्री (म)  लाई कारबाही गर्नुपर्ने माग उठाइएको प्रसङ्ग उल्लेख गर्दै ओलीले यस्तो माग विपक्षी दल वा मिडियाले समेत सार्वजनिक रूपमा गर्न नसकेको अवस्थामा आफ्नै पार्टीका नेताहरूले दस्तावेजमै समेटेको भन्दै रोष प्रकट गरेका थिए ।

वरिष्ठ उपाध्यक्ष पोखरेलले यसअघि सार्वजनिक रूपमा जेनजी आन्दोलनबारे गठित छानबिन समितिमा अध्यक्ष ओलीले बयान दिनुपर्ने बताएका थिए । उनले दोषी देखिए कारबाहीको भागीदार हुनुपर्ने धारणा पनि सार्वजनिक गर्दै आएका छन् ।

यद्यपि, आन्तरिक असन्तुष्टिका बीच पनि ओलीले आफूलाई भाग्यमानी नेता भएको दाबी बैठकमा व्यक्त गरेका छन् । ‘म भाग्यमानी लिडर हुँ । मैले नेतृत्व र कार्यकर्ताबाट असाधारण सहयोग पाएको छु,’ उनले भनेको ती नेताले बताए ।

बैठकमा ओलीले महाधिवेशनको प्रक्रिया र कमिटीको हैसियतबारे पनि प्रस्ट पारेका छन् । नयाँ नेतृत्व चयन भई शपथ ग्रहण नभएसम्म सबै पदाधिकारी तथा सदस्यहरू केन्द्रीय कमिटी सदस्यकै हैसियतमा रहने जानकारी उनले गराए ।

त्यस्तै, बन्दसत्र सञ्चालनका लागि गठन हुने अध्यक्षमण्डलको अध्यक्षता पार्टी अध्यक्ष स्वयंले गर्ने पनि ओलीले बैठकमा स्पष्ट पारेका छन् ।