खोज

काठमान्डौ, २८ मंसिर ।

मधेश प्रदेशका मुख्यमन्त्री कृष्णप्रसाद यादवले मन्त्रिपरिषद् विस्तारमा ढिलाइ गरेका छन् । शपथ ग्रहणका क्रममा तत्काल विश्वासको मत लिएर मन्त्रिपरिषद् विस्तार गर्ने बताएका मुख्यमन्त्री यादवले अझै आवश्यक गृहकार्य पूरा गर्न सकेका छैनन् ।

एक प्रदेश सांसदका अनुसार मन्त्रिपरिषद् विस्तारसम्बन्धी गृहकार्य आज साँझसम्ममा टुंग्याउने तयारी भइरहेको छ । तर, एमालेको महाधिवेशन सकिएपछि मात्र मन्त्रिपरिषद् विस्तार र मुख्यमन्त्रीले विश्वासको मत लिने कार्यक्रम अघि बढ्ने उनले जानकारी दिए ।

‘हामी आजभित्र मन्त्रालय बाँडफाँडसहितको गृहकार्य पूरा गर्ने तयारीमा छौँ,’ ती सांसदले भने, ‘एमालेको महाधिवेशनपछि नै मन्त्रिपरिषद् विस्तार र विश्वासको मत लिने प्रक्रिया अघि बढ्छ ।’

मुख्यमन्त्री यादव मसिर २३ गते कांग्रेसका शीर्ष नेताहरूसँग भेटवार्ता गर्न काठमाडौँ आएका थिए । त्यसपछि मसिर २४ गते सत्ता गठबन्धनमा आबद्ध सात दलको बैठक बोलाइएको थियो । तर, मुख्यमन्त्री स्वयं मसिर २४ गते जनकपुर नफर्किएपछि बैठक स्थगित भएको थियो । त्यसयता सात दलको बैठक बस्न सकेको छैन ।

नेपाली कांग्रेसका मधेश प्रदेश संसदीय दलका नेता यादव यही मंसिर १९ गते एमालेबाहेकको सातदलीय गठबन्धनबाट मुख्यमन्त्री नियुक्त भएका हुन् । उनले मंसिर २१ गते तीन सदस्यीय मन्त्रिपरिषद् गठन गरिसकेका छन् ।

पद तथा गोपनीयताको शपथ ग्रहणका क्रममा मसिर २४ गते विश्वासको मत लिने तयारी गरिएको थियो । तर, सात दलबीच मन्त्रालय बाँडफाँडमा सहमति नजुट्दा मन्त्रिपरिषद्ले पूर्णता पाउन सकेको छैन । विशेषतः जसपा र माओवादी केन्द्र दुवैले भौतिक पूर्वाधार मन्त्रालय दाबी गरेपछि सहमति हुन नसकेको बताइएको छ ।

हाल मन्त्रिपरिषद्मा कांग्रेसका जंगीलाल राय, जनमत पार्टी संसदीय दलका नेता महेश यादव र नेकपा एकीकृत समाजवादीका कनिश पटेल सदस्य छन् । जंगीलाल राय र कनिश पटेलले विनाविभागीय मन्त्रीका रूपमा शपथ लिएका छन् भने जनमत पार्टीका महेश यादवलाई प्रदेशको महत्वपूर्ण मानिने अर्थ मन्त्रालयको जिम्मेवारी दिइएको छ ।

यसैबीच, सत्तारुढ दलहरूबीच मधेश प्रदेश सभाको सभामुख चयनमा पनि सहमति हुन बाँकी छ । एमालेबाट सभामुख बनेका रामचन्द्र मण्डल महाअभियोगबाट बर्खास्त भएपछि सभामुख पद रिक्त रहेको छ ।

सभामुख पदका लागि पनि जसपा र माओवादी केन्द्रले दाबी गर्दै आएका छन् । यस विषयमा समेत दलहरूबीच सहमति जुट्न बाँकी रहेको बताइएको छ ।