खोज

बुटवल तिलोत्तमा नगरपालिका वडा नं ६ मा निर्माण थालिएको वहुउदेश्यीय हलको काम राजनीतिक विवादका कारण रोकिएको छ । नगरपालिकाको बोर्ड बैठकले निमार्णका लागि दुई पटकसम्म निणर्य गरीसकेपछि स्थानिय राजनीतिक दलका नेताहरुले वडा कार्यालयलाई पार्किङ्ग अभाव हुने भन्दै काम रोकेको हो । वडा नं. ६ को वार्ड कार्यालयको उत्तरतर्फ दुर्गा मन्दिर र हुलाक घरले चर्चेको करीब ५ कठ्ठा क्षेत्रफलमा अत्याधुनिक बहुउद्येश्यीय हल निमार्णको लागि योजना बनाएर कागजी काम पुरा भैसकेको अवस्थामा राजनीतिक दबाबमा काम रोकिएको निमार्ण समितिका संयोजक तथा क्लबका सल्लाहकार गणेश पाठकले आरोप लगाए । दुर्गा मन्दिर र ईलाका हुलाकलाई वैकल्पिक व्यवस्थापन गर्ने निर्णय सहित नगरपालिकाका वडाअध्यक्षहरुको दोस्रो बैठकले निर्णय गरेको भएपनि अहिले काम रोकेको उनी बताउछन । ‘भवनको नक्शा पास र कागजी सबै प्रक्रिया समेत पुरा भएको छ ।’– उनले भने । अहिले आएर सुन्दर बस्तीमा निर्माण गर्न मौखिक सल्लाह दिएपनि त्यसलाई नमान्ने क्लबका पदाधिकारी बताउछन ।
नगरपालिकाको २२ औ बैठकको पत्रमा क्लबको सहलगानीमा निमार्ण गर्ने गरि आफुहरुलाई जिम्मा दिएको क्लबका अध्यक्ष दुर्गा भट्टराईले बताए । पार्किङ्ग व्यवस्थापन कसरी गर्ने भन्ने विषयमा आफुहरुले समाधानका उपायसमेत छलफलमा पेश गरेको उनले दाबी गरे । नक्शा नाप्ने र प्रस्तावित स्थलमा तारबार गर्ने काम भएपछि अनावश्यक विवाद ल्याउने काम भएको उनले बताए । ‘हामीले बहुउद्येश्यीय हलसहितको कवड हलको योजना वडाबाट सिफारिस गरि नगरपालिकाबाट निणर्य गराएका हौ ।’– उनले भने । यसअघि क्लबको एकल लगानीमा निमार्ण अघि बढाईएको भएपनि नगरपालिकामा वडाअध्यक्षहरुको बैठकले नगरपालिका र क्लबको सहलगानीमा निमार्ण अघि बढाउने भनिएको थियो ।
वडाका स्थानिय समाजसेवी र राजनीतिक दलको रोहबरमा नै सो भवन निमार्णका लागि वडाकार्यालयबाट सिफारिस गरिएको वडाअध्यक्ष सुखदेव न्यौपानेले बताए । वडामा बहुउद्येश्यीय भवन र कवड हलको खाचो रहेको अवस्थामा स्थानिय युवाहरुबाट निमार्णको जिम्मेवारीसहित योजना आएपछि वडाले सिफारिस गरेको उनले बताए ।
यता कार्यपालिकाको मंगलबार दिउसो बसेको बैठकले पुर्बवत अवस्थामा नै सो जग्गा संरक्षण गर्ने निर्णय गरेको छ । विवाद बढ्दै गएपछि नगरपालिकाले यो निणर्य गरेको हो । सामाजिक गतिविधिमा उपयोगी हुने हल र विहान साझका लागि खेलकुद गतिविधि गर्ने गरि ५५ लाख लागतको बहुउद्येश्यीय भवन नगरपालिकासंग सहकार्यमा हुने गरि अघि बढाईएको थियो ।