खोज

नेपाल निर्माण व्यवसायी महासंघका केन्द्रिय अध्यक्ष बिष्णु भाई श्रेष्ठले निर्माण कार्य गुणस्तरीय नभए फौजदारी प्रकृतीको मुद्दा चल्ने बिषयले निर्माण व्यवसायी त्रसित भएको बताएका छन । कपिलवस्तु निर्माण व्यवसायी संघको तौलिहवामा आयोजित आठौं साधारण सभा तथा पाँचौ जिल्ला अधिबेशनलाई सम्बोधन गर्दै उनले सो बिचार व्यक्त गरे ।
सो अवसरमा बोल्दै अध्यक्ष श्रेष्ठले निर्माण व्यवसायीलाई फौजदारी अभियोगको कारवाहीका नाममा तर्साएर देशको बिकासमा सहयोग नपुग्ने बताए । उनले निर्माण व्यवसायीले समयमै काम सम्पन्न नगरे वा करार अनुसारको गुणस्तर कायम नभए करार ऐन अनुसार कारवाही गर्नु पर्ने उनको भनाई थियो । “जंग बहादुर शैलीमा निर्माण व्यवसायीलाई तर्साएर देश बिकास हँुदैन । हाम्रो कार्यमा समस्या आए करार ऐन अनुसार कारवाही हुनु पर्छ,” अध्यक्ष श्रेष्ठले भने । पुर्ववर्ती सरकारले ल्याएको मुलुकी संहिताबाट त्रसित नहुन प्रदेशसभा सदस्य धर्मबहादुरलाल श्रीवास्तबले आग्रह गरे । “मुलुकी संहिता र करका बारे अनाहक हल्ला चलाईएको छ । केहि कमी कमजोडी भए सुधारै गर्न नसकिने पनि होईन ।” श्रीवास्तबले भने ।
सो अवसरमा प्रदेशसभा सदस्य अर्जुन केसीले निर्माण व्यवसायी महासंघ साना व्यवसायीका पक्षमा नरहेको आरोप लगाए । ठुला निर्माण व्यवसायीले अरबौको ठेक्कामा बदमासी गर्दा समयमै काम सम्पन्न गर्ने साना व्यवसायी बदनाम हुने गरेको उनको आरोप थियो । “१० महिनामा काम सक्ने भन्दै १० अर्बको काम लिएर अलपत्र पार्नेलाई नभई ५ लाख देखी करोडका काम लिएर समयमै सम्पन्न गर्ने व्यवसायीलाई बदनाम गर्ने कार्य उपयुक्त होईन,” केसीले भने । ठुला ठेक्का मिलाउन केन्द्रबाटै चलखेल हुने गरेको र महासंघले साना व्यवसायिका समस्या नबुझनु दुर्भाग्यपुर्ण रहेको उनको तर्क थियो । महासंघले साना व्यवसायीलाई संरक्षण नगरे व्यवसायी धरासायी हुने उनले बताए । महासंघका बरिष्ठ उपाध्यक्ष लक्ष्मण रानाले प्रतिशत नदिई कुनै निर्माण व्यवसायीले कार्य सम्पादन गर्दा समेत भुक्तानी नपाउने अवस्थामा सबैको तारोमा निर्माण व्यवसायी मात्रै पर्नु दुःखद भएको बताए । महासंघका नीतिगत उप–महासचिव तथा प्रवक्ता बिष्णु बुढाथोकीले मुलुकी संघियताका कारण निर्माण व्यवसायी समस्यामा परेको बताए । सरकारले खरिद ऐन अनुसार करार गर्ने भएकाले सोही ऐन अनुसार नै नियमन गर्नुपर्ने तथा स्थानिय तहमा उपभोक्ता समिती मार्फत बिकास कार्य अगाडी बढाउदा कामको गुणस्तर खस्किएको उनको भनाई थियो । “उपभोक्ता समितीको न त कार्य सम्पादन गर्ने क्षमता छ । नत उपकरण नै छन । यस बारे समयमै समाधान नखोजिए निर्माण कार्यको गुणस्तर खस्किदै जाने अवस्था छ ।” बुढाथोकीले भने । साना निर्माण व्यवसायीको अधिकार संरक्षणका लागी महासंघले पहल गर्नु पर्ने कपिलवस्तु निर्माण व्यवसायी महासंघका अध्यक्ष चन्द्रशेखर श्रेष्ठले बताए ।
साधारणसभामा संघका महासचिव गुन्जन कुमार गुप्ताले हाल सम्मका प्रगती प्रतिबेदन सगै भावी निती तथा कार्यक्रम प्रस्तुत गरेका थिए । त्यसै गरि कोषाध्यक्ष अखिलेश कुमार गुप्ताले गत आवको १३ लाख ५९ हजार ६ सय २५ रूपैया बराबरको आय व्यय बिवरण पेश गरेका थिए । कार्यक्रममा निर्माण व्यवसायी रही स्थानिय तहमा निर्वाचित नगर प्रमुख नेत्रराज अधिकारी, किरण सिंह र सञ्चारकर्मी मनोज पौडेललाई सम्मान गरिएको थियो ।