खोज

बुटवल,  कात्तिक  नेपाली काँग्रेसका केन्द्रिय सदस्य तथा गृहमन्त्री बालकृष्ण खाँण यतिबेला मंसिर ४ को चुनाव प्रचार प्रसारको दौरानमा आफ्नो निर्वाचन क्षेत्र रुपन्देही ३ मा ब्यस्त छन् । उनी रुपन्देही ३ को प्रतिनिधिसभा सदस्य पदका उम्मेदवार छन् । सत्ता गठबन्धनको उम्मेदवार उनी बिहानैदेखि दिनभर चुनावी सभा, कार्यकर्ता भेटघाट, घरदैलो, कोणसभा र अन्य भेटघाटमा दौडधुप गरिरहेका भेटिन्छन् ।
गृह मन्त्रालयको जिम्मेवारी निर्वाह गर्नुपर्ने समेत भएकाले सरकारी कामकाजमा पनि केही समय निकालेर गृहमन्त्रीको भुमिका पनि निभाइरहेका खाँणलाई १० घण्टा पछ्याउंदा यस्तो पाइयो ।

उम्मेदवार खाँण सोमबार बिहान ८ बजे सिद्धार्थनगर नगरपालिका वडा नं.७ मा रहेको ओम् आध्यात्मिक प्रतिष्ठानमा आयोजना गरिएको भेटघाट कार्यक्रममा उपस्थित भएर करिब १ घण्टा बिताए । कार्यक्रमलाई सम्बोधन गर्दै खाँणले समाजमा शान्ति र अमनचयन कायम राख्न आध्यात्मिक तथा धार्मिक संघसंस्थाहरु भुमिका महत्वपुर्ण हुने बताए । लगत्तै वडा समितिको घरदैलो कार्यक्रममा केहीबेर सहभागी भै मतदाता समक्ष भोट मागेर वडा नं.३ दरखसवातिर हान्निए तिब्र गतिमा ।

९ बजे दरखसवास्थित संजयलाल गुप्ताको घरमा आयोजना गरिएको सत्ता गठबन्धनको कार्यकर्ता भेटघाटमा प्रदेश सभा सदस्य उम्मेदवार सन्तोषकुमार पाण्डे सहित सहभागि भै करिब १ घण्टा बिताए । कार्यक्रममा सम्बोधन गर्दै खाँणले नागरिकता ऐन किन लयाइएको भन्ने प्रष्ट पारे ।
त्यसपछि करिब १ घण्टाजति पैदल घरदैलो अभियानमा सरिक भएका उम्मेदवार खाँणले मतदाताका ईच्छा, आकांक्षा, भावना र चाहनाबारे बुझ्दै आफुलाई भोट दिएर जिताउन आग्रह गरे । मतदाताहरुले सडक, सिंचाई, खानेपानी लगाएतका समस्याहरु समाधान गरिदिन आग्रह गरे । यसअघि जितेर गएका नेता (घनश्याम भुसाल) हरु फर्केर नआउने गरेकोले आफुहरु पीडित हुने गरेको मतदाताको गुनासो थियो । उनीहरुका माग सम्बोधन गरिदिने आश्वासन बाँडेर ११ बजेतिर खाँण खानाका लागि दलबलका साथ घरतर्फ हुँईकिए ।

घरमा पनि भेटघाटका लागि केही शुभेच्छुकहरुको उपस्थिति रहेकाले ११ बजे आयोजना गरिएको कार्यक्रममा झण्डै १ घण्टा ढिलोगरी करिब १२ बजेतिर ओमसतिया गाउँपालिका वडा नम्बर २ पड्सरीमा पुगे । त्यहाँ पार्टी प्रवेश कार्यक्रममा सहभागी भए ।
सो कार्यक्रमलाई सम्बोधन गर्दै गृहमन्त्री खाँणले रुपन्देहीको बिकासका लागि सक्षम नेता चयन गर्न आग्रह गरे ।
पड्सरीमा झण्डै २ घण्टा समय खर्चेका खाँणले त्यसपछि २ बजे फर्साटिकर वडा नम्बर ३ मा आयोजित सभालाई सम्बोधन गर्न त्यसतर्फ प्रस्थान गरे । फर्साटिकरको रामेश्वर खेल मैदानमा आयोजना गरिएको गठबन्धनको कार्यकर्ता भेटघाट कार्यक्रममा आधा घण्टा मात्र ढिला पुगेका गृहमन्त्री खांणले विभिन्न पार्टी छाडेकालाई कांग्रेसमा प्रवेश गराए ।

त्यहां खाँणले औद्योगिक कोरिडोर निमाण गर्दा कसैलाई घरबारबिहीन बनाउने काम सरकारबाट नहुने बताए । कार्यक्रममा जिल्ला समन्वय समितिका संयोजक उमाकान्त चापागाईं, शुद्धोधन गाउंपालिका अध्यक्ष बिष्णु बस्याल, काँग्रेसका युवा नेता रमेश खनाललगाएतका नेता कार्यकर्ताले स्थानीयका समस्याहरु राख्दै समाधानका लागि आग्रह गरे ।
फर्साटिकरको कार्यक्रम सक्काएर करिब ४ बजे सेमलार चम्किपुरस्थित भेराइटीचोक पुगेर त्यहाँ आयोजित कार्यक्रममा सहभागी भए । त्यहाँ नेपाली काँग्रेसका नेता हरिध्वज मल्लसहित उपस्थित मतदाताले स्वागत गरे । प्रदेश सभाका उम्मेदवार रामचन्द्र ढकालसहित पुगेका मन्त्री खाँणले सो कार्यक्रमलाई सम्बोधन गर्दै किसानको हकहित संरक्षणमा प्रतिबद्ध रहेको बताए । सो अवसरमा प्रदेश सभा उम्मेदवार रामचन्द्र ढकालले आफ्नो पार्टीलाई बहुमत दिएर जिताउन आग्रह गर्दै पार्टीका बहुमत सदस्यहरुले जितेमा प्रदेश राजधानी पुनः बुटवल फिर्ता ल्याउने दावी समेत गर ।

करिब १ घण्टा समय बिताएपछि मन्त्री खाँण फेरि फर्साटिकरतर्फ लागे । त्यहाँ रिद्धीसिद्धी पार्टि प्यालेसमा आयोजित नेपाली काँग्रेस निकट शिक्षकहरुको भेलामा सरिक भई झण्डै १ घण्टा बसेर पुनः भैरहवातर्फ गए । भैरहवा जाने बेला खाँणले भन्दै थिए–भैरहवामा अझै २ वटा भेटघाट कार्यक्रम छ ।