खोज

गुल्मी, १७ भदौ ।
गुल्मी अस्पताल तम्घासमा नसर्ने रोगको लागि पेनप्लस क्लीनिक सेवा सञ्चालन भएको छ । जिल्लामा पहिलो पटक गुल्मी अस्पतालले बिरामीहरूको थप सहजताका लागि उक्त रोग सम्बन्धि सेवा सञ्चालनमा ल्याएको हो ।
नेपाल सरकारसँगको समन्वयमा सञ्चालित पाईलेटिङ्ग प्रोजेक्ट अन्तर्गत पेनप्लस क्लीनिक सेवा सञ्चालनमा ल्याईएको गुल्मी अस्पतालले जनाएको छ । सात प्रदेशहरू मध्ये चारवटा प्रदेश अन्तर्गतका चार जिल्लामा नसर्ने रोगको पेनप्लस प्रोजेक्ट अन्तर्गत क्लीनिक सेवा सञ्चालनमा ल्याइएको होे ।
गुल्मीको सदरमुकाम तम्घासमा यो सेवा सञ्चालन भएपछि अस्पतालमा आउने गम्भिर किसिमका तथा कडा नसर्ने रोगका बिरामीहरूका लागि सेवा उपलब्ध गराउन थप सहयोग मिलेको छ । विशेषगरि वालबालिका र किशोर किशोरीहरूका लागि लक्षीत गरेर उक्त सेवा सञ्चालनमा ल्याईएको हो ।

उक्त सेवा सञ्चालनमा आएपछि जिल्लामा रेसुङ्गा नगरपालिका, गुल्मीदरबार गाउँपालिका र रुरुक्षेत्र गाउँपालिकाका नागरिकहरूलाई नसर्ने रोगको बारेमा जानकारी गराई सकिएको छ । पेनप्लस क्लीनिक सञ्चालनमा आएसँगै यतिबेला गुल्मी अस्पतालमा पुग्ने धेरै बिरामीहरूले यो सेवा लिईरहेका छन । नसर्ने रोगको बारेमा जानकारी नहुँदा अन्योलमा परेका बिरामीहरूका लागि यो सेवाले थप सजिलो बनाएको छ । गुल्मी अस्पतालमा पुग्ने दिर्घरोगी नसर्ने रोगका बिरामीहरूलाई अहिले अस्पतालको ओपीडि कक्षबाट सेवा उपलब्ध गराउन थालेको कार्यक्रम अधिकृत रेनुका थामीले जानकारी दिएकी छन ।

गुल्मी अस्पतालमा स्थापना भएको पेनप्लस क्लीनिकबाट दिर्घरोगी तथा कडा नसर्ने रोगका बिरामीहरूलाई सेवा प्रवाहका साथै उनीहरूलाई थप हेरचाह र उपचार प्रदान गरिन्छ । उक्त पेनप्लस क्लीनिकमा मेडिकल अधिकृत सहित हेल्थ असिस्टेन र स्टाफ नर्सबाट निशुल्क रूपमा सेवा प्रवाह भैरहेको छ ।
क्लीनिकबाट अति गरीब र विपन्न नागरिकहरूका लागि निशुल्क रूपमा स्वास्थ्य विमा गरिदिने व्यबस्था छ । स्वास्थ्य विमा रकम बाहेक अन्य ठुला रोग लागेको अबस्थामा कुनै बिरामीको शल्यक्रिया गर्नु पर्ने भएमा उनीहरूलार्ई निशुल्क रूपमा सबै खर्च व्यहोरेर उपचार गर्ने व्यबस्था रहेको कार्यक्रम अधिकृत थामीले बताईन ।

संस्थाले स्थानीय पालिकाहरूसँग समन्वय गरेर जिल्लाभर यस प्रकारको सेवा विस्तार गर्ने योजना बनाएको छ । संस्थाबाट पालिकामा पहिलो चरण अन्र्तगत सामुदायीक स्तरमा कार्यरत स्वास्थ्यकर्मी र स्वास्थ्य स्वयंसेवीकाहरूलाइ पेनप्लस सम्बन्धि आधाभूत तालिम उपलब्ध गराउन थालेको छ ।
नसर्ने रोगहरू जस्तै क्यान्सर, मुटु सम्बन्धि रोग, मधुमेह, उच्च रक्तचाप, अटिजम, छारे,बाथ, दम तथा किड्नी लगायतका रोगहरूको बारेमा जिल्लामा सचेतना मुलक कार्यक्रम सञ्चालन गरिने बताईएको छ । जिल्लाका अधिकांस स्वास्थ्य संस्थाहरूमा पुग्ने बिरामीहरूलाई यी रोगहरूको बारेमा खासै जानकारी नहुँदा अन्योलमा परेकोे अबस्थामा यो सेवाले बिरामीहरूलाई थप सहयोग पुगेको छ ।