खोज

बुटवल, असार ८ । बुटवल–११ योगिकुटीस्थित मणिमुकुन्द सेकेण्डेरी स्कुल/ कलेजमा अभिभावक, शिक्षक तथा कर्मचारीहरुलाई अभिमुखिकरण कार्यक्रम शनिबार सम्पन्न भएको छ । विद्यार्थीको पढाईलाई कसरी राम्रो र उनीहरुलाई संस्कारयुक्त, अनुशासित बनाउन सकिन्छ भन्नेबारे अभिमुखिकरण गरिएको विद्यालयले जनाएको छ ।

कार्यक्रममा बोल्दै राष्ट्रिय परीक्षा बोर्ड बुटवलका प्रमुख रमाकान्त तिवारीले विद्यार्थीको भविष्य सफल बनाउने कुरा विद्यार्थी, शिक्षक र अभिभावक गरी तिन पक्षसँगै सम्बन्धित हुने बताए । बालबालिकाको सर्वाङ्गीण विकासमा जति विद्यालयको हात रहन्छ, त्यति नै दायित्व अभिभावकको पनि हुने बताउँदै उनले बालवालिकाको भविष्य प्रति अभिभावकहरु संवेदनशिल बन्नुपर्नेमा जोड दिएका थिए ।

बालवालिकाको पहिलो गुरु अभिभावक र पहिलो पाठशाला घर भएकाले व्यवहारिक ज्ञान, संस्कार सकरात्मक सोँचको विकासमा अभिभावकको भुमिका प्रमुख हुने धारणा राखे । व्यस्त जीवनशैलीका कारण बालबाललिका र अभिभावकबीचको दुरी बढ्दै गएको अबस्थामा बालबाललिकाले मोबाइल फोनको प्रयोग बढी गर्ने, आफूलाई बुवा–आमाले माया नगरेको जस्तो अनुभव गर्ने, आफू एक्लिएजस्तो महसुस गर्ने भएकोले आफ्ना बच्चालाई सकेसम्म बाबुआमा दुवैले पर्याप्त समय दिन उनले आग्रह गरे ।

प्रमुख तिवारीले सक्षम जनशक्ति उत्पादन गर्ने खालको शिक्षा र सिकाई प्रणाली आजको आवश्यकता रहेको भन्दै शिक्षा क्षेत्रमा मणिमुकुन्दको योगदान पनि महत्वपूर्ण रहेको भन्दै भन्दै यो गुणस्तरलाई निरन्तरता दिन आग्रह गरे । कार्यक्रममा मुख्य प्रशिक्षक बिके शर्माले असल अभिभावक, शिक्षकको जिम्मेवारी र कर्तव्यबारे परामर्श तथा प्रशिक्षणमुलक अभिमुखिकरण प्रदान गरेका थिए । उनले बालबालिकालाई अभिभावकले परीक्षामा उत्कृष्ट हुनुपर्छ भनेर अनुचित दबाव दिन नहुने बरु उसको क्षमता र रुचि पहिचान गरेर सोही अनुसारको क्षेत्रमा अघि बढ्न प्रेरित गर्नुपर्ने सुझाव दिए ।

कार्यक्रममा विद्यालयका प्राचार्य टुकबहादुर क्षेत्रीले अनुशासित, संस्कारयुक्त शिक्षा दिएर विद्यार्थी र अभिभावकको विश्वास जित्ने गरी विद्यालय अघि बढेको बताए । विद्यार्थीको सिकाइ प्रक्रियामा घरको वातावरण अनुकुल हुनुपर्ने भएकोले विद्यालयले अभिभावकहरुको समेत सुझावलाई समावेश गर्ने उद्देश्यले अभिमुखिकरण कार्यक्रम गरेको उनले बताए । बालबालिकाहरुलाई एउटा सफल ब्यक्ति बनाउनको लागि हरेक ब्यक्तिले सकारात्मक सोंचाइमा विकास गर्नु पर्ने र बालबालिकाहरुको इच्छालाई भन्दा पनि उसको आवश्यकतालाई ध्यान दिनुपर्ने प्राचार्य क्षेत्रीको धारणा थियो । हिजो र आजको पढाइको पद्धतिमा फरक रहेको भन्दै स्कुल÷कलेज मात्रै नभई अभिभावकले समेत बालबालिकाको स्वास्थ्य, खानपिन, संगत र बालबालिकाले प्रयोग गर्ने डिभाइसहरु चलाउने कुरामा विशेष ध्यान दिनुपर्ने प्राचार्य क्षेत्रीले बताए । अभिभावक आफूले पनि मोबाइल लगायतका डिभाइसहरु चलाउन कम गर्ने र बच्चालाई समेत कन्ट्रोल गर्न सक्नुपर्ने उनले बताए ।

विद्यालयका सञ्चालक उमापति न्यौपानेले अनुशासन र संस्कारले नै विद्यार्थी जीवनका हरेक मोडमा सफल हुने भएकाले अभिभावकले यी कुरामा ध्यान दिनुपर्ने बताए । कार्यक्रममा सहभागी अभिभावकहरुले बालबालिकाप्रति अभिभावकहरुले बहन गर्नुपर्ने दायित्वका बारेमा स्पष्ट भएको बताउँदै अभिभावक लक्षित यस्ता प्रेरणादायी कार्यक्रम आयोजना गरिएकोमा विद्यालयप्रति आभार व्यक्त गरे । कार्यक्रममा विद्यालयका अध्यक्ष गमप्रसाद रेश्मी, विद्यालयका सहप्राचार्य दिवाकर खनाल, व्यवस्थापन संकाय संयोजक दिनेश पाण्डे, विज्ञान संकाय संयोजक लक्ष्मण गैरे, संयोजक पशुपति चौधरी, विद्यालय संयोजक हरि पौडेल, प्याब्सन लुम्बिनीका अध्यक्ष लालहरि पाण्डे लगायतले अभिभावक,शिक्षक र कर्मचारी अभिमुखिकरणले विद्यार्थीको शैक्षिक गुणस्तरमा सुधार आउने धारणा राखे । २०५६ सालमा स्थापना भएको संस्थाले स्थापना कालदेखि नै पढाई सँगै अतिरिक्त क्रियाकलाप र खेलकुदमा अब्बल नतिजा हासिल गर्दै दक्ष डाक्टर, इन्जीनियर, सिए, राष्ट्रिय खेलाडी उत्पादन गरिसकेको छ ।