खोज

दाङ, ९ जेठ ।

दाङमा यस ३७ हजार ७ सय ५५ जना बालबालिकालाई आइपीभी खोप लगाइने भएको छ । यही जेठ १३ देखि २६ गतेसम्म सञ्चालन हुने खोप अभियानमा सहभागी गराइने भएको छ । स्वास्थ्य कार्यालय दाङले बुधबार दाङको घोराहीमा पत्रकारसँग अन्तरक्रिया कार्यक्रम गर्दै २०७३ देखि ०७५ सालसम्म नियमित पोलियो खोप लगाउन छुटेका ३७ हजार ७ सय ५५ बालबालिकालाई खोप दिने तयारी भइरहेको जानकारी दिएको हो । कार्यालयका अनुसार जेठको १३ देखि १७ गते सम्म पहिलो चरणको खोप लगाइने छ भने २३ गतेदेखि २६ गतेसम्म दोस्रो चरणको खोप लगाइने छ । जसका लागि जिल्लाका ६ सय एक वटा खोप केन्द्र निर्धारण गरिएको छ ।

दाङका १० वटै पालिकामा खोप केन्द्र राखिएको स्वास्थ्य कार्यालय दाङका खोप संयोजक झग्गुप्रसाद आचार्यले जानकारी दिए । पहिलो चरणमा २०८१ जेठ १३ गतेदेखि १७ गतेसम्म तुलसीपुर उपमहानगरपालिका, शान्तीनगर, दंगीशरण र बबई गाउँपालिकामा खोप सञ्चालन हुने छ । दोस्रो चरणमा २०८१ जेठ २२ गतेदेखि २६ गतेसम्म घोराही उपमहानगरपालिका, लमही नगरपालिका, बंगलाचुली, राप्ती, गढवा र राजपुर गाउँपालिकामा खोप सञ्चालन हुने आचार्यले जानकारी दिए ।

जिल्ला समन्वय समिति दाङका प्रमुख नित्यानन्द शर्माले सकेसम्म लक्षित उमेरका बालबालिका रहेका सबै विद्यालयहरुमा केन्द्र राखेर सबैलाई खोपमा समाबेश गराउनुपर्ने बताए । बालबालिकाहरुलाई खोप लगाउने समयमा विद्यालयका शिक्षक,अभिभावकले सहयोग गर्नु पर्ने बताए ।

प्रमुख जिल्ला अधिकारी रामबन्धु सुवेदीले विद्यालयमा खोपकेन्द्र भएकाले कुनैपनि बच्चा छुट्न नहुने बताए । कामको शिलशिलामा बाहिर रहेका अभिभाबकले आफ्ना बच्चालाई नजिकको खोप केन्द्रमा लगेर खोप लगाउनुपर्ने बताए । दाङलाई पोलियो मुक्त गराउन सबैले आ आफ्नो क्षेत्रबाट सहयोग गर्न आग्रह गरे । घोराहीका नगरप्रमुख नरुलाल चौधरीले पोलियो खोपलाई प्रभावकारी बनाउने र विद्यार्थीको समुहलाई कसरी कभरेज गर्न सकिन्छ त्यसतिर ध्यान दिने बताए । सकारात्मक सन्देश सहित खोप अभियान सफल बनाउने प्रतिबद्धता जनाए ।

स्वास्थ्य कार्यालय दाङका निमित्त प्रमुख किशोर आचार्यले पोलियोविरुद्ध ०७१ सालदेखि नेपालमा खोप लगाउन सुरु गरिए पनि ०७३ देखि ०७५ सालसम्म खोप उपलब्ध नभएकाले नेपालभरिका बालबालिका उक्त खोपबाट बञ्चित भएकाले यस पटक खोप अभियान सञ्चालन गरिएको बताए । उनका अनुसार टाइप २ र टाइप ३ को चरण सफलता भएको तर टाइप १ ले समस्या सृजना गरेको बताए । ०७० चैत १३ मा दक्षिण एशियाका सबै मुलुकमा पोलियोको बिरामी शून्य अवस्थामा रहेको घोषणा गरिएको थियो । तर पाकिस्तान र अफगानिस्तानमा पोलियोका बिरामी देखा परिरहेकाले ती देशबाट पोलियो संक्रमण हुन सक्ने संभावना भएकाले खोपलाई निरन्तरता दिनुपरेको आचार्यले बताए । पोलियो भएकामध्ये ३ प्रतिशत बालबालिकालाई पक्षघात हुने र त्यसको उपचार नभएकाले संक्रमण हुनबाट जोगाउन बालबालिकालाई खोप दिने गरिन्छ ।