खोज

चन्द्रौटा (कपिलवस्तु), ७ पुस ।

शहरबजारको क्षेत्रमा सबैथोक हुन्छ । बाटोघाटो, यातायात, अस्पतालदेखि सञ्चारसम्म सबै पुगेको हुन्छ । तर ग्रामीण भेगमा सबैथोक पुग्नु विरलै उदाहरण हुने गर्छ । कपिलवस्तुको बुद्धभूमि नगरपालिकामा रहेको गौतमबुद्ध माध्यमिक विद्यालयमा बिहानैदेखि भिडभाड देखिन्थ्यो ।

ग्रामीण भेगका आम नागरिकले विद्यालयको प्रांगण खचाखच भरिएको थियो । उपचारका लागि सार्वसाधारण लाइनमा बसेर सेवा लिइरहेका देखिन्थे । उपचार गाउँघरमै पाउने भएपछि अस्पताल जानै नपर्ने भएको छ । अस्पतालको पहुँच नभएको पालिकामा एकै पटक १६ जना विशेषज्ञ चिकित्सक सहितको टोली आएपछि बिरामीको ओइरो लागेको थियो ।

पालिकाका एक दुई रोगको उपचारको लागि स्वास्थ्य शिविर सञ्चालन भए पनि एकै पटक १६ प्रकारको सेवा दिइएको पहिलो पटक थियो । उपचारका लागि अस्पताल जान नपर्ने भए पछि विपन्न समुदाय, सीमान्तकृत वर्ग, वृद्धवृद्धा, महिला, हाडजोर्नी र मुटु रोगका बिरामीको लहर देखिन्थ्यो । काठमाडौ मेडिकल कलेज शिक्षण अस्पतालको स्वास्थ्यकर्मीको टोलीले शुक्रवार २ हजार बढी बिरामीको चेक जाँच गरेको थियो । मुटु, मिर्गौला, आँखा, नाक, कान, घाँटी, छाला तथा यौन रोग, हाडजोर्नी तथा नशा, मानसिक रोग, महिला तथा स्त्री विशेषज्ञ सेवा, बाल रोग, दाँत रोगको उपचार गरिएको थियो ।

मुटुको इसिजी, भिडियो एक्सरे, दिसा पिसाब खकार तथा रगत जाँच र औषधी निःशुल्क प्रदान गरेको काठमाँडौ मेडिकल कलेज तथा नोबेल मेडिकल कलेजका सञ्चालक तथा संघीय सांसद सुनिल शर्मा बताउँछन् । बुद्धभूमि नगरपालिकाका नगर प्रमुख केशव कुमार श्रेष्ठले निःशुल्क उपचारले अत्यन्त विपन्न समुदायका महिला वृद्धहरू समेत पहिलो पटक उपचारका लागि आएका बताए । थप उपचार र अप्रेसन गर्नुपर्ने बिरामीलाई शिक्षण अस्पतालमा निःशुल्क उपचार गर्ने जनाइएको छ । पालिकामा एकैपटक धेरै रोगको चेकजाँच र उपचार भएको पहिलो पटक हो । धेरै बिरामी लाभान्वित भएका छन् ।

कलेजले हरेक वर्ष १ सय भन्दा धेरै स्थानमा स्वास्थ्य शिविर सञ्चालन गर्दै आएको छ । पछिल्लो एक महिनामा काभ्रे, रसुवा, प्युठान, दाङ जिल्लाका पालिकामा शिविर सम्पन्न गरेको छ । सन्तान विदेशमा भएर उपचार गराउन नसकेका वृद्धा, लामो दुरी तथा पहाडका कुना कुनामा रहेका महिला, अस्पतालको पहुँच नभएका स्थानबाट पहिलो पटक स्वास्थ्य जाँच गर्न आउने गरेका नशा तथा मानसिक रोग विशेषज्ञ डा. अनुश्रुती पराजुलीले जानकारी दिए ।

कलेजले २०७७ साल देखि स्वास्थ्यको सेवाको पहुँच नभएको क्षेत्रमा पालिका सँग समन्वय गरी शिविर सञ्चालन गर्दै आएको छ । काठमाडौँको लच्छीफेदीकाट सुरु गरिएको शिविर सोलुखुम्बु, खोटाङ, भोजपुर अछाम काभ्रे, रसुवा, प्युठानका अत्यन्त विकट तथा दुर्गम पालिकामा सञ्चालन गरिएको अस्पतालका जनसम्पर्क अधिकृत मदनलाल श्रेष्ठले बताए ।