खोज

जाजरकोटको बारेकोट केन्द्रविन्दु भएर भुकम्प गएको सात दिन बितिसक्दा पनि भुकम्प प्रभावितहरू अझै खुला आकासमुनी बस्न बाध्य भएको भन्दै सरकारले दिने राहत छिटो उपलब्ध गराउन ध्यानाकर्षण गराएका छन । भुकम्प प्रभावितहरूले त्रिपालसमेत पाउन नसकेको भन्दै स्थानीय जाजरकोटका भुकम्प प्रभावितले राहत बितरणप्रति असन्तुष्टी जनाएका छन । राहत बितरण गरिएपनि नजिकका आफन्तहरूले मात्रै पाएको र चिनजान नभएका गाउँका पीडितहरूले अझै कुनैपनि प्रकारको राहत नपाएको उनीहरूको गुनासो छ । एकद्वारका नाममा राहत वितरणको काम लगभग ठप्प जस्तै भएको छ । भुकम्प प्रभावितहरू जाडोमा कक्रिएर बस्न बाध्य छन । राहतको काम निकै सुस्त भएकोमा ब्यापक असन्तुष्टी देखिएको छ । भूकम्पबाट करिब एक लाख ८० हजार नागरिक प्रभावित भएको तथ्याँक सार्वजनिक भएको छ । जाजरकोट र रुकुम पश्चिममा गएको विनाशकारी भूकम्पमा परी हजारौं व्यक्तिहरू विस्थापित हुन पुगेका छन् ।

आफ्नै घर खण्डहरमा परिणत भएको र कैयौँ आफन्त र छरछिमेकका सदस्यहरू घरमा पुरिएर मृत्युवरण गर्न बाध्य भएको दृश्यले भुकम्प पीडितहरू भावविह्वल वनेका छन । भागेर बाँचेकाहरूले घरबास सबै गुमाएका छन् र अहिले हजारौँ स्थानीयहरू खुला आकाशमुनि रात बिताउन विवश भइरहेका छन् । विस्थापितलाई राहत र पुनस्र्थापना अहिलेको अहम् आवश्यकता हो । मृत्यु भएकाहरूको परिवार शोकमा छन् भने घर भत्किएर विस्थापित भएकाहरू पनि कहाँ बस्ने, के खाने र के लगाउने भन्ने समस्याले आक्रान्त छन् । त्यसैले यतिखेर त्यहाँका बासिन्दाका लागि सहानुभूति होइन, तत्काल राहत र पुनस्र्थापनाको खाँचो छ । सरकारले छिटोभन्दा छिटो प्रभावित क्षेत्रका जनतालाई चिसोबाट बचाउनु जरुरी छ । चिसोकै कारण भुकम्प प्रभावितहरू विरामी पर्न थालेको समाचार आईरहेको छ । यो निकै दुःखद कुरा हो । पीडितहरूलाई झन् पीडित हुने अवस्था कुनै हालतमा पनि आउन दिनुहुँदैन । प्रभावित क्षेत्रमा देश तथा विदेशबाट राहतको ओइरो लागेको छ तर किन राहत बितरणमा ढिलाई भैरहेको छ ? सरकार किन भुकम्प प्रभावितहरूसम्म छिटो राहत पुयाउने काममा बिलम्ब गरिरहेको छ ? यो अवस्थामा सरकार मानव संबेदनाहिन हुनुहुँदैन । तसर्थ राहत वितरण हुँदैछ भनेर सरकारले ढिलाई गरेर अनि हात बाँधेर बस्न सरकारलाई कदापि हुँदैन । एक साता हुँदापनि अहिलेसम्म पीडितहरूलाई बस्न र खानाको राम्रो प्रबन्ध हुन सकेको छैन ।

खुला आकासमुनी रात बिताउन बाध्य हुनुपरेको छ । मानौं त्यहाँ मानवीयता भन्ने कुनै अनुभूति हुन सकेको छैन । यसले उनीहरू झन् दुखित हुनुपर्ने अवस्था सिर्जना भएको छ । जाडोको मौसममा पीडितहरू खुला आकाशमा गुजारा गर्नुपर्दा स्वास्थ्यमा समेत प्रतिकूल अवस्था सिर्जना हुन थालेको छ । त्यसैले विस्थापित सबैलाई प्रभावकारीरूपमा पुनस्र्थापना गर्ने गरी तीनवटै सरकारहरू राहत र पुनस्र्थापनामा गंभीर बन्नु जरुरी छ । भुकम्प प्रभावितहरूको दुःख पीडामा मल्हम लगाउने काममा नेकपा एमालेले चासो र चिन्ता देखाएको छ । त्यसो त अरू पार्टीहरूले समेत सहयोग गरिरहेका छन तर नेकपा एमालेले भुकम्प प्रभावित क्षेत्रमा आफ्ना एकहजार कार्यकर्तालाई स्वयंसेवकका रूपमा खटाउन थालेको छ । जनतालाई दुःख पर्दा हो सहयोगको काँध थाप्ने । अरू बेला नागरिकहरू आफै दुःखजिलो गरिरहेका छन । जेहोस नेकपा एमालेले एकहजार स्वयंसेवक परिचालन गरेर पुनर्निर्माणको जुन अभियान सुरु गर्दैछ, त्यसको अनुसरण अरू पार्टीहरूले पनि गर्न सक्नुपर्दछ । नागरिकहरू संकटमा पर्दा सरकारले कुशल अभिभावकत्व दिनुपर्छ । तर, सरकारभन्दा एक कदम अघि बढेर नेकपा एमालेको मानवीयता प्रकट भएको छ, यो महत्वपूर्ण बिषय हो । अहिले भुकम्प प्रभावित क्षेत्रमा राहत बितरणमा ठूलो अनियमितता भएको गुनासो आएको छ । राहत वितरणमा पनि पहुँच भएकाहरूले मात्रै पाउने अवस्था देखिएको छ । आफ्ना दलका कार्यकर्तालाई मात्रै राहत वितरण गरिएको र राहत वितरणमा समेत पक्षपात देखिएको गुनासो सुन्नमा आएको छ । सरकारको यो बिषयमा गंभीर ध्यानाकर्षण होस् ।