खोज

अहिले देशैभरी चाडपर्व लक्षित सुरक्षाको लहर चलेको छ । खासगरी जिल्ला प्रशासन कार्यालय र जिल्ला प्रहरी कार्यालयहरूले आ– आफ्नो जिल्लामा दशैं, तिहार र छठलाई ध्यानमा राख्दै सुरक्षा योजना लागू गरेको बताईरहेका छन । विगतमा पनि चाडपर्व आउनै लाग्दा यस प्रकारका सुरक्षा योजना लागू हुन्थे । सुरक्षा योजना लागू भएपनि नागरिकले असुरक्षाको अवस्थामै बस्नु परेको यथार्थ हामीबाट लुकेको छैन । प्रहरी प्रशासनको दायित्व नै चाडपर्वमा मात्रै नभै हरेक दिन नागरिकलाई शान्तिको अनुभूति दिलाउनु हो । तर, यस्तै बेलामा हत्या, चोरी, डकैती र लूटपाटका घटना हुने गर्दछन् । यसै परिप्रेक्षमा सुरक्षा निकायले चाड लक्षित सुरक्षा योजना कार्यान्वयनमा ल्याएका छन । सुरक्षा योजना लागू गरेपनि त्यसलाई कार्यान्वयन गर्ने निकाय र स्थानीय जनताबीच समन्वय हुन जरुरी छ । सुरक्षा निकायको साथ र सहयोग लिएर सुरक्षा योजना पालना गर्नु सबैको कर्तब्य नै हो । चाडवाड शुरु भएपछि घर छाडेर बाहिर जानेको संख्या नेपालमा थुप्रै छ ।

अहिले आन्तरिक पर्यटन फस्टाउन थालेको बेला घर छाडेर घुम्न जानेहरू असुरक्षित हुनुपरेको अवस्था छ । पहिलो कुरा उनीहरू आफ्नै घरमा चोरी, लूटपाटको घटना हुने डरले त्रसित हुने गरेका छन । दोश्रो कुरा गन्तब्यसम्म पुग्दा हुने जोखिमबाट उनीहरू सशंकित बन्नुपर्ने अवस्था छ । शहरदेखि गाउँसम्मै अहिले सुरक्षा योजना लागू हुनुपर्दछ । सीमित सहरी क्षेत्रमा मात्र लागू हुने सुरक्षा योजनाले समग्र जिल्लाको शान्ति सुरक्षा स्थापित हुन सक्दैन । अहिले इ बैकिङ सुरु भैसकेकोले घर जाँदा प्रहरीलाई जानकारी दिने, किनमेल गर्न सपिङ मल, बजार वा अन्य स्थानमा जादा सकभर रकम नलिई जाने बानी बसाल्नु जरुरी छ । लुटपाटबाट जोगिन नगद रकम नबोक्न प्रहरीले आग्रह गरिसकेको छ । चाडवाडमा किनमेल गर्दा विद्युतीय भुक्तानी मार्फत गर्न आग्रह गरेको छ । रकम बोकेर किनमेल गर्दा चोरी हुने सम्भावना बढेपछि स्थानीय प्रशासनले समेत नगद रकम नबोक्न आग्रह गरेको छ ।

सुरक्षा योजना लागू भएपछि हामी ढुक्क छौ भन्ने भावना नभै प्रहरीकै सल्लाहमा संगसंगै सुरक्षा व्यवस्था कार्यान्वयन गर्नु स्थानीयको दायित्व पनि हो । बढी भिडभाड हुने क्षेत्रमा बिहान ६ देखि बेलुकी ७ बजेसम्म गस्ती गर्ने , मुख्य चोक, सपिङ मल, गहना पसल, बैक तथा वित्तीय संस्था लगायतका क्षेत्रमा आवश्यकताको आधारमा २४ सै घण्टा प्रहरी परिचान गरिने गरी योजना सार्वजनिक गरिएको छ । तर, त्यो सुरक्षा योजना केवल नारा नबनोस् । यसमा नागरिक समाजको खबरदारी जरुरी छ । प्रहरीले सुरक्षा योजनामा क्विक रेस्पोन्स टिम, सादा पोशाकका प्रहरी परिचालन, साइकल, मोटरसाइकल गस्ती र कालोबजार नियन्त्रण अभियान नै थालेको छ । विगतमा धेरैपटक प्रहरीले सुरक्षा योजना सार्वजनिक गर्ने अनि हरेक दिन चोरी, लुटपाटको घटना भैरहेको देखिएको हो । तसर्थ यसपटक सुरक्षा योजनासंगै प्रहरी प्रशासनले त्यसको प्रभावकारीता तर्फपनि जोड दिनु जरुरी छ ।