खोज

तुलसीपुर उपमहानगरपालिका ६ की पुजा गुरुङ्गले महेन्द्र मावि तुलसीपुरबाट एसईई दिइन् । सानै उमेरमा बुबा गुमाएकी पुजालाई प्राविधिक शिक्षा अध्ययन गर्ने ठूलो रहर थियो । आर्थिक कारणले सोचेको कुरा पढ्न पाइदैन की भन्ने चिन्ता बढ्दै गइरहेको थियो । तुलसीपुर उपमहानगरपालिकाले छोरीहरुलाई निशुल्क प्राविधिक विषय अध्ययन गराउने नीति ल्याएपछि मेरो प्राविधिक शिक्षा पढ्ने सपना पुरा भएको छ । कुशल खाद्य विज्ञ वन्ने सपना देखेकी पुजाले तुलसीपुर उपमहानगरपालिकाले सञ्चालन गरेको तुलसीपुर बहुप्राविधिक शिक्षालयमा फुड एण्ड डेरी पहिलो सेमेस्टरमा पढिरहेकी छिन् ।

तुलसीपुर ४ रक्षाचौरकी खुसी परियारको सानैदेखि कृषि विज्ञ वन्ने सपना थियो । उनको सपना पनि अहिले साकार भएको छ । “निशुल्क रुपमा आफुले चाहेको विषय पढ्न पाउँदा असाध्यै खुसी छुँ” उनले खुसी व्यक्त गरिन् । वालमितेरी मावि भोजपुरबाट एसईई दिएकी अरुणा चौधरीको मेकानिकल इन्जिनियरिङ्ग पढ्ने सपना पनि यतिवेला सार्थक भएको छ । “बाबा आमाले पढ्न सकिदैन भन्नु भएको थियो तर पूर्ण छात्रवृत्ति पाएपछि अहिले पढ्न सम्भव भएको छ” चौधरीले भनिन् । तुलसीपुर ३ की आइसा ढकालको इलेक्ट्रिकल इन्जिनियरिङ्ग पढ्ने सपना पनि सार्थक भएको छ । “३ वर्ष पढेर आत्मनिर्भर वन्न सकिन्छ भन्नेमा ढुक्क छुँ” ढकालले खुसी व्यक्त गरिन् । यी केही प्रतिनिधि खुसी मात्रै हुन् । दर्जनौ छोरीहरुले यतिवेला प्राविधिक विषयको अध्ययन गरिरहेका छन् । तुलसीपुरलाई प्राविधिक शिक्षाको केन्द्रकारुपमा विकास गर्ने लक्ष्यका साथमा स्थानीय सरकारले शिक्षालयको स्थापना गरेको हो । शिक्षालयमा सामुदायिक विद्यालयबाट एसईई उत्तिर्ण गरेका पालिका भित्रका सबै छात्राहरुलाई निशुल्क अध्यापन गराउँने गरिएको शिक्षालयका प्रमुख वसन्त आचार्यले जानकारी दिए । आचार्यका अनुसार निशुल्क पढ्ने सबै छात्राहरुको शुल्क भने पालिकाले तिर्ने गरेको छ ।

उपमहानगरपालिकाले छात्रवृत्ति दिएर अहिले १ सय छात्राहरुले शिक्षालयमा विभिन्न प्राविधिक विषय अध्ययन गरिरहेको पनि आचार्यले वताए । “सामुदायिकमा पढ्ने जुनकुनै छात्राले अध्ययन गर्न चाहेपनि हामीले पूर्ण छात्रवृत्ति दिने गरेका छौँ” उपमहानगरपालिकाका शिक्षा शाखा प्रमुख चक्र भण्डारीले जानकारी दिए । उनले छात्रवृत्ति दिन थालेपछि प्राविधिक शिक्षा पढ्ने छात्राहरुको संख्या उल्लेख्यरुपमा बढेर गएको पनि बताए । “हामीले छात्रवृत्ति दिनुभन्दा पहिले यहाँ प्राविधिक शिक्षा अध्ययन गर्ने छात्राको संख्या निकै न्युन थियो” प्रमुख भण्डारीले भने । उनले सामुदायिक विद्यालयमा अध्ययन गरेका छात्राहरुलाई निशुल्क प्राविधिक विषय अध्यापन गराउन थालेदेखि सामुदायिक विद्यालयमा छात्राहरुको संख्या बढेर गएको समेत वताए ।

नगरप्रमुख घनश्याम पाण्डेले छोरीहरुले प्राविधिक शिक्षा अध्ययन गरेमा अरुको मुख ताक्नुनपर्ने बताउछन् । नगरले छोरीहरुलाई स्मार्ट वनाउनका लागि शिक्षामा जोड दिएको पनि बताए । “छोरीहरुलाई आत्मनिर्भर वनाउनका लागि मुख्य गरेर सीपमुलक शिक्षामा ध्यान दिनुपर्नेछ” नगरप्रमुख पाण्डेले भने । उनले तुलसीपुरलाई प्राविधिक शिक्षाको केन्द्रका रुपमा विकास गर्नका लागि स्थानीय सरकारकै पहलमा शिक्षालयको स्थापना गरेको बताए । आजको जमानामा प्राविधिक शिक्षाले बेरोजगारीको समस्या अन्त गर्न सक्ने भन्दै नगरप्रमुख पाण्डेले विभिन्न संघसंस्थासँग सहकार्य गरेर छोटो अवधिको तालिम समेत सञ्चालनमा पालिकाले ध्यान दिएको वताए ।