खोज

लुुम्बिनी प्रदेश लोकसेवा आयोग बुटवलले पहिलोपटक उम्मेदवार बनेको दुई जनालाई परिक्षा प्रवेश पत्र प्रदान गरेको छ । आयोगले स्वास्थ्य र इन्जिनियरिङतर्फ कर्मचारी माग गरेकामा पहिलो पटक एक जना मेडिकल अफिसर र एक जना नसिंह अधिकृतले फारम भरेका थिए ।

उनिहरुलाई लुम्बिनी प्रदेश लोकसेवा आयोगका अध्यक्ष प्रा. डिलाराम भट्टराईले प्रवेश पत्र प्रदान गरेका हुन् । स्थापनापछि पहिलो पटक प्रदेश लोक सेवा आयोगले कर्मचारी माग गरेको र त्यसमा पहिलो पटक उम्मेदवार बनेको हुँदा प्रवेश पत्र अध्यक्षबाट प्रदान गरिएको आयोगले जनाएको छ । प्रवेश पत्र प्रदान गर्दा आयोगका सदस्यका साथै कर्मचारीको उपस्थिती रहेको थियो ।

आयोगले सार्वजनिक सूचना जारी गरी स्वास्थ्यको आठौं तहतर्फ ४९ जना र सातौंतर्फ १५ जना कर्मचारी माग गरेको हो । आयोगले सातौंतर्फ नर्सिङ, फिजियोथेरापिस्ट, ल्याब टेक्नोलोजिस्ट माग गरेको छ ।

लुम्बिनी प्रदेशका सबै क्षेत्रमा दरबन्दी अनुुसारका कर्मचारी छैनन् । अहिले प्रदेश लोकसेवा आयोगले स्वास्थ्य र इन्जिनियरीङतर्फको मात्रै कर्मचारी माग गरेको हो । त्यस्तै इन्जिनियरिङतर्फ ३२ जना आठौं तहका कर्मचारी माग गरिएको छ । इन्जिनियरतर्फ सिभिल हाइवे, सिभिल जनरल, आर्किटेक इन्जिनियरलगायतका पदमा कर्मचारी माग गरिएको लुम्बिनी प्रदेश लोक सेवा आयोगका प्रवक्ता सूर्यप्रसाद भुसालले जानकारी दिए । भुसालका अनुसार निवेदन दिने अन्तिम म्याद कात्तिक १८ गतेसम्मका लागि राखिएको छ ।

प्रदेश सरकारले माग गरे अनुसार कर्मचारीको माग गरिएको र अरु क्षेत्रका कर्मचारी पनि प्रदेश सरकारले माग भएपनि सूचना प्रकाशित गरिने भुसालको भनाई छ । योग्यता पुगेका इच्छुक व्यक्तिले दोब्बर दस्तुर तिरेर कात्तिक २५ गतेसम्म निवेदन दिन सक्ने सूचनामा उल्लेख गरिएको छ ।