खोज

अर्घाखाँचीका जिल्लाका पूर्व जिल्ला पञ्चायत सभापति दुर्गा बहादुर शाहको निधन भएको छ । शाहको ८७ बर्षको उमेरमा मंगलबार राती निधन भएको हो । उनि पूर्व राष्ट्यि पञ्चायत सदस्य समेत थिए ।

उनको निधनले अर्घाखाँचीले एक कुशल अभिभावक गुमाएको डिर्भना अर्घाखाँची रुपन्देही सम्पर्क समाजका उपाध्यक्ष मित्रहरि आचार्यले बताए । सरल र सहयोगी व्यक्तिका रुपमा परिचय बनाएका शाहबाट धेरै सिक्नुपर्ने कुराहरु भएको उनको भनाइ छ ।

शाह अर्घाखाँचीका साथै पश्चिम नेपालको विकासका लागि योगदान दिने व्यक्तिको रुपमा चिनिन्थे । अर्घाखाँची रुपन्देही सम्पर्क समाजका संस्थापक अध्यक्ष बनेर उनले रुपन्देहीमा आएका जिल्लावासीलाई जोड्ने पहल गरेका थिए ।

जिल्लाको सदमुकामलाई सन्धिखर्क बनाउनमा उनको योगदान रहेको जिल्लावासीहरु बताउँछन् । उनि जिल्ला पञ्चायतको सभापतिमा विजय भएपछि सन्धिखर्क नगरपालिका ११ डिभर्ना रहेको विद्यालयको नाम त्यतिवेला विजय मावि नामाकरण गरिएको थियो ।

अर्घाखाँचीको डिर्भनाका शाह केही बर्षदेखि बुटवल २ मा बस्दै आएका थिए । जनप्रिय, जनसेवक र जनताकै मनोभावनालाई प्रतिनिधित्व गर्ने नेताको रुपमा चिनेको पूर्व जिल्ला शिक्षा अधिकारी तथा अर्घाखाँची रुपन्देही सम्पर्क समाजका सल्लाहकार डबलबहादुर बिसीले बताए । जहिले पनि गरिब, दुखी र निमुखाको रुपमा लाग्नुहुन्थ्यो उनले भने, व्यक्तिगत रुपमा भन्दा पनि विकासमा ध्यान दिने अगुवा भएका कारण अर्घाखाँचीवासीले उहाँलाई साझा व्यक्तिको रुपमा हेर्थ्यो ।

शाहका प्रदीप शाह, पदम शाह र धु्रव बिक्रम शाह गरी तीन छोराहरु रहेका छन् ।